Муштзани тоҷик Баҳодур Усмонов (9-0) дар мусобиқаи RCC Boxing Promotion бо варзишгари ӯзбек Нодирбек Соибов (9-1) қувваозмоӣ намуда, дар се раунд бо нокаути техникӣ бар ҳарифаш ғолиб дониста шуд. Дар ин бора хадамоти матбуоти промоушени RCC Boxing хабар медиҳад.
Қувваозмоии ду намояндаи кишварҳои минтақаи Осиёи Марказӣ дар доираи рақобатҳо (кардҳо)-и пешакии шоми бокс дар толори Академияи муҳорибаҳои РМК-и шаҳри Екатеринбурги Русия доир гардид.
Намояндаи Ӯзбекистон низ то ин рақобат ба мағлубият дучор нашуда буд. Рақобат аз оғоз бо бартарии пурраи Баҳодур сурат гирифта, пас аз раунди сеюм мураббиёни Нодирбек тасмим гирифтанд, ки қувваозмоиро қатъ мекунанд, зеро идомаи он барои саломатии дастпарварашон хатар дошт. Рақобат 8 раунд пешбинӣ шуда буд.
Ба ин тариқ муштзани тоҷик Баҳодур Усмонов дар фаъолияти касбии худ ҳоло боре ҳам дар ягон рақобат шикаст нахӯрда, мағлубнашуда боқӣ мемонад.
Дастовардҳои Баҳодур Усмонов
Баҳодур Усмонов 21 декабри соли 1997 дар шаҳри Душанбе таваллуд шудааст. Муштзан миёни ҳаваскорон ва касбист, ки дар дараҷаҳои вазни сабук ва нимасабуки якум ҳанарнамоӣ мекунад.
Иштирокчии Бозиҳои олимпии соли 2020. Дорандаи медали биринҷии Чемпионати ҷаҳон (соли 2023). Қаҳрамони Осиё (соли 2019). Ду маротиба ҷоизадор (медалҳои битринҷӣ)-и Чемпионати Осиё (солҳои 2021 ва 2022). Қаҳрамони чандинкарата ва ҷоизадори мусобиқаҳои Тоҷикистон ва мусобиқаҳои байнулмилалӣ миёни ҳаваскорон.
Иштирокчии мусобиқаи даставии нимакасбии «Лигаи бокс. Ҷоми интерконтиненталӣ» (2022). Мавқеи беҳтарин тибқи радабандии BoxRec – 63-ум (майи соли 2023). Усмонов аввалин варзишгар байни муштзанони тоҷик аст, ки ба феҳристи 65 беҳтарин муштзанон дар вазни сабук шомил шудааст.
Моҳи ноябри соли 2024 Баҳодур Усмонов дар мусобиқаи Ҷоми ҷаҳон дар Пекин бар муштзани Чин Ван Ле Куан дастболо шуда, ба даври нимфиналии Гран-при роҳ ёфта буд.
