Пулис 4 мардро дар Душанбе боздошт кардааст, ки ба қавли мақомот, онҳо худро корманди ҳифзи ҳуқуқ муаррифӣ карда, аз сокинон бо роҳи шатаж пул гирифтаанд.
Раёсати Вазорати корҳои дохилӣ дар Душанбе имрӯз, 27-уми март бо нашри як иттилоия аз онҳо С.С., Р.С., С.У. ва Ю.А. ном бурда, гуфт, ҳамаашон сокинони пойтахтанд.
“Номбурдагон бо маслиҳати пешакӣ гурӯҳи ҷиноятиро созмон дода, худро ҳамчун корманди мақомоти ҳифзи ҳуқуқ муаррифӣ намуда, бо далелҳои сохта шаҳрвандонро дастгир ва барои паҳн насохтани маълумотҳои беобрукунанда аз онҳо маблағҳои гуногуни пулӣ талаб карда гирифтаанд”, – омадааст дар хабари ин ниҳод.
Мақомот мегӯнд, то кунан 3 далели тамаъҷӯии боздоштшудаҳо ошкор шудаааст. Ҳамчунин, ин ниҳод аз шаҳрвандон хоҳиш кардаас, ки агар аз ин мардҳо ҷабр дида бошанд, метавонанд тавассути рақамҳои 018-02-02-02 ба милитсияи пойтахт муроҷиат кунанд.
Маълум нест, ки худи онҳо дар ин робита чӣ назар доранд.
Аз РВКД дар Душанбе ба “Азия-Плюс” гуфтанд, бар зидди онҳо бо гумони тамаъҷӯӣ (моддаи 250 КҶ) парванда оғоз шудааст.
Ин банди қонунгузорӣ аз 5 то даҳ сол зиндонро пешбинӣ мекунад.
Ёдрас мешавем, ки мақомот чанд рӯз пеш ҳам се ҷавонро, ки гуфта мешуд, худро корманди мақомоти ҳифзи ҳуқуқ муаррифӣ карда, аз шаҳрвандон пул гирифтаанд, дастгир карда буданд. Ба гуфтаи пулис, онҳо бо роҳи зӯроварӣ аз як шаҳрванд 9 ҳазор сомонӣ ва аз нафари дигар 2 ҳазору 300 сомонӣ гирифта, онҳоро латукӯб кардаанд.
Назари худи онҳо ё пайвандонашон маълум набуд.
Пулия гуфта буд, ки алайҳи ин се нафар бо иттиҳоми “ғоратгарӣ” (моддаи 248 КҶ) парванда оғоз гардидааст. Вале дигар иттилоъе нашр нашуд, ки ин қазия то куҷо расидааст.
