Дар даҳ рӯзи аввали даъват ба хидмати ҳарбии баҳорӣ дар Тоҷикистон нақша беш аз 80 дарсад иҷро шуааст. Дар ин бора Фаридун Маҳмадализода, сухангӯи Вазорати мудофиаи Тоҷикистон имрӯз, 11-уми апрел иттилоъ додааст.
Қаблан Вилояти мухтори куҳистони Бадахшон, вилояти Хатлон, минтақаи Рашт ва шаҳри Душанбе аз иҷрои пурраи нақшаи даъвати ҷавонон ба артиш хабар дода буданд.
Фаридун Маҳмадализода гуфтааст, айни ҳол иҷрои нақша дар шаҳру ноҳияҳои тобеи ҷумҳурӣ ба 72 дарсад баробар аст.
Ба гуфтаи ӯ, то кунун вилояти Суғд нақшаро 54 дарсад иҷро кардааст ва аз ин вилоят ноҳияи Кӯҳистони Масчоҳ низ нақшаи пешбинишударо аллакай ба анҷом расонидаааст.
“Умуман, аз якуми апрели соли равон иҷрои нақшаи даъвати баҳории шаҳрвандон ба хизмати ҳатмии ҳарбӣ дар даҳаи аввали ин моҳ дар тамоми шаҳру навоҳии Ҷумҳурии Тоҷикистон дар маҷмуъ беш аз 80 фоизро ташкил медиҳад”, – гуфтааст схуангӯи Вазорати дифоъ.
Мавсими баҳории даъват ба артиш дар Тоҷикистон аз 1-уми апрел оғоз шуд ва он то охири моҳи май давом мекунад. Имсол тибқи фармони раиси ҷумҳури Тоҷикистон ҷавонони аз 18 то 27 сола (солҳои таваллуди 1998-2007) ба артиш ҷалб мешаванд.
Солҳои гузашта ҳам ВМКБ ва бархе аз шаҳру навоҳии кишвар дар рӯзи аввали маъракаи даъвати ҳарбӣ аз иҷрои пурраи нақша хабар медоданд.
Мақомот иҷрои нақшаро дар рӯзи аввали маъракаи даъват “афзоиши ихтиёриён, пешниҳоди имтиёзҳо ба даъватшавандагон ва дуруст ба роҳ мондани корҳои фаҳмондадиҳӣ” арзёбӣ мекунанд.
Вале коршиносон мегӯянд, тибқи қонуни нави уҳдадорҳои ҳарбӣ мақомот ҳақ пайдо карданд, ки тамоми сол ҷавононро ба артиш ҷалб кунанд ва маҳз ин чиз сабаб мешавад, ки онҳо нақшаро дар рӯзҳои аввали маъракаи даъват иҷро кунанд.
Ҳамасола бо шуруъи маъракаи давъати ҳарбӣ мавзӯи ҷалби ҷавонон ба артиш дар Тоҷикистон доғ мешавад. Шароити номуносиб, бадрафторӣ бо сарбозон, меҳтарсолорӣ ва марги ҷавонон дар қисмҳои ҳарбӣ аз сабабҳои аслии саркашии ҷавонон аз хидмат дар артиши Тоҷикистон гуфта мешавад.
Дар ҷараёни маъракаи даъват ба сафи Артиш ҳамеша аз сарбозшикор ё “облава” низ хабару наворҳо нашр мегарданд. Агар мавриди “сарбозшикор” қарор гирифтед, чӣ бояд кард? Ба саволҳои худ дар матлаби “Сарбозшикор”. Чӣ бояд кард, агар “облава” шудед? посух гиред.
