Дар пайи муроҷиати сайёҳон аз Австралия, пулиси Душанбе як ронандаи таксиро барои бадрафторӣ ба онҳо боздошт ва беш аз 500 сомонӣ ҷарима кардааст.
Раёсати корҳои дохилӣ дар Душанбе имрӯз, 15-уми апрел бо нашри як иттилоия гуфт, "Закир Маматқобилов, ронандаи таксие дар Душанбе рӯзи 11-уми апрел ҳангоми хизматрасонии мусофиркашонӣ нисбати муроҷиаткунандагон – шаҳрвандони Австралия муносибати дағалона намуда, тартиботи ҷамъиятиро вайрон кардааст".
Дар наворе, ки мақомот нашр карданд, дида мешавад, ки чӣ гуна ронанда аввал ба сари сайёҳон зургӯӣ мекунад ва баъди аз мошин пиёда шуданаи онҳо ӯ низ аз пасашон бо қаҳр аз мошин мефарояд.
Дар идома чӣ шудааст, дида намешавад.
Мақомот гуфтаанд, нисбати ронанда бо гумони “майдаавбошӣ” (моддаи 460 КҲМ) протоколи маъмурӣ тартиб дода, бо ҳукми додгоҳ 525 сомонӣ (7 нишондиҳанда барои ҳисобҳо) ҷарима кардаанд.
Назари худи ронандаи таксӣ дар мавриди ин воқеа маълум нест.
Қаблан низ дар рӯзҳои таҷлили ҷашни Наврӯз пулиси шаҳри Душанбе як кирокашро барои аз меъёр зиёд талаб намудани ҳаққи роҳкиро ва “дағалона муносибат намудан” ба сайёҳи эронӣ боздошт ва ҷазо дода буд.
Ёдрас мешавем, ки қаблан Кумитаи рушди сайёҳӣ иттилоъ дода буд, ки барои дастгирӣ ва кумак ба сайёҳони хориҷӣ ва ширкатҳои сайёҳӣ хати телефони фаврӣ ташкил кардааст.
Гуфта мешуд, ширкатҳои сайёҳӣ ва сайёҳони хориҷӣ дар ҳолати зарурӣ метавонанд ба рақамҳои 118-200-200 аз соати 8:00 то 17:00 (аз душанбе то -ҷумъа) мустақиман тамос гиранд ва дар дигар вақтҳо тариқи паёмрасонҳои Whatsapp ё Telegramи рақамҳои боло муроҷиат кунанд.
