ЯК РӮЗИ ТАЪРИХ – 7 МАЙ
Соли 1992 – Ҳукумати эътилофии ризоияти миллӣ таъсис дода шуд. Ин як кӯшиш барои барқарории сулҳ дар Тоҷикистон буд.
Соли 2010 – Дар Кӯлоб ва навоҳии атрофи он обхезӣ рух дод, ки дар натиҷа 45 нафар ҳалок шуда, тақрибан 4,5 ҳазор кас бехона монданд.
Соли 2015 – Маҷлиси намояндагони Маҷлиси Олии Тоҷикистон Созишномаи соддагардонии расмиёти савдо бо Созмони ҷаҳонии савдо (СҶТ)-ро ба тасвиб расонид.
Соли 2020 – Додситонии кулли Тоҷикистон гуфт, ки алайҳи паҳнкунандагони хабарҳои бардурӯғ ва воҳимасозӣ дар робита ба COVID-19 чора меандешад.
Соли 2020 – Марказҳои назорат ва пешгирии бемориҳои ИМА (CDC) эълон карданд, ки $1,69 миллион доллар барои кумак ба Тоҷикистон дар муқобила бо COVID-19 ҷудо мешавад.
Соли 2020 – Президенти Ӯзбекистон Шавкат Мирзиёев супориш дод, ки 144 контейнери тиббӣ барои ташкили беморхонаи сайёр ба Тоҷикистон фиристода шавад. Ин як кумаки башардӯстона дар авҷи COVID-19 буд.
ШАХСИЯТҲО
Соли 1907 – Зодрӯзи Файз Ҷорубов, овозхони тоҷик, Ҳофизи халқии Тоҷикистони шӯравӣ.
Соли 1929 – Мавлуди Алиризо Раҳмонқулов, ҳунарпеша ва коргардон, Ҳунарпешаи шоистаи ҶШС Тоҷикистон.
Алиризо Раҳмонқулов дар аввал саркоргардони Театри мусиқӣ-мазҳакаи Хоруғ, коргардони ансамбли тарона ва рақси “Помир”, саркоргардон ва директори Филармонияи давлатии Тоҷикистон, коргардони студияи Телевизиони тоҷик буд.
Ӯ солҳои 1967-1972 директори Театри давлатии академӣ-драмавии ба номи Лоҳутӣ ва солҳои 1972-1979 директори Филармонияи давлатии Тоҷикистон будааст. Баъдан муовини директори Хонаи эҷодиёти халқи Вазорати фарҳанги Тоҷикистон, муовини директори Филармонияи давлатии Тоҷикистон буд.
Номбурда бо иҷрои нақшҳои барҷаста дар саҳнаи театр низ симои худро дар ин соҳа абадӣ сохтааст. Ҳамчунин муаллиф ва мураттиби китобҳои “Расму оинҳои нави тоҷикӣ”, “Сурудҳои дилнишин”, “Либосҳои миллии ҳаваскорони санъат” аст.
Алиризо Раҳмонқулов 15-уми июни соли 2020 дар 91-солагӣ дар ноҳияи Шуғнон аз олам даргузашт
Соли 1935 – Зодрӯзи Пӯлод Усмонов, академик, доктори илми биологӣ.
Соли 1948 – Мавлуди Адҳам Холиқов, сарояндаи опера, Ҳунарпешаи халқии Тоҷикистон.
ИЗОБРАЖЕНИЕ Адҳам Холиқов
Адҳам Холиқов баъди хатми Донишкадаи давлатии санъати Тоҷикистон ба номи М. Турсунзода, Консерваторияи давлатии ш. Маскав солҳои 1970-1980 сарояндаи ансаммбли “Красная звезда” дар Маскав буд.
Баъдан ба Тоҷикистон омад ва то охири умр овозхони (сарояндаи) Театри давлатии академии опера ва балети ба номи Садриддин Айнӣ буд.
Ӯ ҳамчунин дар саҳнаи театр якчанд нақшҳои ҷолиб офаридааст, аз ҷумла дар 30 намоишномаи операвӣ. Нақши Онегин дар “Евгений Онегин”, Демон дар “Демон”, Беҳзод дар “Айнӣ”, Салим дар “Қишлоқи тиллоӣ”, Содиқ, дар “Бозгашт”, Восеъ дар “Фарёди гузаштаҳо” аз нақшҳои дурахшони ӯ мебошанд.
Адҳам Холиқов 3-юми июли соли 2024 дар синни 76-солагӣ дар шаҳри Душанбе аз олам даргузашт.
Соли 1969 – Зодрӯзи Неъматулло Ҳикматуллозода, ёрдамчии Президенти Тоҷикистон оид ба масъалаҳои иқтисодӣ, Вазири пешини рушди иқтисод ва савдо.
ИЗОБРАЖЕНИЕ Неъматулло Ҳикматуллозода
Неъматулло Ҳикматуллозода хатмкардаи Донишкадаи хоҷагии халқи Маскав ва Академияи хидмати давлатии назди Президенти Федератсияи Русия буда, фаъолияти кориашро дар Институти давлатии лоиҳакашии “Тоҷикгипрозем”-и Кумитаи давлатии агросаноатии Тоҷикистон оғоз намуда, минбаъд дар корхонаи хурди “Ориё”-и Иттиҳодияи ҷумҳуриявии “Тоҷиквнешторг”, шуъбаи иқтисодии Вазорати алоқаи Тоҷикистон, шуъбаи ислоҳоти иқтисодӣ ва инвеститсияи Дастгоҳи иҷроияи президенти ҶТ фаъолият намудааст.
Баъдан ҳамчун мушовири калони Президенти Тоҷикистон оид ба сиёсати иқтисодӣ фаъолият кард. Аз ноябри соли 2012 то феврали соли 2015 муовини якуми вазири рушди иқтисод ва савдои Тоҷикистон буд. Моҳи феврали соли 2015 вазири рушди иқтисод ва савдои Тоҷикистон таъин гардид ва то соли 2020 дар ин вазифа кор кард.
Ҳоло ёрдамчии Президенти Тоҷикистон оид ба масъалаҳои иқтисодӣ аст.
САНАҲОИ МУҲИМИ ҶАҲОНӢ
Рӯзи 7-уми май ҳамчун Рӯзи ихтирои радио сабт шудааст. Маҳз дар ҳамин рӯзи соли 1895 физики рус Александр Попов дар ҷаласаи Ҷамъияти физикаю кимиёи Русия бо маърӯза ва намоиши нахустин радиоприёмники сохтаи худ баромад намуда, аввалин иртиботи радиоиро ба роҳ монд. Аз ин рӯ, имрӯз ин сана ҳамчун иди кормандони тамоми соҳаҳои алоқа таҷлил мегардад: кормандони телевизион, радиошунавонӣ, почта, алоқа. Ин ид ҳамасола дар Тоҷикистон таҷлил мегардад.
ИЗОБРАЖЕНИЕ
270 сол пеш Донишгоҳи давлатии Маскав ба номи М.В. Ломоносов (МГУ) ба фаъолият оғоз крад. Ин донишгоҳ яке аз қадимтарин муассисаҳои олии таълимии Русия ба шумор меравад, ки соли 1755 бо ташаббуси олими маъруф Михаил Ломоносов таъсис ёфтааст.
Айни замон дар МГУ 40 факултет, 15 институти илмӣ-таҳқиқотӣ, тақрибан 750 кафедра ва озмоишгоҳ, Маркази илмӣ-таълимии тиббӣ, китобхонаи илмӣ, 4 осорхона, боғи ботаникӣ, боғоти илмӣ ва филиалҳо дар Севастопол, Тошканд, Остона, Боку, Душанбе ва Ирвон фаъолият доранд.
ИЗОБРАЖЕНИЕ
Соли 1985 Шӯрои вазирони Иттиҳоди Шӯравӣ қарореро таҳти унвони “Дар бораи чораҳои мубориза бо мастӣ ва майзадагӣ, манъи шаробпазии хонагӣ” қабул кард, ки дар таърих бо номи манъи машрубот (Сухой закон) маъруф гашт. Ин аввалин иқдоми Котиби генералии нави Ҳизби Комунисти Иттиҳоди Шӯравӣ Михаил Горбачёв буд.
Истеҳсоли машруботи хонагӣ ҳатто барои истифодаи шахсӣ манъ ва амали ҷиноятӣ эълон гардид. Дар натиҷа, шумораи ҳолатҳои заҳролудшавӣ аз истеъмоли маводи спиртии пастсифат афзоиш ёфт, аммо ҳамзамон умри миёнаи мардон боло рафт, миқдори таваллуд то 500 ҳазор нафар дар як сол афзуд ва сатҳи ҷинояткорӣ коҳиш ёфт.
ИЗОБРАЖЕНИЕ
ВАЗЪИ ҲАВО БАРОИ 7 МАЙИ СОЛИ 2025
Дар вилояти Суғд – Ҳавои тағйирёбанда, дар водиҳо бебориш, дар ноҳияҳои алоҳидаи кӯҳӣ борони кӯтоҳмуддат борида, раъду барқ ба амал меояд. Ҳарорат: дар водиҳо шабона 15+20º гарм, рӯзона 31+36º гарм, дар ноҳияҳои кӯҳӣ шабона 7+12º гарм, рӯзона 21+26º гарм.
Дар вилояти Хатлон – Ҳавои тағйирёбандаи бебориш. Ҳарорат: дар водиҳо шабона 17+22º гарм, рӯзона 33+38º гарм, дар ноҳияҳои доманакӯҳӣ шабона 12+17º гарм, рӯзона 28+33º гарм.
Дар шаҳру ноҳияҳои тобеи ҷумҳурӣ – Ҳавои тағйирёбанда, дар водиҳо бебориш, дар ноҳияҳои алоҳидаи кӯҳӣ борони кӯтоҳмуддат борида, эҳтимоли раъду барқ дар назар аст. Ҳарорат: дар водиҳо шабона 15+20º гарм, рӯзона 32+37º гарм, дар ноҳияҳои кӯҳӣ шабона 11+16º гарм, рӯзона 27+32º гарм.
Дар Вилояти Мухтори Кӯҳистони Бадахшон – Ҳавои тағйирёбандаи бебориш. Ҳарорат: дар ғарби вилоят шабона 12+17º гарм, рӯзона 22+27º гарм, дар баъзе ноҳияҳо то 32+34º гарм, дар шарқи вилоят шабона -3+2º, рӯзона 13+18º гарм.
Дар шаҳри Душанбе – Ҳавои тағйирёбандаи бебориш. Ҳарорат: шабона 17+19º гарм, рӯзона 34+36 гарм.
Дар шаҳри Хуҷанд – Ҳавои тағйирёбандаи бебориш. Ҳарорат: шабона 17+19º гарм, рӯзона 34+36º гарм.
Дар шаҳри Бохтар – Ҳавои тағйирёбандаи бебориш. Ҳарорат: шабона 19+21º гарм, рӯзона 36+38º гарм.
Дар шаҳри Хоруғ – Ҳавои тағйирёбандаи бебориш. Ҳарорат: шабона 12+14º гарм, рӯзона 24+26º гарм.
