Танҳо дар моҳи майи соли равон мақомот даҳҳо корхона ва сокинони кишварро барои “дӯздӣ” ва ё истифодаи ғайриқонунии нерӯи барқ дар умум, 4 миллион сомонӣ ҷарима бастаанд.
Дар ин бора Оҷонсии назорат дар соҳаи энергетика хабар дода, гуфтааст, ки ин маблағ дар 272 ҳолати “дуздӣ”-и барқ ошкор шудааст.
Оҷонсӣ бори дигар аз аҳолӣ хостааст, ки қонунгузорӣ ва шартномаҳои марбут ба истифодаи энергияро риоя кунанд.
Чанд нафар барои “дӯздӣ”-и нерӯи барқ ҷарима шудаанд, гуфта намешавад. Ҳамчунин, маълум нест, ки мақомот ин миқдори ҷаримаро ситонидаанд ё не.
Бояд гуфт, ки дар пайи сангин шудани ҷазо барои истифодаи ғайриқонунии барқ, то ин муддат мақомот аз боз шудани чанд парвандаи маъмурӣ ва ҷиноятӣ хабар доданд, ки ба “дузд”-ии барқ гумонбар мешаванд.
Аз ҷумла, чанд пеш як корхонаро барои дуздии барқ беш аз 44,5 ҳазор сомонӣ ҷарима карда, нисбати се корманди шабакаҳои тақсимоти барқӣ як ноҳия "барои бемасъулиятӣ дар иҷрои уҳдадорҳои касбӣ" парвандаи маъмурӣ боз карда буданд.
Ёдрас мешавем, ки чанде пеш ҷазо барои истифодаи ғайриқонунии барқ ва саркашӣ аз пардохти пули он сангин шуд.
Дар асоси Кодекси ҷиноятӣ касоне, ки қоидаҳои истифодаи нерӯи барқро вайрон ва аз пардохти пули он саркашӣ мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол зиндонӣ мешаванд.
Ҳамчунин, бар асоси Кодекси ҳуқуқвайронкунии маъмурӣ барои истифодаи нодурусти барқу гармӣ шаҳрвандон, мансабдорон ва соҳибони коргоҳу корхонаҳо аз 1 ҳазору 500 то 22 ҳазору 500 сомонӣ ҷарима мешаванд.
