Фаридун Шоҳназаров, яке аз размикорони ояндадори ММА аз Тоҷикисто (4-0) бо яке аз Лигаҳои бузургтарини муҳорибаҳои омехта дар ҷаҳон – PFL қарордод ба имзо расонид. Рақобати нахусти ӯ дар промоушен 5-уми июл дар назар буда, созишнома барои гузаронидани ду қувваозмоӣ пешбинӣ шудааст.
Дар ин бора ба “Азия-Плюс” худи размикор хабар дод. Ҳоло номи рақиби якуми Фаридун Шоҳназаров номаълум буда, лекин худи размикор гуфт, ки ҳам аз лиҳози ҷисмонӣ ва ҳам равонӣ комилан ба санҷишҳои нав омода аст.
“Ин қадами муҳим дар ҳунарнамоии касбии ман аст. Ман ба лигае меравам, ки дар он пурқуваттаринҳо ҳунарнамоӣ мекунанд. Ин ба ман як имконест, ки собит кунам, размикорони тоҷик дар сатҳи ҷаҳонӣ рақобатпазир мебошанд. Барои чунин имкон аз менеҷери худ миннатдорам, зеро мо муддати тӯлонӣ ба ин самт равона будем”, – иброз доштааст ин размикори тоҷик.
ИЗОБРАЖЕНИЕ Фаридун Шоҳназаров
Маҳдӣ Шаммас, менеҷери размикор аст, ки инчунин аз манфиатҳои Ҳамзат Чимаев намояндугаӣ мекунад. Ӯ ҳамчунин роҳбарии маркази маъруфи машқу тамрини "Allstars Training Cente"r-ро дар Шветсия бар дӯш дорад, ки бисёре аз размикорони маъруфи Аврупо дар он омодагӣ мегиранд.
Қобили зикр аст, ки Фаридун Шоҳназаров бо лақаби “Honey Badger” моҳи ноябри соли 2023 ба ҳунарнамоии касбии худ оғоз кард.
Сарфи назар аз роҳи кӯтоҳ дар ҳунарнамоии касбӣ, ӯ аллакай дар якчанд промоушенҳо – аз "AFC" то "Vendetta Fight Nights" муваффақона рақобат карда, бидуни ягон бохт пайиҳам чор ғалаба ба даст овард. Дар ҳар кадоме аз рақобатҳо ӯ маҳорату малака ва тактикаи хуб нишон дод.
ИЗОБРАЖЕНИЕ
Дастовардҳои ахири ӯ: 22 феврали соли 2025 – пирӯзӣ бар Антонио Маркос Суза (VFN 43), 11 июли соли 2024 – ғалаба бар Радик Валиев (Ares 23), 9 марти соли 2024 – ғалаба бар Илёс Гадоев (We Love MMA 70).
Акнун дар промоушени маъруфи PFL Фаридун ба арсаи байнулмилалӣ қадам гузошта, бо размикорони машҳури вазни сабук дар як саф қарор мегирад. Ин мисоли ӯ метавонад размикорони ҷавон аз Тоҷикистонро рӯҳбаланд намуда, таҷассумгари он аст, ки дастӯёбӣ ба ҳунарнамоӣ дар октагони сатҳи ҷаҳонӣ имконпазир мебошад.
