Дар ноҳияи Роштқалъа як мошини сабукрав ба дарёи Шоҳдара сарозер шуда, ронанда ва се мусофири он ғарқ шудаанд. Ба иттилои Кумитаи ҳолатҳои фавқулода, ҳодиса рӯзи 8-уми июл, тақрибан соати 07:00 рух дода, худи ҳамон рӯз ҷасади яке аз мусофирон дарёфт гардидааст.
Ба иттилоъи мақомот, Хоҷадодов Хурсанд, сокини 36-солаи деҳаи Руботи Роштқалъа, рӯзи 8-уми июл ҳангоми ҳаракат аз ин деҳ ба маркази ноҳия “аз ӯҳдаи идораи нақлиёт” набаромада, бо мошини тамғаи “Нива” ба дарё сарозер шудааст.
Се мусофири нақлиёт – Давлатназаров Наврас (34-сола), Додихудоев Тирандоз (41-сола) ва Акрамбекова Мадина (26-сола) низ, ки ҳар се истиқоматкунандагони ин ноҳия будаанд, дар дарё ғарқ шудаанд.
Давлатназаров Наврас раиси ҷамоати деҳоти Сежд буда, Додихудоев Тирандоз ва Акрамбекова Мадина зану шавҳар будаанд.
Ориф Нозимиён, сухангӯи КҲФ имрӯз, 10-уми июл, ба “Азия-Плюс” гуфт, “тақрибан баъди се соати ҳодиса наҷотдиҳандагони минтақавии ин ниҳод ҷасади Додихудоев Тирандозро аз об берун оварда, ба пайвандонаш супориданд”.
Ба иттилои манбаъ, то имрӯз ҷасади се тани дигар пайдо нагардидааст ва ҷустуҷӯ идома дорад.
Ёдрас мешавем, ки охири моҳи майи соли ҷорӣ дар пайи сарозер шудани як мошин ба дарёи Панҷ, ки ронанда ва 6 мусофир дошт, 5 нафар ғарқ шуда буданд. Ронанда ва як мусофири дигар то сарозер шудани мошин худро аз он берун партофта, наҷот ёфта буданд.
