Оҷонсии Туркия оид ба ҳамкорӣ ва ҳамоҳангсозӣ (ТИКА) дар якҷоягӣ бо мактаби робототехника ва барномасозии “Лигаи роботҳои Тоҷикистон” бо ҳадафи оммавӣ гардонидани робототехника дар мактабҳои Тоҷикистон таҳти шиори “Робототехника дар ҳар мактаб” лагери омӯзишӣ ташкил намуд.
Дар доираи лоиҳа 20 омӯзгор ва 40 хонандаи аз 12 то 16-сола аз 20 мактаби таҳсилоти ҳамагонии кишвар дар лагери 5-рӯза оид ба робототехника ва барномасозӣ ширкат варзиданд. Дар ин муддат кӯдакону омӯзгорон дар амал робототехника ва рамзгузории компютериро омӯхтанд. Дар давоми лагер ба донишҷӯён имконият дода шуд, ки мафҳумҳои асосии робототехника, таҷрибаи барномасозии роботҳоро омӯзанд ва роботҳои шахсии худро тарроҳӣ намуда, созанд. Дар охир ба се дастае, ки дар мусобиқаи байни дастаҳо ғолиб омадаанд, маҷмӯи роботсозӣ тақдим гардид.
Ҳамчунин, ба намояндагони ҳар як мактаб, ки дар ин омӯзиш ширкат варзиданд, маҷмӯаҳои робототехникӣ ва ноутбукҳо барои барномасозӣ дода шуданд, то онҳо тавонанд фаъолияти худро дар минтақаи худ идома диҳанд ва хонандагони бештарро бо робототехника шинос намоянд.
ИЗОБРАЖЕНИЕ
Дар маросими тақдими шаҳодатномаҳо, ки дар фарҷоми омӯзиш баргузор карда шуд, Умут Аҷар, сафири Туркия дар Тоҷикистон, Ҳаким Исмоилзод, муовини якуми директори Агентии инноватсия ва технологияҳои рақамии назди Президенти Ҷумҳурии Тоҷикистон, Иброҳим Унал, ҳамоҳангсози ТИКА дар Тоҷикистон ва намояндагони Вазорати маориф ва илми Ҷумҳурии Тоҷикистон ва дигар сохторҳо ширкат варзиданд.
ИЗОБРАЖЕНИЕ
“Робототехника як бахши бисёрҷанбаи илм аст, ки фанҳои мухталифро аз қабили механика, физика, автоматика ва муҳандисии компютерӣ муттаҳид мекунад. Ва дар миёни кӯдаконе, ки имрӯз ба таълими робототехника фаро гирифта шудаанд, муҳандисон ва барномасозони оянда ҳастанд”, – гуфт Умут Аҷар.
Ҳаким Исмоилзод аз ин барнома изҳори қаноатмандӣ карда, зикр кард, ки “чунин лагерҳо барои дар оянда ба камол расидани кӯдакон ҳамчун лидерҳои технологӣ кумак мерасонанд ва ҳамзамон эҷодкорӣ, маҳорати ҳалли мушкилот ва қобилияти ҳамкории онҳоро такмил медиҳанд”.
Ҳадаф аз ин лагери омӯзишии робототехникӣ, ки барои бори аввал дар сатҳи ҷумҳуриявӣ бо ширкати намояндагони тамоми манотиқи Тоҷикистон баргузор мешавад, афзоиши таваҷҷуҳи ҷавонон ба фанновариҳои инноватсионӣ, бахусус робототехника ба ҳисоб меравад.
