Масъулини Ваколатдор оид ба ҳуқуқи инсон дар Тоҷикистон (Омбудсмен) бо рӯзноманигорони зиндонии тоҷик мулоқот кардаанд ва мегӯянд, ки онҳо дар ҳоли ҳозир шикояте надоранд.
Ҳусниддин Нидоев, муовини Сардори шуъбаи ҳифзи ҳуқуқҳои шаҳрвандӣ ва сиёсии дастгоҳи Вақолатдор оид ба ҳуқуқи инсон рӯзи 5-уми май бо рӯзноманигорони зиндони тоҷик вохӯрдааст.
Ӯ дар нишасти матбуотӣ, имрӯз, 4-уми август, гуфт, бо Далери Имомалӣ, Завқибек Саидаминӣ, Абдуллоҳ Ғурбатӣ ва Аҳмад Иброҳим дар зиндони маъруф ба “1-ум Советский” мулоқот доштааст.
Ба қавли ӯ, вазъи саломатии онҳо хуб аст ва шикояте накардаанд.
“Мо пайваста бо онҳо дар сӯҳбат ҳастем. Ҳатто мо вақте бо сардорони муассисаҳо телефонӣ сӯҳбат мекунем, аз ҳолу аҳволи онҳо мепурсем, хусусан дар бораи нафароне, ки дар воситаҳои ахбори омма зиёд нашр мешаванд”, – гуфт Нидоев.
ИЗОБРАЖЕНИЕ Ҳусниддин Нидоев (аз чап якум)
Чанде пеш пайвандони Абдусаттор Пирмуҳаммадзода, рӯзноманигори зиндонии тоҷик шикоят доштанд, ки моҳи март ӯро ба ҳуҷраи ҷаримавии зиндон (ШИЗО) гузаронидаанд ва наметавонанд бо рӯзноманигор мулоқот кунанд.
Абдукарим Пирмуҳаммадзода, додари Абдусаттор Пирмуҳаммадзода, ба “Азия-Плюс” гуфт, ки аз моҳи март ба ин сӯ аз бародараш хабаре надоранд. Ба қавли ӯ, пайвандонаш чанд маротиба ба зиндони Хуҷанд рафтаанд, вале бо Абдусаттор Пирмуҳаммадзода мулоқот карда натавонистаанд.
“Моҳи марти ҳамин сол, дар робита ба авф чанд комиссия ба зиндон рафта, бо маҳбусон вомехӯранд ва рӯйхати онҳоеро, ки афв мешавад тартиб медиҳанд… Бародарам ба комиссияҳо мегӯяд, ки “ман бегуноҳам, чаро номи маро ба рӯйхати озодмешудаҳо ворид намекунед?”. Комиссия чизе намегӯяд, вале баъди рафтани онҳо масъулини зиндон бародарамро ҷазо медиҳанд. Чуноне огоҳ шудем, ҳоло дар ҳуҷраи камераи ҷаримавӣ (ШИЗО) аст. Чанд бор ҳамсару фарзандонаш ба Хуҷанд рафтанд, вале дида натавонистанд. Аз ҳамон вақт ба ин сӯ занг ҳам назадааст. Мо аз вазъи саломатиаш хавотир ҳастем”, – гуфт ҳамсуҳбати мо.
Ҳусниддин Нидоев дар ин робита гуфт, ки соли пеш бо Пирмуҳаммадзода дар зиндони Хуҷанд мулоқот доштаанд, вале имсол бо ӯ вонахӯрдаанд. Нидоев гуфт, ки баъд аз нишаст, аз ҳоли Абдусаттор Пирмуҳаммадзода пурсон мешавад.
Сарфи назар аз гуфтаи Нидоев, пайвандони Завқибек Саидаминӣ шикоят доранд, ки вазъи саломатии ӯ хуб нест. Мағфират Худойназарова, ҳамсари Завқибек Саидаминӣ, рӯзи 8-уми июл дар сӯҳбат бо "Азия-Плюс" гуфт, ки шавҳараш пас аз зиндонӣ шудан ба бемории асаб гирифтор шудааст ва як моҳи охир аз дарди чашм азоб мекашад.
“Дору бурдем. Мехӯранд. Гуфтанд, ки ба назди камод духтури чашм ҳам рафта, муоилиҷа кардаанд. Ҳолашон он қадар хуб нест”, – бо нигаронӣ иброз дошт Мағфират Худойназарова.
Ҳамчунин, ӯ гуфт, ки чанд вақт аст Саидаминӣ аз дарди сутунмӯҳра ранҷ мекашад. Дар ин муддат ӯ аз дарди сутунмӯҳра табобат гирифтааст, аммо ҳоло он боз хуруҷ кардааст.
Пайвандони Далери Имомалӣ ва Аҳмади Иброҳим мегӯянд, ки вазъи саломатии ин рӯзноманигорон хуб аст ва ягона шикояташон дар зиндон будан асту бас.
Бояд гуфт, ки Аҳмади Иброҳим ба 10 солу 4 моҳ, Далери Имомалӣ ба 10 сол, Абдуллоҳ Ғурбатӣ ба 7,5 сол ва Абдусаттор Пирмуҳаммадзодву Завқибек Саидаминӣ ба 7-солии зиндон маҳкум шудаанд.
Баъди ҳукми додгоҳ, пайвандон ва вакилони дифои рӯзноманигорони зиндонӣ ба зинаҳои болоӣ шикоят карданд, вале дар зинаҳои кассатсионии додгоҳ ҳам ҳукми ин рӯзноманигор тағйир наёфт.
Созмонҳои журналистиву ҳомии ҳуқуқи башар ҳам аз боздошти ин ду журналисти тоҷик бонги хатар мезананд ва аз мақомоти Тоҷикистон озодии онҳоро талаб мекунанд, аммо то ҳол ҳеҷ акси садое нест.
