Шурӯъ аз моҳи октябри имсол духтарони синни 10-14 солаи кишварро бар зидди вируси папилломаи одам (ВПО) эм мекунанд. Дар ин бора қарори ҳукумати кишвар аз 24-уми июли соли 2025 ба тасвиб расида, комиссияи ҷумҳуриявӣ зери роҳбарии муовини сарвазири кишвар таъсис ёфтааст.
Тибқи қарори ҳукумат, давраи эмкунии духтарони аз 10 то 14-сола дар марҳилаи аввал танҳо як моҳ идома мекунад. Вале, эмкунии духтарони 10-сола ба таври доимӣ ҳамчун қисми мунтазами барномаи саломатӣ минбаъд низ анҷом дода мешавад.
Вазорати тандурустӣ ва ҳифзи иҷтимоии аҳолӣ муаззаф гардидааст, ки ваксинаи зидди вируси папилломаи одамро сари вақт ба муассисаҳои тандурустии шаҳру ноҳияҳо дастрас кунад.
Ин ниҳод уҳдадор шудааст, ки баъди анҷоми чорабинии эмкунии оммавӣ дар давоми 15 рӯз натиҷаи онро ба ҳукумат пешниҳод кунад.
Аз вазорати тандурустӣ ба “Азия-Плюс” гуфтанд, ки эмкунӣ ройгон дар мактабҳои миёна ва муасссаҳои тиббии маҳалли зисти аҳолӣ гузаронида мешавад.
Инчунин, тибқи қарори ҳукумат Вазорати маориф ва илми кишвар вазифадор гардидааст, ки дар мактабҳо ҷиҳати эм кардани духтарон бар зидди бемории папилломаи одам, ҳуҷраҳои алоҳида ташкил кунад.
Кумитаи дин ва танзими ҷашну маросими назди ҳукумати Тоҷикистон низ бояд аҳамияти эмкунӣ бар зидди ин вирусро байни аҳолӣ фаҳмонанд.
Ҳамзамон ҳукуматҳои вилоятҳои Суғд, Хатлон, ВМКБ, шаҳри Душанбе ва шаҳру ноҳияҳои тобеи ҷумҳурӣ низ уҳдадор шудаанд, ки аз ҳисоби ташкилотҳои зертобеъ воситаи нақлиёт ҷудо карда бо сӯзишворӣ, таъмин кунанд.
Вируси папилломаи одам бемории вирусии ҷиддие аст, ки боиси пайдоиши захмҳо дар пӯст, узвҳои таносулӣ ва гарданаки бачадон мегардад.
