Фонди рушди Қатар барои сохтмони нерӯгоҳи барқи обии “Роғун” ба Тоҷикистон 50 миллион доллар қарзи имтиёзнок медиҳад.
Созишномаи ин қарз миёни Вазорати молияи Тоҷикистон ва Фонди рушди Қатар рӯзи 23-юми август, дар шаҳри Душанбе имзо шудааст. Дар хабари расмӣ гуфта нашудааст, ки қарзро Тоҷикистон бояд кай баргардонад.
“Ҳадафи лоиҳа ин саҳм гузоштан ба амнияти миллии энергетикӣ ва дастгирии рушд дар Ҷумҳурии Тоҷикистон бо роҳи таъминоти нерӯи барқи барқароршаванда барои қонеъ кардани талаботи маҳаллӣ ва тавсеаи тавлиди нерӯи барқи дохилӣ ва минтақавӣ тавассути истеҳсоли энергия мебошад”, – гуфта шудааст дар хабари расмӣ.
Дар ҳамин ҳол, дирӯз, 24-уми август, Фаҳд Ҳамад Ал-Сулайтӣ, директори генералии Хазинаи Қатар оид ба рушд бо ҳайати намояндагони бонкҳои Қатар дар доираи сафари худ ба Тоҷикистон аз НБО "Роғун” дидан кард ва “аз ҷараёни корҳои сохтмонӣ ва лоиҳаҳои бунёдии он аз наздик шинос шуд”.
Саҳифаи расмии ин неругоҳ дар “Фейсбук” навиштааст, ки “Ал-Сулайтӣ гуфт, сохтмони НБО "Роғун" дастоварди бузурги мардуми тоҷик буда, метавонад ба рушди минбаъдаи иқтисоди кишвар ва ҳамкориҳои судманди минтақавӣ саҳми муносиб гузорад”.
ИЗОБРАЖЕНИЕ Боздиди Фаҳд Ҳамад Ал-Сулайтӣ аз сохтмони НБО "Роғун"
Ҳамчунин, ӯ як рӯз пеш, 23-юми август бо Эмомалӣ Раҳмон, раисҷумҳури Тоҷикистон мулоқот карда, “масоили вобаста ба ҳолати кунунӣ ва густариши ҳамкории Тоҷикистон бо Қатар ва ниҳодҳои иқтисодию бонкии он” муҳокима карданд.
Бо иттилои Вазорати молия, барои ба итмом расонидани сохтмони “Роғун” бо чанде аз созмонҳои молиявии байналмилалӣ ба маблағи умумии 812 миллион доллар созишномаҳо ба имзо расидаанд, ки аз ин 462 миллион доллар қарзҳо ва 350 миллион доллар грант мебошанд.
Барои пурра ба анҷом расонидани “Роғун” Тоҷикистон ба 6,4 миллиард доллар ниёз дорад.
Дар аввал ҳукумат мақсад дошт, ки бунёди нерӯгоҳи “Роғун” аз ҳисоби маблағҳои дохилӣ, аз ҷумла фурӯши саҳмияҳо ба роҳ монда мешавад. Аммо дертар ҳукумат эълон кард, ки барои сохтмони ин иншоот сармоя ҷалб мекунад.
Ҳамин тариқ, соли 2021 ҳукумати кишвар барои ҷалби сармоя ба шарикони байналмилалӣ муроҷиат кард.
Эмомалӣ Раҳмон, раисҷумҳури Тоҷикистон зимни суҳбат бо сохтмончиёни НБО “Роғун” гуфта буд, ки давоми солҳои 2008-2024 ҳукумати мамлакат барои анҷом додани корҳои сохтмону барқарорсозии нерӯгоҳ аз ҳисоби буҷети давлатӣ ва дигар сарчашмаҳо зиёда аз 42,5 млрд сомонӣ маблағ равона намудааст.
Пештар раисиҷумҳури кишвар гуфт, ки агрегати навбатии “Роғун” соли 2025 ба истифода дода мешавад. Ду агрегати аввалини неругоҳ, ки дар ҳоли ҳозир бо иқтидори кам фаъолият мекунанд, дар солҳои 2018 ва 2019 ба истифода дода шуда буданд.
Дар маҷмуъ 6 агрегати иқтидори ҳар кадоми онҳо 600 МВт дар утоқи мошинсозии неругоҳ насб карда мешавад.
Мавриди баҳрабардорӣ қарор додани агрегати охирини ин нерӯгоҳ соли 2029 дар назар аст. Анҷоми пурраи корҳои сохтмонӣ дар неругоҳ соли 2035 пешбинӣ шудааст.
Интизор меравад, ки “Роғун” бо иқтидори насбшудаи 3600 МВт бузургтарин неругоҳ барқии обӣ дар Осиёи Миёна гардад.
