Нархи иҷораи хона дар Душанбе дар муқоиса бо соли гузашта ба таври назаррас боло рафтааст. Миёнаравҳои хариду иҷораи манзил сабабҳои болоравии нархро ба афзудани шумори биноҳои истиқоматии тахрибшуда ё дар нақша қарордошта ва оғози соли нави хониш рабт медиҳанд.
“Азия-Плюс” нархи иҷораи хонаи 1, 2 ва 3-ҳуҷрагӣ дар Душанбе, Тошканд, Бишкек, Остона ва Ишқободро бо нархи баланд, миёна ва паст муайян кард.
Барои ин, мо 50 эълони хонаҳои 1, 2 ва 3 ҳуҷрагӣ дар ин шаҳрҳоро, ки дар сомонаҳои пахши эълонҳо дар моҳҳои август ва сентябр нашр гардидаанд, таҳлил кардем.
Дар шаҳри Душанбе нархи иҷораи хонаи 1-ҳуҷрагӣ вобаста аз масоҳат ва шароити зарурӣ дар як моҳ ба ҳисоби миёна аз 300 то 700 доллар мебошад. Инчунин қимати хонаи 2-ҳуҷрагӣ ва 3-ҳуҷрагӣ ба ҳисоби миёна аз 500 то 2200 доллар мебошад.
Дар байни пойтахтҳои кишварҳои Осиёи Марказӣ дар Ишқобод нархи иҷораи хона нисбатан арзонтар аст. Дар ин шаҳр бо ҳисоби миёна бо 250 доллар хонаи 1-ҳуҷрагӣ бо масоҳати 40 метри мураббаъ ва муҷаҳҳаз бо лавозимоти заруриро ба иҷора гирифтан мумкин аст. Ҳамчунин, дар ин шаҳр ба ҳисоби миёна иҷораи хонаи 2-ҳуҷрагӣ 320 доллар ва 3-ҳуҷрагӣ 410 доллар мебошад.
Нархи баландтарин дар Остона ва Тошканд мебошад, ки ба ҳисоби миёна барои иҷораи манзили 1-ҳуҷрагӣ аз 470 то 920 доллар, 2-ҳуҷрагӣ аз 1100 то 1400 доллар ва 3-ҳуҷрагӣ 1570 то 1960 доллар лозим аст.
Дар Бишкек низ нархи иҷораи хона тақрибан ба нархгузории шаҳри Тошканд монанд аст. Дар ин шаҳр ба ҳисоби миёна арзиши иҷораи хонаи 1-ҳуҷрагӣ 480 доллар, 2-ҳуҷрагӣ 730 доллар ва 3-ҳуҷрагӣ 1130 доллар вобаста аз масоҳат ва шароити зист муайян шудааст.
Бояд гуфт, ки натиҷаи арзишҳои муайянкардаи мо бо таварруми доллару қурби пули миллии кишварҳои Осиёи Марказӣ бароварда шудааст.
Таҳлили вазъ нишон дод, ки сабаби баланд шудани нархи иҷора дар пойтахти кишварҳои Осиёи Марказӣ, пеш аз ҳама талаботи аҳолӣ ва меҳмонон ба хона ва оғози соли таҳсил аст, ки донишҷӯён аз минтақаҳо бармегарданд ва мехоҳанд, ки барои зист хона ба иҷора гиранд.
Соли гузашта нархи иҷораи хона дар пойтахти кишварҳои Осиёи Марказӣ чанд дар ин пайванд бубинед.
Бояд гуфт, ки дар пойтахти Тоҷикистон болоравии нархи иҷораи хона пас аз омадани шумори зиёди шаҳрвандони Русия дар соли 2022 шуруъ гардид. То ин вақт нархи иҷораи хонаи 2-ҳуҷрагӣ дар Душанбе ҳудуди 1500 то 5000 буд.
Коршиносон таъкид мекунанд, ки афзудани шумори хонаҳои тахрибшуда дар пойтахт дар ду соли охир ба баланд шудани нархи иҷораи хона таъсир расонидааст.
