Рӯзи 19-уми октябр дар Боғи ба номи Абулқосим Фирдавсии шаҳри Душанбе таҷлили иди Меҳргон ва намоиш-фурӯши маҳсулот ва техникаи кишоварзӣ баргузор мегардад. Дар ин рӯз, ҳамчунин, дар боғи мазкур чорабиниҳои “Иди тарбуз, харбуза ва каду”, “Иди себ ва ангур”, “Фестивали занбӯрпарварон, намоиш ва фурӯши асал” ва “Оши палав, намоиш ва фурӯши шолӣ ва биринҷ” доир мешаванд.
Дар ин бора Вазорати кишоварзии Тоҷикистон хабар додааст.
Ба гуфтаи ин ниҳод, дар ин чорабинӣ деҳқонон аз гӯшаҳои гуногуни кишвар маҳсулоти кишоварзии худ, аз қабили биринҷу шолӣ, себу ангур, асал, сабзавот ва меваҷотро ба намоиш гузошта, беҳтарин кадбонуҳои мамлакат ва ҳунармандони мардуми хӯрокҳои миллӣ ва маҳсулоташонро манзури сокинону меҳмонони пойтахт мегардонанд.
Вазорат гуфтааст, дар ин рӯз маҳсулоти кишоварзӣ бо нархи дастрас пешниҳоди сокинон мегардад. Инчунин, кумитаву идораҳои давлатӣ дастовардҳои соҳаи худро ба намоиш мегузоранд.
Меҳргон ҷашни тирамоҳӣ маҳсуб ёфта, ҳамчун рамзи сипосгузорӣ барои неъматҳои табиат ва заҳмати деҳқонон, эҳтиром ба ягонагии инсон ва табиат таҷлил карда мешавад.
Соли 2009 бо қарори ҳукумат ҷашни Меҳргон ба рӯйхати идҳои расмӣ дохил карда шуд ва соли гузашта ин ҷашн ба рӯйхати мероси фарҳангии ғайримоддии ЮНЕСКО низ ворид гардид.
