То шоми 6-уми март дар умум, 288 шаҳрванди Тоҷикистон тавассути марзи Туркманистон ва Озарбойҷон аз Эрон берун шудаанд.

Дар ин бора аз Вазорати корҳои хориҷӣ (ВКХ)-и Тоҷикистон ба “Азия-Плюс” хабар дода, гуфтанд, ки аз ин теъдод 116 касашон тариқи марзи Туркманистон ва 172 тани дигар тавассути сарҳади Озарбойҷон тарки Эрон кардаанд.

Қаблан, рӯзи 4-уми март ин ниҳод гуфта буд, ки баъди ҳамлаи Амрикову Исроил ба Эрон, 219 шаҳрванди Тоҷикистон аз ин кишвар хориҷ шудаанд: 118 нафар тавассути марзи Туркманистон ва 101 тани дигар тариқи марзи Озарбойҷон.

Вале маълум нест, ки омори онҳое, ки тариқи Туркманистон аз Эрон берун шудаанд, чаро тафовут дорад. Аз Вазорати корҳои хориҷӣ танҳо гуфтанд, “то шоми 6-уми март чунин оморро аз сафорати Тоҷикистон дар Эрон дастрас кардаанд”.

Ҳоло аниқ нест нест, ки онҳо то ба Тоҷикистон расидаанд ё не.

Ёдовар мешавем, ки дар ВКХ Тоҷикистон ситоди доимамалкунанда таъсис ёфта, намояндагиҳои дипломатии кишвар дар Ховари Миёна вазифадор шудаанд, то тамоми маълумот дар бораи шаҳрвандони Тоҷикистонро ҳамарӯза ба ин ситод пешниҳод кунанд.

Қаблан, Низомиддин Зоҳидӣ, сафири Тоҷикистон дар Эрон гуфта буд, дар Эрон ҳудуди 300 шаҳрванди Тоҷикистон қарор дошта, онҳо асосан барои тиҷорат ва табобату сайёҳат ба ин кишвар омада буданд.

Дар ҳамин ҳол, ҳукумат кӯшиш дорад, ки онҳое, ки дар пайи ин даргирииҳо дар кишварҳои Ховари Миёна банд монданд берун орад. Бо ин мақсад, бо қарори ҳкукумати кишвар ширкати "Сомон Эйр" вазифадор шудааст, ки дар ҳолати зарурӣ парвози чартерӣ созмон дода, шаҳрвандони кишварро аз ин минтақаҳо баргардонад. 

Аз ҷумла, шаби 5 ба 6-уми март ҳам 115 шаҳрванди Тоҷикистон тариқи хатсайри чартерӣ аз шаҳри Абу-Забии Имороти Муттаҳидаи Арабӣ ба Ватан омада буданд. Ин парвоз тариқи ҳавопаймот "Сомон Эйр" анҷом шуда буд.

Ҳамчунин, субҳи рӯзи 6-уми март 117 шаҳрванди Тоҷикистон тариқи парвози чартерӣ аз шаҳри Дубайи Имороти Муттаҳидаи Арабӣ ба Душанбе омадаанд. Ин парвоз дар ҳамкорӣ бо Сафорати Тоҷикистон дар Иморот, мақомоти маҳаллии ин кишвар ва ширкати “Fly Dubai” сурат гирифтааст.

Ҳамчунин, ин ширкати ҳавопаймоӣ рӯзи 8-уми март низ барои баргардонидани ҳамватанон аз Имороти Муттаҳидаи Арабӣ ба Тоҷикистон, парвози чартерӣ анҷом медиҳад. Нархи билет барои калонсолон 600 ва барои кӯдакон 400 доллар гуфта мешавад.

Ҳоло маълум нест, ки чанд шаҳрванди Тоҷикистон дар ин минтақаҳо банд мондаанд ва талаби ба Тоҷикистон баргаштанро кардаанд.

Қаблан, ВКХ аз шаҳрвандон хоста буд, ки "то ба эътидол омадани вазъ аз сафар ба кишварҳои Ховари Миёна худдорӣ намоянд".

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.

Дар пайи ҳамлаи Амрикову Исроил ба Эрон, то шоми 6-уми март 288 шаҳрванди Тоҷикистон тариқи марзи Туркманистон ва Озарбойҷон ба Ватан баргаштанд. “Азия-Плюс” бо чанде аз онҳо сӯҳбат кард ва аз вазъи Эрону роҳи тайкардаи онҳо то ба Тоҷикистон пурсид. 

Аксари онҳо барои табобат ба Эрон рафта буданд, вале вазъи мавҷуда онҳоро маҷбур кард, ки табобатро ба охир нарасонида, ин кишварро тарк кунанд.

“Худро бесоҳиб эҳсос накардем”

Раҳматулло Раҳматуллоев, сокини Душанбе яке аз онҳое аст, ки рӯзи 4-уми феврал тавассути сарҳади Туркманистон аз Эрон ба Ватан баргашт. Ӯ дар суҳбат бо “Азия-Плюс” гуфт, барои табобати фарзандаш ба шаҳри Машҳади Эрон рафта буд ва рӯзи 10-уми март барои бозгашт чипта дошт. Аммо дар пайи лағви парвозҳо ва тавсияи сафорати Тоҷикистон дар хусуси тарки Эрон, барои ба Ватан баргаштан дархост дод.  

“Аз сафорат гуфтанд, рӯзи 3-юми март дар назди марзи Эрон бо Турманистон ҳозир шавед. Мо соати 12-и ҳамон рӯз ба марз рафтем ва соати 14 – баъди нисфирӯзӣ вориди Турманистон шудем. Намояндагони Сафорати Тоҷикистон дар Туркманистон моро хуб қабул карданд ва барои ифтор низ шароит фароҳам оварданд. Дар ин муддат онҳо корҳои расмиятиро иҷро намуда, автобус омода карданд. Кормандони сафорат то марзи Ӯзбекистон моро ҳамроҳӣ карданд ва дар чунин вазъ худро бесоҳиб эҳсос накардем”,-нақл кард номбурда.

“Беморон дар роҳ ранҷ кашиданд”

Ҳамсуҳбати мо мегӯяд, дар муддати 12 соат аз Туркманистон то ба Ӯзбекистон расиданд, вале ба қавли ӯ, “дар ин кишвар намояндагии сафорати Тоҷикистон ба онҳо кӯмак накардаанд” ва баъди назорату тафтиши тӯлонии мақомоти Ӯзбекистон, мустақилона ба ватан баргаштаанд.

“Мо тахминан 33 нафар будем ва аксарият занон ва беморон буданд, ки дар роҳ ранҷ кашиданд. Дар марзи Ӯзбекистон бештар аз як соат назорати ҳуҷҷатҳо идома кард. Аввал гурӯҳи занҳоро тавассути “таксӣ” ба ватан равон карда, баъдан худамон низ “таксӣ” киро кардем. Тавассути роҳи Бухоро ва шаҳри Турсунзода, тахминан соати 19-и шоми рӯзи 4-уми март вориди Тоҷикистон шудем”, – гуфт Раҳматуллоев.

Ба қавли ҳамсуҳбати мо, замоне ки дар шаҳри Машҳади Эрон қарор доштанд, дар ин шаҳр даргирӣ ё ҳамлае сурат нагирифта буд. Аммо бо ноором шудани вазъ дар шаҳрҳои ҳамсоя, дар ҳоле ки табобати фарзандаш ба итмом нарасида буд, маҷбур шуд Эронро тарк кунад.

“Инҷо маризон бисёр буданд ва баъди оғози ҷанг нигарон шуданд. Ҳамаи беморон аз тарси ҷони худ маҷбур шуданд, ба Ватан баргарданд. Умедвори ором шудани вазъ дар Эрон ҳастем, то тавонем дигарбора барои идомаи табобат ба ин кишвар равем”, – афзуд номбурда.

“Духтари маризамро гирифта, маҷбур баргаштам”

Сафармоҳ Саидова, мусофири дигари ин гурӯҳ низ баъди оғози ҷанг ва ноором шудани вазъ маҷбур шуд, духтари маризашро, ки ҳанӯз муҳлати зиёде аз ҷарроҳиаш нагузаштааст, тавассути марзи Туркманистон ба Ватан биёрад.

Ӯ дар суҳбат бо “Азия-Плюс” гуфт, байни нафароне, ки бо онҳо баргаштанд, беморони гирифтори саратон, дарди гурда зиёд буданд ва ҳанӯз табобаташон ба анҷом нарасида, маҷбур шуданд дар шароити душвор ба Тоҷикистон баргарданд. 

“Табобат нимкора маҷбур шудем, баргардем. Гуфтанд, ки шояд даргириҳо шадидтар шаванд, аз ин рӯ бо тавсияи сафорат аз Эрон берун шудем. Чашми духтарамро ҷарроҳӣ карданд, бахияҳо (куки ҷарроҳӣ)-и чашмашро ҳоло наканда будем. Духтурони тоҷик ҳастанд, вале табиби эроние, ки ҷарроҳӣ кард, иҷозат надод дар инҷо бахияҳояшро гиранд. Акнун маҷбурем дубора ба Эрон баргардем, чун баъди оғози ҷанг ҳатто ҷавобҳои ташхиси духтарамро нагирифтаем”, – таъкид кард мусофири тоҷик.

“Диламон ба Эрон месӯзад”

Ин шаҳрванди Тоҷикистон мегӯяд, рӯзи 17-уми феврал барои табобати духтараш ба шаҳри Машҳади Эрон рафта буд.

Нақл мекунад, ки дар Машҳад садои таркишро шунид, аммо аз наздик надидааст.

“Гуфтанд, ҳудуди фурудгоҳи ин шаҳрро задаанд, ки он аз меҳмонхонае, ки мо қарор доштем, дур буд. Дигар ягон тағйирот набуд, назди духтур мерафтем ва дар меҳмонхона меистодем.

Умедворам ҳарчи зудтар оромиву тинҷӣ ба Эрон баргардад, мардуми ин кишвар мо тоҷиконро хеле дастгирӣ карданд. Дили ҳамаи мо тоҷикон барои мардуми Эрон месӯзад”, – гуфт Саидова.

“Садои таркишро шунидем, вале осеб надидем”

Беҳрӯз, як шаҳрванди дигари Тоҷикистон ҳам рӯзи 4-уми март аз Теҳрон тавассути марзи Озарбойҷон ба Тоҷикистон баргашт. Ӯ шабу рӯзи оғози ҳамлаҳои низомӣ дар пойтахти Эрон буд ва садои таркишро дар ин шаҳр шунидааст. Ӯ табиб аст.

“Бо ман ягон мушкил ё иттифоқе рух надод ва аз сафорат занг зада, номнавис карданд. Кормандони сафорат аз Теҳрон то шаҳри Бокуи Озарбойҷон ҳамроҳӣ намуда, ҳамаҷониба кӯмак расониданд. Аз ҷумла, барои гирифтани иҷозатҳои зарурӣ, убури сарҳад ва сафар аз Теҳрон ба самти Боку мусоидат карданд”, – гуфт Беҳрӯз.

Ёдрас мешавем, шанбеи 28-уми феврал Амрико ва Исроил ба шаҳрҳои Теҳрон, Исфаҳон, Қум, Караҷ ва Кирмоншоҳ – шаҳрҳои муҳими Эрон ҳамлаи мусаллаҳона карданд.

Артиши Эрон дар посух ба ин ҳамлаҳо ба Исроил ва пойгоҳҳои Амрико дар кишварҳои арабӣ зарба зад. Раисҷумҳури Амрико ва сарвазири Исроил дар изҳороти худ ошкоро изҳор доштанд, ки ҳадафи ҷанг сарнагунсозии низоми ҷорӣ дар Эрон аст. Ҷумҳурии Исломӣ дар посух таъкид кард, ки ба ҳар гуна таҷовуз посухи сазовор ва қотеъ хоҳад дод. Ҳоло ҳамлаҳои тарафҳо идома дорад. Вазъият печида ва ташвишовар боқӣ мемонад.

Тибқи иттилои ВКХ, то шоми 6-уми март, 116 шаҳрванди кишвар тавассути марзи Туркманистон ва 172 тани дигар тариқи марзи Озарбойҷон аз Эрон берун шуда, ба Тоҷикистон омадаанд.

Қаблан, дар рӯзи дуввуми ҷанг, Низомиддин Зоҳидӣ, сафири Тоҷикистон дар Эрон гуфта буд, ки дар Эрон ҳудуди 300 шаҳрванди Тоҷикистон қарор дошта, онҳо асосан барои тиҷорат ва табобату сайёҳат ба ин кишвар омадаанд. Он замон сафир гуфта буд, ки 200 кас дасрхости бозгашт ба Ватан додаанд. Ҳоло маълум нест, ки шумораи онҳо ба чанд расидааст.

Дар пайи нооромиҳо ва баста шудани ҳарифи ҳавоии Эрон, ширкати “Сомон Эйр” эълон карда буд, ки маҷбур аст, парвозҳои худро дар масири Душанбе-Теҳрон то 31-уми март боздорад.

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.

ЯК РӮЗИ ТАЪРИХ

Соли 2013 – Ширкати ҳавопаймоии “Tajik Air” хатсайри Душанбе – Бокуро роҳандозӣ кард.

Соли 2015 – Нашрияи бритониёии “The Guardian” мақолаеро дар бораи рӯзноманигорони зан аз кишварҳои собиқи Иттиҳоди Шӯравӣ, аз ҷумла дар бораи Олга Тутубалина, муҳаррири рӯзномаи “Asia-Plus” нашр кард.

Соли 2016 – Дар назди кафедраи “Омӯзиши Осиёи Марказӣ”-и факултети “Муносибатҳои байналмилалӣ”-и Донишгоҳи Кангнами шаҳри Ёнгини Корея шуъбаи забони тоҷикӣ ифтитоҳ шуд.

Соли 2018 – Дар марзи Тоҷикистон ва Ӯзбекистон (дар ноҳияи Шаҳритус) гузаргоҳи роҳи оҳани “Амузанг” ба фаъолият оғоз кард.

Соли 2020 –Эмомалӣ Раҳмон, президенти Тоҷикистон дар мулоқот бо занон дар бораи хатари коронавирус сухан гуфта, аз мардум даъват кард, ки осуда бошанд ва ба иттилооти бардурӯғ бовар накунанд.

ШАХСИЯТҲО

Соли 1922 – Мавлуди Зулфия Баҳриддинова, сӯзанидӯз, Рассоми халқии Тоҷикистон.

Зулфия Баҳриддинова cанъати қаламкаширо аз падар омӯхтааст. Ӯ хатмкардаи Омӯзишгоҳи педагогии шаҳри Ленинобод ва Институти давлатии педагогии Ленинобод буда, беш аз даҳ сол омӯзгор ва директори омӯзишгоҳи мазкур будааст.

Солҳои 1957-1987 сарвари шуъбаи Иттифоқи рассомони Тоҷикистон дар Суғд буд. Давоми 70 соли фаъолият беш аз 300 асар офаридааст. Ба туфайли сӯзаниҳои ӯ бисёр нақшҳои сӯзаниҳои садаҳои 18-19 ва аввали садаи 20 (чун нақшҳои “Пайпоқи уштур”, “Офтоб”, “Бодомгул”, “Қаламфур”, “Моҳу ситора”) эҳё гардидаанд.

Соли 1938 – Зодрӯзи Ҷӯра Латифов, доктори илмҳои таърих.

Соли 1953 – Зодрӯзи Қаҳҳор Расулиён, муҳаққиқ ва таърихнигори тоҷик.

Ӯ пас аз хатми Донишгоҳи давлатии Тоҷикистон (ҳоло ДМТ) фаъолияти омӯзгории худро оғоз намуда, дар муассисаҳои гуногуни таҳсилоти олӣ, аз ҷумла Донишгоҳи давлатии Кӯлоб ва Донишгоҳи миллии Тоҷикистон дар вазифаҳои гуногун кор кардааст.

Солҳои тӯлонӣ ба омӯзиш ва таҳқиқи тамаддуни тоҷикон, равобити фарҳангии онҳо бо халқҳои ҷаҳон ва нақши фарҳанги эронитаборон дар таърих машғул буда, зиёда аз 30 китоб ва 500 мақолаи илмӣ таълиф намудааст. Аз осори муҳими ӯ метавон “Таърихи халқи тоҷик”, “Ду ҳазор соли таърихнигории тоҷикон”, “Тоҷик кист?” ва "Пантуркизм: дирӯз ва имрӯз”-ро ном бурд.

Як замон декани факултети журналистикаи ДМТ буд.

Соли 1952 – Мавлуди Назарбегим Муборакшоева, собиқ раиси шаҳри Хоруғ.

Соли 1993 – Меҳрубон Назаров, собиқ вазири фарҳанги Тоҷикистон, дар синни 70-солагӣ даргузашт.

Меҳрубон Назаров хатмкардаи Институти театрии ба номи А.Островскийи шаҳри Ленинград (ҳоло Санкт-Петербург) ва мактаби олии партиявии назди КМ ВКП шаҳри Маскав аст.

Ӯ солҳо дар рӯзномаи "Тоҷикистони сурх", Саридораи санъати Вазорати маданияти Тоҷикистони Шӯравӣ, ҷонишини якуми Вазири маданият, ҷонишини раиси Комитаи давлатӣ оид ба телевизион ва радиошунавонӣ, раиси Комитети давлатӣ оид ба киноматография, Вазири маданияти Тоҷикистони Шӯравӣ, ректори Донишкадаи давлатии санъати Тоҷикистон ба номи М. Турсунзода буд.

Ӯ беш аз 30 намоишнома, чун "Гунаҳкорони бегуноҳ", "Макр ва муҳаббат", "Қишлоқи тиллоӣ", "Калтакдорони сурх", "Тошбек ва Гулқурбон", "Шӯҳрати нек"-ро ба саҳна гузоштааст.

Меҳрубон Назаров асосгузори санъати театри касбии Афғонистон буд. Ӯ муаллифи пйесаҳои бисёрпардагии "Орзу", "Дасти дӯст", "Ҳалокати одат" ва як зумра пйесаҳои якпардагӣ ва чанд асари оммавӣ мебошад.

Ӯ дар баҳори соли 1993, дар сахтарин рӯзҳои ҷанги шаҳрвандии кишвар, дар синни 71-солагӣ даргузашт

Дар бораи кору пайкори Меҳрубон Назаров дар ин мақолаи “Азия-Плюс” шинос шавд: Меҳрубон Назаров, вазири фарҳанге, ки фарҳангро вазири Тоҷикистон кард: 8 бахше аз рӯзгори ӯ.

САНАҲОИ МУҲИМИ ҶАҲОНӢ

Имрӯз, рӯзи ихтирои телефон таҷлил мешавад. 7-уми марти соли 1876, олими амрикоӣ Александр Белл телефони ихтирокардаи худро патент кард. Як сол пас, ӯ нахустин ширкати телефонӣ – “Bell Telephone Company”-ро таъсис дод.

Рӯзи 7-уми марти 1912 Руал Амундсен, сайёҳи норвегӣ аз ҷазираи Тасмания расман эълон кард, ки ба Қутби Ҷанубӣ расидааст. Аслан, ӯ мехост ба Қутби Шимолӣ равад, аммо вақте Фредерик Кук ва Роберт Пири изҳор доштанд, ки онро кашф кардаанд, ӯ самти сафарро ба ҷониби Антарктида иваз кард. Рӯзи 14-уми декабри соли 1911 ӯ бо чаҳор ҳамсафар ба Қутби Ҷанубӣ расид. Танҳо дар моҳи марти 1912 гурӯҳи ӯ ба Тасмания баргашта, ҷаҳонро аз ин кашфиёти худ огоҳ карданд.

Дар ҳамин рӯзи соли 1960 дар Иттиҳоди Шӯравӣ нахустин гурӯҳи кайҳоннавардон таъсис ёфт. Ин гурӯҳ 12 халабони ҳарбиро дар бар мегирифт, ки аз рӯйи талаботи махсус интихоб шуда буданд. Синнашон то 35 сол, қадашон на бештар аз 175 см ва вазнашон то 75 кг буд. Ба ин гурӯҳ, кайҳоннавардони машҳур, мисли Юрий Гагарин, Алексей Леонов, Валерий Быковский, Владимир Комаров ва Герман Титов шомил буданд.

Як сол баъд, 12-уми  апрели соли 1961, Юрий Гагарин ҳамчун аввалин инсон ба кайҳон парвоз кард.

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: дар водиҳо рӯзона 11+16º гарм, дар ноҳияҳои кӯҳӣ рӯзона 2+7º гарм, дар водиҳо шабона 5+10º гарм, дар ноҳияҳои кӯҳӣ шабона -4+1º.

Дар вилояти Хатлон – Ҳавои тағйирёбанда, рӯзона бебориш дар назар буда, шабона дар баъзе ноҳияҳо тормеғ мефарояд. Ҳарорат: дар водиҳо рӯзона 18+23º гарм, дар доманакӯҳҳо рӯзона 12+17º гарм, дар водиҳо шабона 8+13º гарм, дар ноҳияҳои доманакӯҳӣ шабона 6+11º гарм.

Дар шаҳру ноҳияҳои тобеи ҷумҳурӣ – Ҳавои тағйирёбанда пешгӯӣ шуда, рӯзона бебориш дар назар буда, шабона дар баъзе ноҳияҳо тормеғ мефарояд. Ҳарорат: дар водиҳо рӯзона 15+20º гарм, дар ноҳияҳои кӯҳӣ шабона -1+4º, дар водиҳо шабона 4+9º гарм, дар ноҳияҳои кӯҳӣ шабона -2+3º.

Дар Вилояти Мухтори Кӯҳистони Бадахшон – Ҳавои тағйирёбанда пешгӯӣ шуда, дар баъзе ноҳияҳо борон ва барф меборад. Ҳарорат: дар ғарби вилоят рӯзона 8+13º гарм, дар шарқи вилоят рӯзона 1+6º гарм, дар ғарби вилоят шабона 1+6º гарм, дар шарқи вилоят шабона 2-7º сард.

Дар шаҳри Душанбе – Ҳавои тағйирёбанда пешгӯӣ шуда, рӯзона бебориш дар назар буда, тормеғ мефарояд. Ҳарорат: рӯзона 18+20º гарм, шабона 8+10º гарм.

Дар шаҳри Хуҷанд – Ҳавои тағйирёбандаи бебориш пешгӯӣ мешавад. Ҳарорат: рӯзона 14+16º гарм, шабона 6+8º гарм.

Дар шаҳри Бохтар – Ҳавои тағйирёбанда пешгӯӣ шуда, рӯзона бебориш дар назар аст. Ҳарорат: рӯзона 20+22º гарм, шабона 8+10º гарм.

Дар шаҳри Хоруғ – Ҳавои тағйирёбанда пешгӯӣ шуда, борони кӯтоҳмуддат меборад. Ҳарорат: рӯзона 8+10º гарм, шабона 2+4º гарм.

*Ҳарорати шабонаи ҳаво шаби 7 ба 8-уми март ба ҳисоб гирифта шудааст.

Дар Telegram, Facebook ва Instagram бо мо бимонед.

Дар пайи ҷанги Амрикову Исроил дар Эрон ва нооромиҳо дар Ховари Миёна, субҳи имрӯз, 6-уми март 117 шаҳрванди Тоҷикистон тариқи парвози чартерӣ аз шаҳри Дубайи Имороти Муттаҳидаи Арабӣ ба Душанбе омадаанд. 

Дар ин бора аз Вазорати корҳои хориҷии Тоҷикистон ба “Азия-Плюс” хабар дода, гуфтанд, ки ин парвоз дар ҳамкорӣ бо Сафорати Тоҷикистон дар Иморот, мақомоти маҳаллии ин кишвар ва ширкати “Fly Dubai” сурат гирифтааст.

Қаблан, шаби 5 ба 6-уми март ҳам 115 шаҳрванди Тоҷикистон тариқи хатсайри чартерӣ аз шаҳри Абу-Забии Имороти Муттаҳидаи Арабӣ ба Ватан омада буданд. Ин парвоз тариқи ҳавопаймот "Сомон Эйр" анҷом шуда буд.

Ҳамчунин, ин ширкати ҳавопаймоӣ рӯзи 8-уми март низ барои баргардонидани ҳамватанон аз Имороти Муттаҳидаи Арабӣ ба Тоҷикистон, парвози чартерӣ анҷом медиҳад. Нархи билет барои калонсолон 600 ва барои кӯдакон 400 доллар гуфта мешавад.

ВКХ Тоҷикистон рӯзи 4-уми март эълон кард, ки бо дастури ҳукумати кишвар, ширкати ҳавопаймоии “Сомон Эйр” дар ҳолати зарурӣ барои баргардонидани шаҳрвандон аз минтақаҳои ноором парвозҳои чартерӣ ташкил мекунад.

Вазорат гуфт, ки шаҳрвандоне, ки нияти ба Ватан баргаштанро тавассути ин парвозҳо доранд, метавонанд барои сабти ном ба Сафорат ва консулгариҳои Тоҷикистон дар кишварҳои дахлдор муроҷиат кунанд. Бо рақами телефони ширкати “Сомон Эйр” ва сафаорату консулгариҳои Тоҷикистон дар кишварҳои Ховари Миёна дар ин пайванд шинос шавед.

Ҳамчунин, дар назди ВКХ ситоди доимоамалкунанда таъсис ёфта, намояндагиҳои дипломатии кишвар дар Ховари Миёна ҳамарӯза ба ин ситод маълумот пешниҳод мекунанд.

Дар пайи ҳамлаи Амрикову Исроил ба Эрон ва посухи ин кишвар ба Исроил ва пойгоҳҳои Амрико дар Ховари Миёна, вазъ дар минтақа вахим шуда, даҳҳо ширкати ҳавопаймои парвозҳои худро ё бекор карданд ва ё ба рузи номаълумр гузоштанд. Ин сабаб шуд, ки садҳо мусофир, аз ҷумла шаҳрвандони Тоҷикистон натавонистанд ба кишварҳои худ баргарданд ва ҳоло дар меҳмонхонаҳо ва ё фурудугоҳҳои ин кишварҳо банд мондаанд.

Ҳоло маълум нест, ки чанд шаҳрванди Тоҷикистон дар ин минтақаҳо банд мондаанд ва талаби ба Тоҷикистон баргаштанро кардаанд.

Қаблан, ВКХ аз шаҳрвандон хоста буд, ки "то ба эътидол омадани вазъ аз сафар ба кишварҳои Ховари Миёна худдорӣ намоянд".

Зимнан, дар пайи нооромиҳо дар Ховари Миёна, чанд рӯз пеш, “Сомон Эйр” эълон карда буд, ки маҷбур аст, аз сабаби маҳдудиятҳои фазои ҳавоӣ дар ин минтақа парвозҳои худро дар масири Душанбе-Теҳрон то 31-уми март боздорад. Аз ин пештар гуфта бд, ки парвозҳояшро дар масири Душанбе-Дубай то 6-уми март бозмедорад.

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.

Бо ишора ба решаҳои таърихиву фарҳангӣ ва тамаддуниву забонӣ, ҷанг дар Эрон шаҳрвандони Тоҷикистон, махсусан сиёсатмадорону аҳли зиёи кишварро бетараф нагузошт. Чанде аз онҳо, дирӯз, 5-уми март ба Сафорати Эрон дар Душанбе, ки дар пайи кушта шудани Алии Хоманаӣ, раҳбари олии Эрон ва чанде аз мақомдорону даҳҳо шаҳрвандони ин кишвар дафтари ёдбуд боз шуда буд, омаданд ва ҳамдардии худро ба мардуми ин кишвар баён карданд.

“Азия-Плюс” аз ин маросим гузориш омода кард ва аз чанде аз чеҳраҳои сиёсату илму адаб, ки дар ин ҳамоиш ширкат доштанд, назарашонро дар бораи вазъ дар Эрон пурсид.

Миёнаи бастаи мӯйсафед ва ашки зане бо акси Хоманаӣ

Ба маросими ёдбуд дар сафорати Эрон, мансабдорони баландпояи тоҷик, намояндагони дипломатии кишварҳои хориҷӣ, аҳли илму адабу фарҳанг ва шумори зиёди шаҳрвандони Тоҷикистон омаданд. Аз ҷумла, бо намояндагӣ аз ҳукумати Тоҷикистон, Қоҳир Расулзода, сарвазири кишвар ба Сафорати Эрон  омад ва ба сафир ва мардуми Эрон изҳори ҳамдардӣ кард.

Инчунин, мансабдорони дигари тоҷик, ба мисли муовини вазири корҳои хориҷӣ, намояндаи Вазорати корҳои дохилӣ ва парлумони Тоҷикистон, раисони Иттифоқи нависандагон ва Осорхонаи миллии Тоҷикистон ва муфтии кишвар ба ин маросим рафта, ба мардуми Эрон изҳори ҳамдардӣ баён карданд.

Дар давоми рӯз, ҳамчунин, академикон ва олимон, рӯзноманигорон, нависандагон ва фарҳангиёни кишвар ба ин маросим омаданд. Даҳҳо шаҳрванди Тоҷикистон ба сафорат омада, дар дастари ёдбуд ҳамдардии худро нигоштанд. Мӯйсафеде бо нишони мотам миёнашро баста буд, зане дар даст сурати роҳбари олии Эрон ашк мерехт.

Теъдоди зиёди эрониёни муқими Тоҷикистон ҳам дар маросим дида шуданд, ки либоси сиёҳ пӯшидаву гиря мекарданд. Мусаввараи бузурги бо гул оростаи Алии Хоманаӣ, ки бо нишони қурбонӣ шуданаш дар гӯшае хати сиёҳ дошт, дар маркази маросими ёдбуд қарор дошт. Садои қироати “Қуръон” фазоро пахш карда буд.

Чанде аз сафирон ва дипломатҳои кишварҳои хориҷӣ, ба мисли сафирони Туркия, Русия, Белорус, Қазоқистон ва Афғонистон низ барои изҳори ҳамдардӣ ба сафорат ҳозир шуданд.

Дар ҷараёни маросим, “Азия-Плюс” назари бархе чеҳраҳои сиёсиву адабии тоҷикро дар мавриди ҷанги Амрикову Исроил алайҳи Эрон ва мавқеи онҳо нисбат ба ин таҳаввулот пурсид.

Фоҷиаи ниҳоят сангину дарди муштарак

Абдуҷаббор Раҳмонзода, сиёсатмадор ва дипломати собиқ, ҳаводиси Эронро “фоҷиаи ниҳоят сангину вазнин” номида, гуфт, ки ҳама чизе ки дар ин кишвар мегузарад, мусибати муштараки ҳар як ҳамфарҳангу ҳамзабон аст.

Раҳмонзода ҳузури сарвазир ва дигар мансабдорони тоҷик дар ин маросимро аз нуқтаи назари дипломатӣ хеле муҳим донист ва гуфт, “агар мо, ки ҳамфарҳанг, ҳамзабон, ҳамнажод ва ҳамхун бо ин мардум ҳастем, дар ин шабу рӯз ҳамроҳ набошем, моро хуб намефаҳманд”.

“Барои кишвари мисли Тоҷикистон, ки вазнинию сангинии низоъҳои шаҳрвандиро аз сар гузаронда ва талафоти зиёде додааст, барои мардуми тоҷик, барои тамоми Ҳукумати Тоҷикистон ин, албатта, як фоҷиаи вазнин аст, чунки ҳамзабонону ҳамфарҳангони мо талафот дода истодаанд”, – гуфт ин сиёсатмадори тоҷик.

Ӯ пас аз изҳори ҳамдардӣ ба мардуми Эрон таъкид дошт, “мо боварӣ дорем, ки на танҳо ин мушкилоту фоҷиа пушти сар мешавад, балки дар оянда боз ҳам ҳамкориҳои ҳасана миёни ду кишвар беш аз пеш сурат мегиранд”.

“Эрони бузург ҳатман пирӯз хоҳад шуд”

Низом Қосим, раиси Иттифоқи нависандагон ва узви палатаи болоии парлумони Тоҷикистон, дар суҳбат бо мо гуфт, ки “Тоҷикистону Эрон аз қадимулайём мисли ду ҷисму як ҷон ҳастанд ва ин ҳамдаму ҳамғаму ҳамнишотӣ дар замони истиқлолияти Тоҷикистон беш аз пеш афзуд. Мо ҳар пешрафти Эронро пешрафти худ меҳисобем ва ҳар нокомии Эронро нокомии худ медонем”.

Ӯ ҳамлаи Амрикову Исроилро бо сароҳат маҳкум карда, афзуд “аз ин таҳоҷуми номардонаи гурӯҳи кафторҳо ба Эрони бузург бисёр нохуш ҳастем ва аз дилу ҷон пирӯзии Эронро мехоҳем”.

Низом Қосим ба унвони ҳамқаламони эронии худ гуфт, “мо дар ин лаҳзаҳои душвор бо онҳо ҳастем. Бори дигар осори онҳоро ба ёд меорем, муҳаббати онҳоро ба кишвари бузургашон, ба фарҳанги муштаракамон ба ёд меорем ва ҳамаи ин ба мо бовар мебахшад, ки Эрони бузург ҳатман пирӯз хоҳад шуд”.

Раиси Иттифоқи нависандагон дар бораи пайванди ду кишвар сухан гуфта, маҳаки ин пайвандро дар забони муштарак номид: “то забони тоҷикӣ, забони форсӣ ҳаст, Эрон побарҷо хоҳад буд, Тоҷикистон побарҷо хоҳад буд ва дӯстии мо, пайванди мо побарҷо хоҳад буд”.

Ба гуфтаи Низом Қосим, ин гуна ҷангҳо ба равобити адабии ду кишвар таъсири манфӣ нахоҳад расонд ва дер нест, ки он бо пирӯзии Эрон хотима ёбад.

“Ҷанг аслан хасми ҳама гуна ҳамкориҳои фарҳангӣ, хасми ҳама гуна созандагию бунёдкориҳост. Ва барои ҳамин ҳам инсони соҳибақл аз қадимулайём муқобили ҷанг аст, муқобили хунрезӣ аст, муқобили истилову таҷовуз аст. Мо ин ҳама корҳоеро, ки имрӯз Амрико, Исроил, дигар кишварҳои беандеша анҷом медиҳанд, маҳкум мекунем. Умед дорем, ки Эрони азиз дар ин росто пойдор мемонад, барқарор мемонад ва бар ҳама душманиҳо, бар ҳама бадхоҳиҳои хасмон пирӯз мешавад”, – гуфт ҳамсӯҳбати мо.

“Сарнавишти Эронро бояд худи мардуми Эрон ҳал кунад”

Академик Кароматулло Олимов ба адибон ва фарҳангиёни Тоҷикистон паём дод ва аз онҳо хост, ки дар ин рӯзҳои сангин бо ҳамзабонони эронии худ ҳамдард бошанд.

“Дар ин рӯзҳо, ки воқеан барои Ҷумҳурии Исломии Эрон ва мардуми шарифу ҳамзабону ҳамфарҳанги мо рӯзҳои сангин аст, аввалан ман сабр орзу мекунам. Дигар ин ки, ин кушторҳое, ки ноодилона, ноҷавонмардона сурат гирифтааст, воқеан изтироби мову тамоми аҳли ҷаҳонро ба вуҷуд овардааст”, – гуфт ҳамсӯҳбати мо.

Олимов ин ҳамларо хилофи қонун ва меъёрҳои Созмони Милали Муттаҳид арзёбӣ карда, таъкид дошт, ки “ин кор зидди тамоми башарият аст”

Ӯ аҳли фарҳанг ва илму адаби Эронро ҳамчун меросбарони тамаддуни бузурги муштараки Тоҷикистону Эрон номида, гуфт, ки “мардуми Эрон ҳарчанд бисёр мушкил аст, вале бояд мубориза баранд”.

Дар мавриди таъсири ҷанг ба ҳамкориҳои илмию академии ду кишвар Олимов ба воқеъбинӣ иқрор шуд, ки рафтуомадҳои мустақим феълан имконнопазир аст, аммо бо итминон гуфт, ки ҳамкориҳои муштарак дар ин самт қатъ нахоҳад шуд.

Ӯ бо қатъият гуфт, ки “бояд сарнавишти Эронро худи мардуми Эрон ҳал бикунад”.

Таърихчаи ҳамлаи Амрикову Исроил ба Эрон

Рӯзи шанбеи 28-уми феврал Амрико ва Исроил амалиёти муштараке оғоз карда, ба шаҳрҳои Теҳрон, Исфаҳон, Қум, Караҷ ва Кирмоншоҳ – шаҳрҳои муҳими Эрон ҳамла карданд.

Артиши Эрон дар посух ба ин ҳамлаҳо ба Исроил ва пойгоҳҳои Амрико дар кишварҳои арабӣ зарба зад. Раисҷумҳури Амрико ва сарвазири Исроил дар изҳоротҳои худ ошкоро изҳор доштанд, ки ҳадафи ҷанг сарнагунсозии низоми ҷорӣ дар Эрон аст. Ҷумҳурии Исломӣ дар посух таъкид кард, ки ба ҳар гуна таҷовуз посухи сазовор ва қотеъ хоҳад дод. Ҳоло ҳамлаҳои тарафҳо идома доранд. Вазъият печида ва ташвишовар боқӣ мемонад.

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.