Душанбе. 17-уми феврал. ОИ «Азия-Плюс» – Муовини директори Маркази тадқиқотии назди президенти Тоҷикистон Сайфулло Сафаров бар чунин назар аст, ки шояд Тоҷикистону Ӯзбекистон марҳилаи тозаи роҳандозии муносиботи дуҷонибаро пеш гиранд.

Ақидаи худро коршинос ба суханронии сарвари давлат дар Брюссел нисбат медиҳад ва мегӯяд, он ҷо Э.Раҳмон изҳор дошт, ки дар ниҳояти кор масоили баҳсталаби минтақа бо кишварҳои ҳамсоя роҳи ҳалли худро пайдо хоҳанд намуд.

Ба гуфтаи коршиноси масоили сиёсӣ, ташаннуҷи вазъ миёни кишварҳои ҳамҷавор ба манфиати ҷонибҳо нест ва «мо бояд ҳамсоягони хуб бошем, зеро агар мо чунин воқеиятро дарк насозем, ин вазъро дигарон алайҳи мо истифода хоҳанд бурд». «Эҳтиром гузоштан ба манфиатҳои миллии ҳамдигар – омили аслии беҳбуди муносиботи дуҷониба мебошад ва мантиқи рушди сиёсии минтақа гувоҳи он аст, ки мо бидуни ҳамдигар ба таъмини рушд муваффақ нахоҳем гашт», – гуфт ӯ.

С.Сафаров мӯътқид аст, ки раҳбарияти сиёсии давлатҳо аз ин ба хубӣ огаҳанд. «Зарур аст, то ҷомеаи коршиносон низ тарзи бархӯрди хешро ба муносиботи дуҷониба миёни кишварҳо тағйир бидиҳанд», – афзуд коршинос.

           

Душанбе. 17-уми феврал. ОИ «Азия-Плюс» – Дар ҷараёни баргузории амалиёти вижа дар марзи Афғонистону Тоҷикистон миёни марзбонон ва қочоқчиёни афғон задухӯрди мусаллаҳона ба вуқӯъ пайваст, ки дар натиҷа шаш қочоқчии афғон ба ҳалокат расид.

           

Тавре сардори маркази матбуоти Сарраёсати нерӯҳои марзбонии Кумитаи давлатии амияти миллии ҶТ Хушнуд Раҳматуллоев ба ОИ «Азия-Плюс» хабар дод, дар амалиёт марзбонон беш аз 300 кило маводи мухаддири гуногун, 4 адад автомати Калашников, 15 тирдон ва беш аз 450 тирро мусодира намуданд.

 

«Феълан қаламрави наздик ба ҷойи ҳодиса таҳти назорат қарор гирифта, афроди дигари ба ин ҷиноят дастдошта ҷустуҷӯ карда мешаванд», – афзуд Х.Раҳматуллоев.

Душанбе. 17-уми феврал. ОИ «Азия-Плюс» – Аз ҷониби Раёсати Комиссариати СММ оид ба умури гурезагон ба Китобхонаи миллии ба номи Абулқосим Фирдавсӣ адабиёти соҳаи ҳуқуқшиносӣ тақдим карда шуд.

Тавре аз китобхонаи мазкур ба ОИ «Азия-Плюс» хабар доданд, акнун фонди китобхона боз бо 300 нусха номгӯи китоб ғанитар шуд.

Ба иттилои манбаъ, дар китобҳои воридгашта мавзӯъҳои ҳуқуқи инсон, гурезагон ва дигар масоили ҳуқуқӣ матраҳ гардидаанд. «Аз ин ба баъд дар китобхона феҳристи вижаи адабиёти марбут ба соҳаи ҳуқуқшиносӣ ташкил мегардад», – афзуд манбаъ.

           

Душанбе. 16-уми феврал. ОИ «Азия-Плюс» – Ҳаҷми даромади КВД «Роҳи оҳани Тоҷикистон» дар муқоиса ба ҳамин давраи соли гузашта ба андозаи 8 млн. сомонӣ коҳиш ёфт.

           

Тавре аз хадамоти матбуоти вазорати нақлиёт ва коммуникатсияи ҷумҳурӣ ба ОИ «Азия-Плюс» хабар доданд, кам шудани шумори мусофирон ба хатсайрҳои байнулмилалӣ ба чунин вазъ боис гаштааст. «Шумори мусофирон нисбат ба 40 рӯзи соли гузашта ба миқдори 9 ҳазору 154 нафар кам гашта, даромади вагон-тарабхонаҳо низ ба андозаи 30 дарсад коҳиш ёфт», – гуфт манбаъ.

           

Ба итилои манбаъ, агар вазъ ба чунин мааром идома ёбад, то ахири сол коҳиш ёфтани даромади корхона нисбат ба соли гузашта ба миқдори 200 млн. сомонӣ аз эҳтимол дур нест.

Душанбе 16-уми феврал. ОИ «Азия-Плюс» — IFC (Корпоратсияи Байналхалқии Молиявӣ), узви гурӯҳи ташкилотҳои Бонки умумиҷаҳонӣ, бо ҶСК «Суғдагросерв» (САС) баҳри беҳтар кардани идоракунии корпоративии ширкати мазкур ҳамкорӣ карда истодааст. САС аввалин ширкатест, ки барои татбиқи Лоиҳаи IFC оид ба идоракунии корпоративӣ дар Осиёи Марказӣ бо IFC дар Тоҷикистон ҳамкорӣ карда истодааст. Иштирок дар барномаи IFC ба САС имкон медиҳад, ки бештар инвеститсия ҷалб намояд ва самараи афзалиятҳои идоракунии корпоративии самаранокро

 

ба тамоми ҷомеаи соҳибкорони тоҷик, хусусан дар соҳаи кишоварзӣ нишон диҳад.

Тавре аз корпоратсияи мазкур ба ОИ «Азия-Плюс» хабар доданд, соҳаи кишоварзӣ сарчашмаи асосии даромади бисёрии мардуми Тоҷикистон мебошад, ки бештар аз 60 фоизи аҳолӣ дар ин соҳа фаъолият мекунад. Бо вуҷуди ин, таҷҳизот ва таҷрибаи идоракунӣ мувофиқи замона нест ва маблағгузорӣ, ки ба кишоварзон барои навоварӣ ва васеъ кардани кардани фаъолияташон ниҳоят зарур аст, хело маҳдуд аст. САС ҷамъияти саҳҳомиест, ки тамоми саҳмияҳои он ба кишоварзон тааллуқ дорад. Ширкат ба кишоварзон, истеҳсолкунандагон ва ширкатҳои коркарди пахтаву дигар маҳсулот дар соҳаи кишоварзӣ хизмати молиявӣ, маркетинг, фурӯши чакана ва дигар намуди хизматҳоро мерасонад. САС пеш аз ҳама дар ҷойҳои деҳоти Тоҷикистон фаъолият мекунад ва дар баланд бардоштани сатҳи даромади кишоварзони маҳаллӣ тавассути фароҳам овардани имконият ба истеҳсоли мустақилона ва фаъолияти хоҷагиҳои тиҷоратӣ кӯмак мерасонад.

 

Дар чорчӯбаи лоиха IFC таҷрибаи ҷории идоракунии корпоративии САС-ро арзёбӣ мекунад, инчунин ба саҳҳомону кормандони он маслиҳат медиҳад ва омӯзишҳо мегузаронад. IFC инчунин дар дигаргун сохтани сохтор ва фаъолияти шӯрои директорон ва кумитаи иҷроия ва ба стандартҳои байналхалқӣ мутобиқ намудани оинномаи ширкат кӯмак мерасонад.

  

«Бӯҳрони молиявӣ дар тамоми соҳаҳо дар миқёси Тоҷикистон ҳис карда шуда истодааст ва машварати коршиносони IFC

 

дар ин ҷода ниҳоят саривақтӣ ва зарур мебошад. Тавассути беҳтар намудани идоракунии корпоративии ширкат мо барои ҷалб намудани инвеститсия ва васеъ намудани фаъолияти худ

 

имконияти бештар пайдо мекунем, ки ба шарофати он метавонем ба ҷомеа ва саҳҳомони худ барои расонидани

 

хизматрасонии баландсифат кӯмак расонем», – мегӯяд Директори иҷроияи САС Абдусаттор Ҳайдаров.

Аз соли 2006 инҷониб IFC барои беҳтар кардани идоракунии корпоративии ширкатҳо ва бонкҳо дар миқёси Осиёи Марказӣ кор карда, ба онҳо барои рушди фаъолият ва тавоноиашон дар ҷалби инвеститсия кӯмак расонида истодааст.