Душанбе. 17-уми феврал. ОИ «Азия-Плюс» – Пагоҳ дар шаҳри Душанбе гузориши натиҷаҳои лоиҳаи минтақавии «Мубориза бо шиканҷа дар Осиёи Марказӣ» муаррифӣ мегардад.
Тавре ҳамоҳангсози лоиҳа Сергей Романов ба ОИ «Азия-Плюс» хабар дод, лоиҳа дар давоми солҳои 2007-2009 аз ҷониби Иттиҳодияи ҷамъиятии «Дафтар оид ба дифоъ аз ҳуқуқи инсон ва риояи қонуният» бо дастгирии Комиссияи Аврупо татбиқ гардид.
Ба гуфтаи ӯ, дар доираи муаррифиномаи гузориш ба ҳозирин перомуни тағйироти рухдода дар ин самт тайи ду соли ахир, фаъолияти мақомоти давлатӣ ва ҳуқуқшиносон оид ба барҳам додани шиканҷа ва фаъолияти рӯзноманигорон дар инъикоси мушкилоти марбут ба истифодаи шиканҷа маълумот пешниҳод хоҳад гардид.
«Дар бораи натиҷаҳои гузориш ҳамоҳангсози минтақавӣ, директори фонди «Садои озодӣ» (Қирғизистон) Сардор Бакишбеков маърӯза намуда, ҳуқуқшиносон ва рӯзноманигорон атрофи ин масъала ибрози назар хоҳанд кард», – афзуд С.Романов.
