Душанбе. 4-уми сентябр. ОИ «Азия-Плюс» – Ширкати «Tethys Petroleum Limited» ояндаи наздик ният дорад, дар майдонҳои нафту газдори Тоҷикистон корҳои тадқиқотии ба заминларза тобовар будан

 

ва дигар корҳои иктишофиро шурӯъ намояд. Президенти ширкат Девид Робсон ба мухбири ОИ «Азия-Плюс» изҳор дошт, ки ширкат барои гузаронидани корҳо иктишофиву ҷустуҷӯӣ дар 56 майдонҳои нафтугаздори ҷумҳурӣ иҷозатнома гирифтааст.

Тибқи созишномаи имзошуда миёни ширкат ва вазорати энергетикаву саноати Тоҷикистон, ширкат на танҳо ба иктишофу ҷустуҷӯи конҳо ва истихроҷи нафту газ машғул мешавад, балки ҳамчунин конҳои кӯҳнаро низ таъмиру таҷдид хоҳад кард.

Д.Робсон иттилоъ дод, ки рӯзҳои наздик ба Тоҷикистон тамоми таҷҳизоти зарурӣ оварда мешавад. «Буҷаи таҳқиқотӣ ва барқарорсозии конҳо барои 12 моҳи минбаъда 20 млн. доллари амрикоиро ташкил медиҳад», – гуфт президенти ширкат.

Номбурда зикр кард, ки то ахири сол ширкат таъмини як ноҳияи Тоҷикистонро бо газ дар нақша дорад. «Айни замон ширкати байнулмилалии «Tethys Petroleum Limited» дар якчанд самт фаъолият дорад ва яке аз онҳо қисман ҳал кардани мушкилоти таъмини Тоҷикистон бо нафту газ дар фасли сармо аст», – гуфт Д.Робсон ва афзуд, ки айни замон дар ду кон – кони Комсомол дар наздикии шаҳри Душанбе ва кон дар минтақаи Кӯлоб тарзҳои зудтару осонтари коркарду истихроҷи газро меомӯзанд ва шояд истеҳсоли он дар як вақт дар ду кон оғоз гардад.

Дар шарҳи гуфтори президенти Русия Д.Медведев оид ба дар муддати 2-2,5 сол бо гази худӣ таъмин гардидани Тоҷикистон, президенти ширкат изҳор дошт, ки «ба ин ноил гаштан мумкин аст, вале танҳо пас аз 3-4 сол».

Д.Робсон мегӯяд, ки рақобатро дар бозори истеҳсоли газ дар Тоҷикистон хуш мепазирад. «Агар дар як кишвар якчанд ширкатҳо кор кунанд, ин хеле хуб аст, зеро бо ҳамдигар метавон табодули таҷрибаву афкор намуд, – гуфт ӯ. – Агар ширкати «Газпром» ба дарёфти коне муваффақ гардад, пас мо ҳам боварӣ ҳосил хоҳем кард, ки кӯшишамон барабас нахоҳад буд».

Реклама на asia+

Душанбе. 4-уми сентябр. ОИ «Азия-Плюс» – Дар ҷаласаи Шӯрои Кумитаи назоратии лоиҳаи «Рушди тиҷорат дар Тоҷикистон», ки пагоҳ дар шаҳри Душанбе доир мегардад, масоили содироти маҳсулоти меваю сабзавот баррасӣ мешаванд.

Мушовири миллӣ оид ба масоили робита бо ҷомеаи лоиҳа Абдулфаттоҳ Шафиев ба мухбири ОИ «Азия-Плюс» изҳор дошт, ки дар ҷаласа масоили марбут ба фаъолияти лоиҳа, мушкилот ва монеъаҳои бахши коркарди меваву сабзавот, содироти он ба хориҷи кишвар, дастовардҳои соҳа ва роҳҳои вусъат бахшидани фаъолияти он муҳокима хоҳанд шуд.

Ба ҳайати Кумита намояндагони вазорати рушди иқтисод ва савдои ҷумҳурӣ, вазорати кишоварзӣ, Агентии стандартикунонӣ, метрология, гувоҳномадиҳӣ ва нозироти андоз, Дафтари ҳамкории Швейтсария, Маркази байнулмилалии тиҷорат ва бахши хусусӣ шомил мебошанд.

Реклама на asia+

Душанбе. 4-уми сентябр. ОИ «Азия-Плюс» – Дар Душанбе перомуни дар фасли тобистон интиқол додани нерӯи барқи зиёдатӣ аз Тоҷикистон ба Афғонистон тавофуқ ҳосил шуд. Дар иттилоияи Бонки рушди Осиё гуфта мешавад, ки созишномаи харидории нерӯи барқ дар чаҳорчӯбаи лоиҳаи минтақавии мутттаҳидсозии хатҳои интиқоли барқ, ки соли 2006 аз ҷониби бонк маъқул шуморида шуда буд, 29-уми августи соли ҷорӣ дар шаҳри Душанбе ба имзо расид. Зери санад раиси ширкати саҳомии холдинги кушодаи «Барқи тоҷик» Шарифхон Самиев ва президенти ширкати энергетикии


DABM


-и Афғонистон Ғулом Раббонӣ имзо гузоштанд.

 

Тибқи маълумоти Бонки рушди Осиё, дар чаҳорчӯбаи амалисозии лоиҳаи мазкур хати интиқоли барқи ду силсиладори 220 кВ сохта мешавад, ки нерӯгоҳҳои дарёи Вахшро бо шаҳри наздисарҳадии Шерхон Бандар ва сипас шаҳрҳои Қундуз, Баглад, Пули Хумрӣ ва Кобули Афғонистон мепайвандад.

Лоиҳа ҳамчунин барои таҷдиди низоми мавҷудаи соҳаи энергетика дар Тоҷикистон ҷудо кардани маблағҳоро пешбинӣ менамояд, ки он имкон медиҳад дар фасли зимистон норасоии барқ коҳиш дода шуда, аз ҳисоби афзоиши истеҳсол ва коҳиши талафоти техникии нерӯи барқ боз 320 гигаватт/соат нерӯи барқи иловагӣ дар як сол тавлид гардад.

Сармутахассиси бонк оид ба энергетика Ҷим Листон изҳор доштааст, ки лоиҳа таъмини барқро дар кишварҳо беҳбуд бахшида, арзиши онро барои истеъмолгарон камтар мекунад ва ба Тоҷикистон имкон фароҳам меорад, ки дар фасли гармо то 300 мегаватт нерӯи барқи иловагиро ба хориҷи кишвар интиқол диҳад.

Фоидаи умумии иқтисодии ҳамкории минтақавӣ аз амалисозии лоиҳа 114 млн. доллари амрикоиро ташкил медиҳад, ки миёни кишварҳо баробар тақсим хоҳад гардид.

Аз воситаҳои имтиёзноки Бонки рушди Осиё ба Тоҷикистон 21,5 млн. ва Афғонистон 35 млн. доллари амрикоӣ ба муддати 32 сол қарз ихтисос дода мешавад. Давраи имтиёзноки қарз 8 сол буда, пардохти фоизи қарз дар давраи имтиёзнок 1 дарсад ва дар давраи боқимонда 1,5 дарсадро ташкил медиҳад.

Маблағи умумии лоиҳа ба 109, 5 млн. доллари амрикоӣ баробар аст. Ба лоиҳа ҳамчунин Фонди кишварҳои нафтрасон (ОПЕК), Бонки исломии рушд, Фонди трастии бозсозии Афғонистон ва ҳукуматҳои Тоҷикистону Афғонистон низ маблағгузорӣ менамоянд.

Ширкати «Барқи тоҷик» ва Вазорати энергетика ва захираҳои обии Афғонистон дар ин лоиҳа агентиҳои иҷрокунанда маҳсуб мешаванд.

Маълумотнома:



Дафтари кории Бонки рушди Осиё дар шаҳри Манила ҷойгир шуда, самти афзалиятноки фаъолияти он тавассути рушди ҳамаҷонибаи иқтисод, тавсеъаи босуботи экологӣ ва ҳамгиройии минтақавӣ коҳиш додани сатҳи камбизоатӣ дар минтақаи Осиё ва Уқёнуси Ором мебошад. Айни замон дар 67 кишварҳои дунё шӯъбаҳои бонк фаъолият доранд, ки 48-то аз ин шӯъбаҳо дар кишварҳои минтақа ҷойгиранд. Соли 2007 Бонки рушди Осиё ба маблағи умумии 10,1 млрд. доллари амрикоӣ пешиҳоди қарзҳо, ба маблағи 673 млн. доллари амрикоӣ додани бурсҳо ва ба маблағи 243 млн. доллари амрикоӣ расонидани кӯмаки техникиро маъқул шуморид.

Реклама на asia+

Душанбе. 3-юми сентябр – Баъд аз тасмими Гурҷистон дар бораи қатъи муносиботи дипломатӣ бо Русия имрӯз Русия сафоратхонаи худро дар Тифлис баст.

Александр Савонов-сухангӯи сафорат ба хабаргузории Франс Пресс гуфтааст, консулгарии Русия низ бо дастури Маскав баста шудааст.

Рӯзи сешанбе Гурҷистон ба таври расмӣ эълон кард, ки баъд аз шинохти ҷумҳуриҳои ҷудоихоҳи Абхозистон ва Осетиёи Ҷанубии Гурҷистон аз сӯи Русия Гурҷистон муносиботи дипломатиашро бо Руссия қатъ мекунад. Аммо вазорати хориҷаи Гурҷистон мегӯяд, фаъолияти консулгариашро идома медиҳад, то ба садҳо ҳазор гурҷии муқими Русия кӯмак кунад.

Реклама на asia+