Дирӯз, 9-уми январ бо қарори ҳукумат як муовини вазири корҳои дохилии Тоҷикистон ба нафақа гусел карда шуда, ба ҷои ӯ нафари нав таъин шуд. Ҳамчунин, дар мувофиқа бо Эмомалӣ Раҳмон, раисҷумҳури Тоҷикистон сардорони чанд раёсати дастгоҳи ВКД ва шӯъбаҳои ин ниҳод дар бархе аз шаҳру навоҳӣ нав шуданд.

Аз ҷумла бо қарори ҳукумат, полковники милитсия, Баҳодур Холиқзода муовини вазири корҳои дохилии Тоҷикистон таъин гардида, дар ин вазифа Акбар Насимзодаро иваз кард. Сабаби аз вазифа озод шудани Акбар Насимзода “ба нафақа баромадан”-и ӯ гуфта мешавад.

Баҳодур Холиқзода то кунун сардори милитсияи ноҳияҳои минтақаи Кӯлоб буд.

Сомонаи ВКД хабар медиҳад, ки ба ҷои Холиқзода, полковники милитсия, Субҳон Мирализода сардори пулиси ноҳияҳои минтақаи Кӯлоб ва ҳамчунин, муовини сардори РВКД дар Хатлон таъин шудааст. Ӯ дар гузашта сардори ШВКД дар Ворух ва пештар дар шаҳри Кӯлоб будааст.

Ҳамчунин, генерал-майори милитсия Ҷамшед Машрабзода роҳбари Дастгоҳи вазири корҳои дохилӣ таъин гардид. Ӯ 48-сола буда, то дирӯз сардори Раёсати амнияти дохилии ВКД буд. Вай дар гузашта низ солҳои 2017-2019 роҳбари дастгоҳи вазири корҳои дохилӣ ва пештар аз он директори Бюрои миллии марказии “Интерпол”-и ин ниҳод будааст.

ИЗОБРАЖЕНИЕ Ҷамшед Машрабзода

Полковники милитсия, Фирӯз Одиназода ба ҷойи Машрабзода сардори Раёсати амнияти дохилии ВКД шуд. Ӯ аз моҳи апрели соли 2025 сардори Шуъбаи ВКД дар шаҳри Ваҳдат таъин буд.

Ҳамчунин, полковники милитсия Абдуҷаббор Сатторзода ба курсии сардори Раёсати мубориза бар зидди гардиши ғайриқонунии маводи мухаддири ВКД такя задааст.

Полковники милитсия Бахтиёр Вайсзода сардори нави воҳиди махсуси Вазорати корҳои дохилии Тоҷикистон оид ба таъмини бехатарии ҷамъиятӣ дар самтҳои ҳаракати сарвари давлат ва меҳмонони олиқадр таъин шуд. Ӯ то ин замон муовини якуми сардори Раёсати давлатии бозрасии автомобилии ВКД буд. Қаблан, Рустам  Мирзомуродзода сардори ин воҳиди махсуси ВКД буд.

ИЗОБРАЖЕНИЕ Бахтиёр Вайсзода

Ҳамчунин, полковники милитсия Авазхон Қурбонзода сардори Муассисаи нақлиётии ВКД шудааст. Маълум нест, ки ӯ қаблан дар кадом вазифа буд. Қаблан, роҳбари Муасиссаи найқлиётии ВКД Раҳмонзода Саиднахш буд.

Ҳамчунин, полковники милитсия Азам Толеҳзода ҳамоҳангсози миллӣ оид ба ислоҳоти милитсияи Вазорати корҳои дохилӣ таъин гардид. Ӯ пештар аз ин муовини сардори Раёсати корҳои дохилии ВМКБ буд. Қаблан, генерал-майори милитсия Сафиало Азизуло ҳамоҳангсози миллӣ оид ба ислоҳоти милитсияи ВКД буд.

Подполковники милитсия Тоҷиддин Нуриддинзода бошад ба курсии сардори Бюрои миллии марказии “Интерпол” ВКД нишаст. Маълум нест, ки ӯ пештар чӣ вазифа дошт. То ин вақт Камол Содиқзода сардори Бюрои миллии марказии "Интерпол" буд. Маълум нест, ки ӯ ба чӣ вазифа таъин шудааст.

ИЗОБРАЖЕНИЕ

Боз киҳо чӣ вазифа гирифтанд?

Ҳамчунин, сардорони раёсат ва шуъбаҳои ВКД дар бархе шаҳру навоҳии кишвар низ нав шуданд:

– генерал-майори милитсия Алимардон Маҳмадзода, сардори Шӯъбаи ВКД дар ноҳияи Абдураҳмони Ҷомӣ;

– полковники милитсия Тоҷиддин Саидзода, сардори Шӯъбаи ВКД дар шаҳри Кӯлоб;

– полковники милитсия Баҳром Шарифзода, сардори Шӯъбаи ВКД дар ноҳияи Фархор;

– майори милитсия Фаридуни Маҳмад, сардори ШВКД дар ноҳияи Ховалинг;

ИЗОБРАЖЕНИЕ

– подполковники милитсия Саидҷаъфар Икромзода, сардори Шӯъбаи ВКД дар ноҳияи Темурмалик;

– подполковники милитсия Суҳроб Абдусамадзода, сардори Шӯъбаи ВКД дар ноҳияи Ҷалолуддини Балхӣ;

– подполковники милитсия Мансур Рамазонзода, сардори Шӯъбаи ВКД дар шаҳри Ваҳдат;

– подполковники милитсия Абдукибор Абдураҳмонзода, сардори Шӯъбаи ВКД-1 дар ноҳияи Рӯдакӣ;

– полковники милитсия Муҳаммадлоиқ Раҷабзода, сардори Шӯъбаи ВКД дар ноҳияи Файзобод;

– полковники милитсия Хуршед Раҳмонзода, сардори Шӯъбаи ВКД дар ноҳияи И.Сомонӣ;

– подполковники милитсия Нурзод Давлатзода, сардори ШВКД-1 дар ноҳияи Шоҳмансур;

– полковники милитсия Раҳматулло Каримӣ, сардори ШВКД дар шаҳри Хуҷанд;

– полковники милитсия Шӯҳрат Анварзода, сардори ШВКД-1 дар шаҳри Исфара;

– подполковники милитсия Исо Абдуллозода, сардори ШВКД-2 дар шаҳри Исфара;

– подполковники милитсия Ҳабибулло Аминзода, сардори Шӯъбаи ВКД оид ба хизматрасонии деҳоти “Ворух”-и шаҳри Исфара;

ИЗОБРАЖЕНИЕ

– подполковники милитсия Нурулло Сулаймонзода, сардори Шӯъбаи ВКД-1 дар ноҳияи Б.Ғафуров;

– подполковники милитсия Авазхон Азиззода, сардори Шӯъбаи ВКД дар ноҳияи  Ҷаббор Расулов;

– подполковники милитсия Умед Солизода, сардори Шӯъбаи ВКД дар шаҳри Бӯстон;

– полковники милитсия Давлатшоҳ Тағойзода, сардори Шӯъбаи ВКД дар ноҳияи Зафаробод;

– подполковники милитсия Бахтиёр Абдуллозода, сардори Шӯъбаи ВКД дар ноҳияи  Ашт;

– подполковники милитсия Абдурауф Ғаффорзода, сардори Шӯъбаи ВКД дар ноҳияи  Роштқалъаи ВМКБ;

– подполковники милитсия Ғолиб Пирмуҳаммадзода, сардори Шӯъбаи ВКД дар хатти фурудгоҳи шаҳри Душанбеи Раёсати Вазорати корҳои дохилии Ҷумҳурии Тоҷикистон дар нақлиёт дар нақлиёт;

– полковники милитсия Зафар Исмоилзода, сардори Шӯъбаи ВКД дар хатти истгоҳи роҳи оҳани Раёсати ВКД дар нақлиёт;

– майори милитсия Ҷамшед  Ҳакимзода, сардори Шӯъбаи ВКД дар нақлиётбудаи вилояти Суғди Раёсати ВКД дар нақлиёт.

Эмомалӣ Раҳмон дирӯз, ҳамаи онҳое, ки ба ин вазифаҳо таъин шуданд, ба ҳузур пазируфт ва кард, ки “содиқонаю бенуқсон” хидмат карда, “дар ҳама маврид манфиати давлат ва мардуми Тоҷикистон, зарурати таҳкими амну суботи кишвар ва таъмини зиндагии орому осудаи аҳолӣ бояд дар мадди аввал гузошта шавад”.

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани асари "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз кард. Дар нашри навбатӣ, қисми якуми ин асари таърихиро манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин, ҳикояҳои Антон Чехов, романи “Киштии Нӯҳ” ва маҷмӯи ҳикояҳои Юнус Юсуфиро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани асари таърихии "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ метавонед гӯш кунед.

Дар Telegram, Facebook ва Instagram бо мо бимонед.

Дар Тоҷикистон аз 1-уми феврали соли равон таърифаҳо (тарифҳо)-и истифодаи нерӯи барқ барои ҳамаи истеъмолгарони барқ, аз ҷумла аҳолӣ боло меравад. Аз ҷумла, арзиши истифодаи барқ барои аҳолӣ 17% қимат шуда, аз 35,36 дирами ҳозира ба 41,37 дирам барои 1 кВт/соат мерасад.

Тибқи қарори ҳукумати кишвар, ҳамчунин, сар аз 1-уми феврал бори аввал барои пур кардани барқи  электромобилҳо таърифаҳои махсус муайян мешавад. Минбаъд барои пур кардани ҳар 1 кВт/соат нерӯи барқи электромобилҳо нуқтаҳои пуркунандаи барқ 94,65 дирам пардохт мекунанд.

Ин миқдор маблағ барои нуқтаҳои барқпуркунии тиҷоратӣ ҳисоб шуда, дар он нақлиёти барқии мансуб ба ҳукумат, аз ҷумла автобусу тролейбусҳои барқӣ, ки моли ҳукумати шаҳру навоҳӣ бошад, инчунин барои "эҳтиёҷоти худи аҳолӣ" дохил намешавад.

Мақомот таъкид мекунанд, ки муайян кардани тарифи алоҳида барои нақлиёти барқӣ ба рушди инфрасохтори “сабз" ва танзими бозори нави хизматрасониҳо дар ин соҳа мусоидат хоҳад кард.

Ғайр аз ин, барои ширкати “Комбинати металлургии Тоҷикистон” акнун таърифаи ягона – барои ҳар 1 кВт/соат нерӯи барқ 24,30 дирам муқаррар шудааст. Қаблан нархи барқ барои ин корхона вобаста ба фасли сол (тобистон ва зимистон) тағйир меёфт, аммо ҳоло ин тафовут аз байн бардошта шуд.

Истеъмолгарони нерӯи барқ дар Тоҷикистон ба категория бо таърифаҳои гуногун тақсим мешаванд. Тибқи нархномаи нав онҳо аз 1-уми феврали соли 2026 барои 1 кВт/соат нерӯи барқ кӣ чӣ қадар маблағ месупораед, дар баргаҳои “Азия-Плюс” бубинед.

Ҳамзамон, аз 1-уми феврал таърифа барои истеҳсоли нерӯи барқ, ки аз ҷониби ҶСК “Барқи Тоҷик” ба ҶСК “Шабакаҳои тақсимоти барқ” интиқол дода мешавад – барои 1 кВт/соат 24,77 дирам ва барои интиқоли нерӯи барқ аз ҷониби ҶСК “Шабакаҳои интиқоли барқ” ба ҶСК “Шабакаҳои тақсимоти барқ” – барои 1 кВт/соат 4,55 дирам муайян шудааст.

Ин қарор “бо мақсади танзими фаъолияти инҳисороти табиӣ ва таъмини устувории низоми энергетикӣ” қабул шудааст.

Ҳамчунин, дар қарор зикр мешавад, ки агар оила дар як моҳ аз 10 ҳазор кВт/соат зиёд нерӯи барқ масраф кунад, маблағи зиёдатӣ на бо нархи маъмулии аҳолӣ, балки бо тарифи баланди саноатӣ – 94,65 дирам ҳисоб карда мешавад.

Қаблан, Эмомалӣ Раҳмон, расиҷумҳури Тоҷикистон дар маҷлиси ҳукумат супориш дода буд, ки тарифҳо (таърифаҳо)-и нави барқу гармӣ аз 1-уми феврали соли 2026 ҷорӣ карда шавад.

Дар Тоҷикистон бори охир моҳи апрели соли 2025 арзиши барқ зиёд карда шуд. Он вақт ҳар киловат-соат барои аҳолӣ аз 30,75 дирам ба 35,36 дирам боло бурда шуд.

Ёдовар мешавем, ки таърифаҳои нерӯи барқ то соли 2016 танҳо дар солҳои ҷуфт ва баъдан ҳамасола боло бурда шуданд.

Танҳо дар солҳои 2020-2021 ҳукумат тасмим гирифт, ки бинобар сабаби вазъияти душвори иҷтимоӣ-иқтисодии марбут ба оқибатҳои пандемия, аз боло бурдани нархҳо худдорӣ кунад.

Боло бурдани таърифаҳои истифодаи нерӯи барқ дар Тоҷикистон дар ҳолест, ки норасоии нерӯи барқ аз мушкилоти мубрами кишвар ба шумор меравад. Ҳар сол бо фарорасии сардиҳо дар навоҳии Тоҷикистон маҳдудияти интиқоли барқ ҷорӣ мешавад, вале сокинон шикоят мекунанд, ки аз соатҳои расман муқарраргардида камтар барқ мегиранд.

Дар Telegram, Facebook ва Instagram бо мо бимонед.

ЯК РӮЗИ ТАЪРИХ

Имрӯз дар Тоҷикистон Рӯзи кормандони Агентии назорати давлатии молиявӣ ва мубориза бо коррупсия таҷлил мегардад. Соли 2007 маҳз дар ҳамин рӯз ин Агентӣ таъсис ёфтааст. Аз соли 2017 инҷониб 10 январ ҳамчун иди касбии кормандони ин идора таҷлил мешавад.

Соли 1935 – Дар Тоҷикистон ноҳияи Регар таъсис дода шуд. Ин ноҳия 7-уми феврали соли 1978 расман ба ноҳияи Турсунзода тағйири ном кард ва дертар мақоми шаҳрро гирифт.

Соли 1965 – Фабрикаи қаннодии “Ширин” дар Душанбе расман ифтитоҳ гардид.

Соли 2001 – Тоҷикистон бо Фонди Кувайт оид ба ҷудо намудани 16,25 миллион доллар қарз барои сохтмони шоҳроҳи “Шкев-Зиғар” созишнома ба имзо расонид.

Соли 2003 – Саидбек Чолов, ки муовини сардори Раёсати гумруки шаҳри Душанбе буд, бо қарори додгоҳ ба 6 соли зиндон маҳкум гардид. Тибқи иттилои манбаъҳо, парвандаи ҷиноӣ нисбати ӯ бар асоси иттиҳомоти марбут ба қонуншиканиҳои молиявӣ ва фасодкорӣ оғоз шуда буд.

Соли 2014 – Қисми аввали Маркази барқу гармидиҳии "Душанбе-2" бо иқтидори 50 мегаватт/соат ба истифода дода шуд.

Соли 2021 – Ба парлумони Тоҷикистон пешниҳод карда шуд, ки ба Кодекси оила ҷиҳати маҳрум кардан аз ҳуқуқи волидайнӣ барои хушунати ҷинсӣ тағйирот ворид карда шавад.

ШАХСИЯТҲО

Соли 1918 – Зодрӯзи Самариддин Саъдиев, ҳунарпешаи театр ва синамои тоҷик.

ИЗОБРАЖЕНИЕ Самариддин Саъдиев

Самариддин Саъдиев яке аз чеҳраҳои мондагори санъати театру синамои тоҷик буда, бо иҷрои нақши мӯзадӯз дар филми бадеӣ-мазҳакавии “Ман бо духтаре вохӯрдам” дар хотири ҳаводоронаш нақш бастааст.

Ӯ ҳанӯз дар 13-солагӣ вориди олами санъат шуд ва дар театри “Кӯккӯйлак”-и шаҳри Самарқанд ҳамчун ҳунарпеша баромад мекард. Замони дар омӯзишгоҳи мусиқавии шаҳри Тошканд таҳсил карданаш низ дар театри “Малые формы” (“Нақшҳои хурд”)-и шаҳри Тошканд ҳунарнамоӣ мекард.

Ӯ соли 1936 бо даъвати Тоҷикистон ба Театри драмавии ба номи А. Лоҳутӣ омад. Соли 1940 дар Театри опера ва балети ба номи С. Айнӣ, ки нав ташкил гардид, ба фаъолият оғоз кард ва баъди ду сол ба Филармонияи давлатии Тоҷикистон омад ва қариб 30 сол, то соли 1970 дар он ҳунарнамоӣ кардааст.

Номбурда муддате дар Телевизиони Тоҷикистон ҳамчун коргардони намоишҳо барои бачагон низ кор кардааст.

Ҳамчунин дар як қатор филмҳои маъруфи тоҷикӣ – “Вақти зангирии писар расид”, “Қиссаҳои хурд дар бораи бачаҳое, ки…”, “Тӯфон дар водӣ”, “Бо завқ нигоҳ кун” нақш офаридааст.

Ӯ 29-уми майи соли 1983 дар синни 65-солагӣ даргузашт.

Соли 1930 – Мавлуди Нусратулло Абдулҳақов, собиқ вазири корҳои дохилии Тоҷикистон.

ИЗОБРАЖЕНИЕ Нусратулло Абдулҳақов

Нусратулло Абдулҳақов, ки дар гузашта вазири корҳои дохилии Тоҷикистон буд, фаъолияташро аз соҳаи маориф оғоз кардааст. Ӯ пас аз хатми Омӯзишгоҳи омӯзгорӣ ва Институти давлатии педагогии Кӯлоб дар мактабҳои ноҳияи Балҷувон ба омӯзгорӣ пардохт.

Аз соли 1950 роҳи ӯ ба ҳизб боз шуд ва ӯ котиби якуми Комитети комсомолии ноҳияи Балҷувон таъин шуд. Баъдан, дар солҳои 1952–1953 ба ҳайси мудири шуъбаи Комитети Ҳизби коммунистии ҳамин ноҳия фаъолият кард. Солҳои минбаъда ӯ вазифаҳои масъули ҳизбиро дар ноҳияҳои Данғара ва Даштиҷум бар уҳда дошт.

Соли 1961 раиси комиҷроияи ноҳияи Шаҳритуз ва сипас котиби якуми Комитети ҳизби коммунистии шаҳри Кӯлоб буд.

Аз соли 1965 Нусратулло Абдулҳақов дар вазифаҳои котиби Кумитаи Марказии Ҳизби Коммунистии Тоҷикистон, муовини раиси Шӯрои вазирон ва ҳамзамон раиси Комитети назорати ҳизбию давлатӣ кор кардааст. Соли 1965-1972 роҳбари Комитети назорати халқии ҷумҳурӣ буд, ки яке аз сохторҳои муҳими назоратӣ ба шумор мерафт.

Қуллаи фаъолияти хизматии ӯ ба солҳои 1972-1980 аст, замоне ки Нусратулло Абдулҳақов вазифаи вазири корҳои дохилии Тоҷикистонро бар уҳда дошт.

Номбурда соли 2004 дар синни 74 даргузашт.

Соли 1930 – Зодрӯзи Борис Наматиев, ҳунарпешаи театр, овозхон ва навозанда.

ИЗОБРАЖЕНИЕ Борис Наматиев

Борис Наматиев, ҳунарманди маъруфи театри тоҷик ва овозхони “Шашмақом” аст. Ӯ аз зумраи шахсиятҳои намоёни яҳудиёни Бухорост, ки дар асри 20 дар пешбурди фарҳанги тоҷикӣ хидмати зиёд доштаанд.

Ӯ соли 1930 дар Бухоро ба дунё омада, ҳанӯз дар синни 14-солагӣ ба ҳунарнамоӣ дар театри тамошобини ҷавони Бухоро ба кор шурӯъ кард. Дар соли 1948, вақте ҳамагӣ 18 сол дошт, Наматиевро ба театри Лоҳутии шаҳри Душанбе даъват карданд. Ӯ ибтидо дар ин театр ҳамчун доирадаст кор мекард, вале як рӯз иттифоқан, вақте иҷрокунандаи нақши асосии намоишномаи “Шаби ҳафтум” (бар асоси қиссаҳои “Ҳазору як шаб”) бемор шуд, ин нақшро ба Наматиев супурданд. Ӯ ҳамин тавр ба ҳунарпешагӣ дар ин театр оғоз кард ва беш аз 40 сол, то соли 1992, замони ба Исроил кӯчиданаш аз саромадони театри академии Лоҳутӣ буд.

Борис Наматиев соли 1970 унвони Ҳунарманди шоистаи Тоҷикистон ва соли 1989 баъди намоишномаи “Шамшер ва сухан” унвони Ҳунарманди мардумии кишварро ба даст овард.

Ӯ ҳамчунин, аз хонандаҳои эътирофшудаи “Шашмақом” буд ва дар соли 1988 албоми таронаҳояшро бо номи “Зулфи парешон” ва дар соли 1990 албоми дувумашро нашр кард.

Наматиев моҳи январи соли 2016 дар Байтулмуқаддас дар синни 86 даргузашт.

Соли 1947 – Зодрӯзи Исомиддин Салоҳиддинов, ходими давлатӣ, собиқ мушовири президенти Тоҷикистон.

ИЗОБРАЖЕНИЕ Исомиддин Салоҳиддинов

Исомиддин Салоҳиддинов яке аз чеҳраҳои маъруфи сиёсӣ дар Тоҷикистон ба ҳисоб мерафт. Ӯ барои муддате роҳбарии Анҷумани форсизабонони “Пайванд”-ро бар дӯш дошт ва дар ин мақом ба тақвияти равобити фарҳангиву идеологӣ миёни форсизабонон саҳм гузошт.

Пештар Исомиддин Салоҳиддинов тақрибан ду сол раиси шаҳри Панҷакент буд. Солҳои 1998-2001 ӯ ба ҳайси мушовири Президенти Тоҷикистон дар масъалаҳои равобит бо ҷомеаи байналмилалӣ фаъолият кардааст.

Ӯ хатмкардаи Донишгоҳи омӯзгории Тоҷикистон буда, муддате дар ҳамин донишгоҳ ба омӯзгорӣ низ машғул буд.

Дар давраи Шӯравӣ Исомиддин Салоҳиддинов вазифаи дабири Кумитаи марказии Ҳизби коммунисти шаҳри Душанберо иҷро кардааст. Ҳамчунин соли 1995 узви парлумони Тоҷикистон интихоб шуда, муддате роҳбарии бахши сохтмони давлатиро низ ба уҳда дошт.

Салоҳиддинов 5-уми ноябри соли 2016 дар 67-солагӣ аз олам чашм баст.

Соли 1947 – Зодрӯзи Шодӣ Солеҳ, ҳунарпешаи шинохта, коргардон ва драматурги тоҷик.

ИЗОБРАЖЕНИЕ Шодӣ Солеҳ

Ӯ хатмкардаи Донишкадаи театрии ба номи Луначарскийи Маскав буда, фаъолияти ҳунарии худро дар Театри давлатии ҷавонони ба номи Маҳмудҷон Воҳидов оғоз кард ва қариб 20 сол он ҷо фаъолият дошт. Соли 1988 директори Театри драмавии ба номи Лоҳутӣ таъин шуд, танҳо ду сол дар ин мансаб монд. Аз соли 1990 то ҳол дар Театри давлатии ҷавонони ба номи Маҳмудҷон Воҳидов ҳамчун ҳунарпеша, коргардон ва драматург фаъолият дорад.

Шодӣ Солещ бо иҷрои як қатор нақшҳо ва ба саҳна овардани чанд намоишнома дар санъати театру синамои тоҷик худро муаррифӣ кардааст. Солеҳов дар филмҳои “Ҳафт домоди рабудашуда”, “Достони Сиёвуш”, “Ашк ва шамшер” нақш офарида, худ намоишномаҳои “Муҷассама”, “Ятимҳои бехона”-ро рӯйи саҳна овардааст.

Ӯ махсусан дар жанри ҳаҷв ҳунари воло дошт ва дар садҳо намоишномаву саҳнаҳои ҳаҷвии телевизонӣ нақш бозидааст.

Ҳамчунин муаллифи 20 асари саҳнавӣ, 200 саҳначаи хурди ҳаҷвӣ ва беш аз 100 сенарияи телевизионию радиоӣ аст. 

Соли 1950 – Мавлуди Абдураҳмон Азимов, собиқ муовини сарвазири кишвар ва фармондеҳи собиқи Қушунҳои сарҳадии Тоҷикистон.

ИЗОБРАЖЕНИЕ Абдураҳим Азимов

Абдураҳмон Азимов дар давоми фаъолияти худ дар қудрати низомӣ ёвари раиси Кумитаи амнияти миллӣ, раиси Раёсати КДАМ дар вилояти Хатлон, котиби Шӯрои амнияти Тоҷикистон, фармондеҳи Қӯшунҳои сарҳадӣ ва солҳои 1996 – 1999 муовини сарвазири Тоҷикистон буд. Азимов инчунин вакили палатаи поёнии парлумон буд ва дар он Кумита оид ба мудофиа ва амниятро сарварӣ мекард.

Ӯ хатмкардаи Институти давлатии педагогии Кӯлоб муддате муаллим ва сипас раиси Кумитаи иттифоқҳои касабаи ин донишгоҳ, сипас нозири Комитети Ҳизби коммунистии шаҳри Кӯлоб, корманди Комитети бехатарии давлатии Тоҷикистон ва ёвари сардори идораи Комитети амнияти миллӣ буд. Соли 1993 сардори идораи КАМ дар Хатлон ва соли 1996 Котиби Шӯрои амнияти Тоҷикистон таъин шуда, то соли 1999 дар ин мансаб буд.

Ӯ 15-уми майи соли 2020 аз бемории дил дар синни 70-солагӣ даргузашт.

Соли 1950 – Зодрӯзи Атобек Амирбеков, математик, муаллифи китобҳои илмию методӣ барои хонандагони мактаб.

Соли 1955 – Зодрӯзи Абдушукур Раҷабзод, донишноманавис.

ИЗОБРАЖЕНИЕ Абдушукур Раҷабзод

Яке аз муаллифони “Энсиклопедияи милли тоҷик”. Ӯ яке аз қомуснигорони маъруфи кишвар буда. Махсусан дар илми тиб ва биология асарҳои зиёд таълиф намудааст.

Аз ҷумла дар табъу нашри китоби ҳаштҷилдаи “Энсиклопедияи Советии Тоҷик”, “Энсиклопедияи миллии тоҷик” ва як қатор донишномаҳои дигари соҳавӣ низ саҳми арзанда дорад.

Соли 1958 – Мавлуди Рустам Аҳадов, коргардони филм, садобардор.

Соли 1958 – Зодрӯзи Қироншоҳ Шарифзода, рӯзноманигор, муҳаққиқи таърихи журналистика.

ИЗОБРАЖЕНИЕ Қироншоҳ Шарифзода

Қироншоҳ Шарифзода рӯзноманигори маъруф, муҳаққиқи таърихи журналистика ва устоди факултаи журналистикаи Донишгоҳи миллии Тоҷикистон мебошад. Ӯ фаъолияти касбии худро аз рӯзномаи “Комсомоли Тоҷикистон” оғоз намуда, солҳои зиёд дар нашрияи парлумонии “Садои мардум” ҳамчун шореҳ фаъолият дошт.

Қироншоҳ Шарифзода муаллифи 8 китоб ва тадқиқоти амиқ дар соҳаи таърихи журналистика, аз ҷумла рӯзномаи аввалини тоҷикӣ – “Бухорои шариф” мебошад. Ӯ устоди вораста ва шахсияти шариф дониста мешавад, ки дар тарбияи наслҳои нави рӯзноманигорон саҳми бузург гузоштааст.

Пиромуни зиндагӣ ва эҷодиёту фаъолияти ӯ дар маводи Инсони шарифу рӯзноманигори вораста. Қироншоҳ Шарифзода 66-сола шуд, ки соле пеш “Азия-Плюс” бахшида ба мавлудаш нашҳр карда буд, мутолиа кунед.

Соли 1961 – Зодрӯзи Давлатшоҳ Гулмамадзода, сафири ҳозираи Тоҷикистон дар Русия ва муовини пешини сарвазири Тоҷикистон.

ИЗОБРАЖЕНИЕ Давлатшоҳ Гулмаҳмадзода

Ӯ яке аз чеҳраҳои матраҳи ҳукумати Эмомалӣ Раҳмон ба шумор меравад. Давлатшоҳ Гулмаҳмадзода солҳо ба дар  бахши заминсозии кишвар, аз ҷумла, раиси Кумитаи заминсозии кишвар (2001-2006), баъдтар директори Агентии заминсозӣ, геодезӣ ва харитасозии назди ҳукумати  Тоҷикистон (2006-2008), сонитар қариб 7 сол раиси вилояти Хатлон (2013-2019), ҳамчунин, раиси Кумитаи ҳифзи муҳити зист (2019-2020) кор кардааст.

Аз соли 2020 то 2021 муовини сарвазири Тоҷикистон буд. Аз августи соли 2021 сафири Тоҷикистон дар Русия мебошад.

Соли 1964 – Зодрӯзи Абдушариф Боқизода, донишманд ва ховаршиноси тоҷик.

ИЗОБРАЖЕНИЕ Абдушариф Бақозода

Абдушариф Боқизода яке аз пажӯҳишгари улуми исломӣ буда, таърихи исломро омӯхта, асарҳои зиёде дар ин ришта таълиф кардааст. “Таърихи ислом”, “Имоми Аъзам бузургмарди таърихи башарият”, “Тафсири навини Қуръони карим” аз ин қабиланд.

Солҳои охири зиндагиаш ӯ дар Энсиклопедияи миллии тоҷик фаъолият мекард ва 27 сентябри соли 2024 дар синни 60-солагӣ аз олам даргузашт.

Соли 1997 – Ашӯр Сафар, Шоири халқии Тоҷикистон дар синни 68-солагӣ аз олам даргузашт.

ИЗОБРАЖЕНИЕ Ашӯр Сафар

Ӯ хатмкардаи факултаи забон ва адабиёти тоҷики Донишкадаи давлатии омӯзгории Кӯлоб буда, пеш аз таҳсил дар донишгоҳ муддате омӯзгорӣ ва баъди хатми таҳсил дар шуъбаи маориф, рӯзномаи “Ҳақиқати Кӯлоб” кор карда, муддате директори Хонаи пешоҳангон, директори Бунгоҳи табиатшиносони ҷавони вилояти Кӯлоб буд.

Номбурда дар тамоми ин муддат аз фаъолияти омӯзгорӣ дур нашуда, ба толибилмон аз фанни забон ва адабиёти тоҷик дарс гуфтааст.

Аввалин маҷмӯаи ашъори ӯ “Ибтидои роҳ” унвон дошта, сипас шеъру қиссаҳояш, ки ҷанбаи пурқуввати лирикиву иҷтимоӣ доштанд, дар маҷмӯаҳои “Илҳом”, “Хандаи гулҳо”, “Фарзанди аср” мунташир шуданд.

Хонандагони хурдсол шеъру афсона ва чистонҳои бисёри шоирро, ки дар китобҳои “Дастёри додо”, “Гулгардонӣ”, “Э мойнӣ, мойнӣ” гирд омадаанд, мутолиа ва ҳифз кардаанд.

Шеърҳои ҳаҷвии шоир аз намунаҳои беҳтарини ҳаҷвиёти адабиёти муосири тоҷик ба ҳисоб мераванд, ки маҷмӯаи дар “Гапи подор” нашр шудааст.

Ӯ 10-уми январи соли 1997 дар 68-солагӣ даргузашт.

Соли 2022 – Ҳокими Азиз, яке аз журналистони шинохтаи телевизион ва муаллифи барномаи машҳури "Суҳбати мардона" дар телевизон бар асари беморӣ даргузашт.

САНАҲОИ МУҲИМИ ҶАҲОНӢ

10 январи соли 1863 дар шаҳри Лондон, Британияи Кабир аввалин хати метро дар ҷаҳон ифтитоҳ шуд. 

Ин хатро ширкати "Metropolitan Railway" сохта буд ва он ҳамчун роҳи оҳани зеризаминӣ барои ҳамлу нақли мусофирон истифода мешуд. Аввалин хати метро Лондонро бо минтақаҳои дигар пайваст мекард ва имрӯз Лондон дорои яке аз васеътарин шабакаҳои метро дар ҷаҳон аст.

ИЗОБРАЖЕНИЕ Аввалин метро дар Лондон

10 январи соли 1946 дар Лондон иҷлосияи якуми Ассамблеяи Генералии СММ оғоз ёфт. Ҷолиб ин аст, ки ин сана ба солгарди ташкил ёфтани Лигаи Миллатҳо — ҳаракати умумиҷаҳонии сулҳ ва ҳамкории байни халқҳо, ки 10 январи соли 1920 таъсис ёфта буд, рост меояд. Он аввалин ташкилоти байналхалқии сиёсӣ гардид. Ин ташкилот 18-уми апрели соли 1946 барҳам дода шуд  ва дороиҳо ва уҳдадориҳои он ба СММ интиқол дода шуд.

Имрӯз дар ҷаҳон ҳамчун Рӯзи одамони вижа ҷашн гирифта мешавад. Ин рӯз ба шахсоне, ки тарзи тафаккури фарқкунанда ва хос доранд, бахшида шудааст. Онҳо ҳамеша қолаб ва меъёрҳоро рад карда, бо андешаҳои нав дар бораи дигаргун сохтани ҷаҳони мавҷуда фикр мекунанд.

ВАЗЪИ ҲАВО*

Дар вилояти Суғд – Ҳавои камабри бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона дар водиҳо 4+9º гарм, дар ноҳияҳои кӯҳӣ -2+3º, шабона дар водиҳо -3+2º, дар ноҳияҳои кӯҳӣ 5-10º сард.

Дар вилояти Хатлон – Ҳавои камабри бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона дар водиҳо 4+9º гарм,  дар баъзе ноҳияҳо то 12+14º гарм, дар  доманакӯҳҳо 7+12º гарм, шабона дар водиҳо -2+3º, дар ноҳияҳои доманакӯҳӣ -3+2º.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат:  рӯзона дар водиҳо 9+14º гарм, дар ноҳияҳои кӯҳӣ 2+7º гарм, дар баъзе ноҳияҳо то 3-5º сард, шабона дар водиҳо -2+3º, дар ноҳияҳои кӯҳӣ 0-5º сард, дар баъзе ноҳияҳо то 16-18º сард.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона 0+5º гарм, дар баъзе ноҳияҳо то 8+10º гарм, дар шарқи вилоят рӯзона 8-13º сард, дар баъзе минтақаҳо то 19-21º сард, дар ғарби вилоят шабона 9-14º сард, дар баъзе ноҳияҳо то -1+1º, дар шарқи вилоят шабона 24-29º сард, дар баъзе минтақаҳо то 50-52º сард.

Дар шаҳри Душанбе – Ҳавои  камабри бебориш пешгӯӣ мешавад. Ҳарорат: рӯзона 12+14º гарм, шабона 2+4º гарм.

Дар шаҳри Хуҷанд – Ҳавои камабри бебориш пешгӯӣ шуда, тормеғ мефарояд. Ҳарорат: рӯзона 4+6º гарм, шабона 0+2º гарм.

Дар шаҳри Бохтар – Ҳавои камабри бебориш пешгӯӣ шуда, тормеғ мефарояд. Ҳарорат: рӯзона 5+7º гарм, шабона 0+2º гарм.

Дар шаҳри Хоруғ – Ҳавои камабри бебориш пешгӯӣ мешавад. Ҳарорат: рӯзона 2+4º гарм, шабона 9-11º сард.

*Ҳарорати шабонаи ҳаво шаби 10 ба 11-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.

Доналд Трамп, раисҷумҳури ИМА фармонеро имзо кард, ки тибқи он кишвараш узвияти худро дар 66 созмон ва созишномаи байналмилалӣ қатъ мекунад. Ин рӯйхат 31 сохтори СММ ва 35 созмони дигари ҷаҳониро дар бар мегирад.

Нуктаҳои асосии фармон

Кохи сафед матни ин фармонро рӯзи 7-уми январ нашр кард. Дар он омадааст, ки ин ташаббус дар пайи машваратҳо бо Котиби давлатӣ ва аъзои ҳукумат дар идомаи сиёсати моҳи феврали соли 2025 қабул шудааст.

Доналд Трамп гуфтааст, ки узвият дар ин созмонҳо “бар хилофи манфиатҳои Иёлоти Муттаҳида” мебошад.

“Дар асоси ваколатҳое, ки тибқи сарқонун ва қонунҳои Амрико ба ман ҳамчун раисҷумҳур дода шудаанд, ман ба ҳамаи департаментҳо ва идораҳои иҷроия дастур медиҳам, ки фавран ҷиҳати амалӣ кардани хуруҷи ИМА аз созмонҳои дар фасли 2-юми ин фармон зикршуда дар фурсати кӯтоҳтарин чораҳо андешанд. Нисбат ба сохторҳои СММ, хуруҷ маънои қатъи иштирок ё қатъи маблағгузории ин сохторҳоро дар доираи муқаррарнамудаи қонун дорад”, – омадааст дар матни фармони Трамп.

Аммо вокуниши расмии Конгресси Амрико ба ин фармон ҳанӯз маълум нест. Конгресс ҳуқуқи тасвиби буҷет ва маблағгузорӣ ба созмонҳои байналмилалиро дорад ва метавонад тавассути қонунгузорӣ ба қарорҳои президент таъсир расонад.

ИЗОБРАЖЕНИЕ Қароргоҳи СММ дар Ню-Йорк

Дар ҳамин ҳол, дар фармони Трамп номи чандин созмону комиссиюни муҳими байналмилалӣ зикр шудааст, ки Амрико аз онҳо хориҷ мешавад. Яке аз онҳо Комиссиюни Венетсиягии Шӯрои Аврупо мебошад – сохторе, ки меъёрҳои конститутсионӣ ва волоияти қонунро муайян мекунад.

Дар соҳаи ҳуқуқи башар Амрико аз чанд сохтори муҳим, аз ҷумла Шӯрои ҳуқуқи башари СММ, Конвенсияи СММ бар зидди ҷинояткории муташаккили фаромиллӣ ва Комиссияи байналмилалии ҳуқуқ берун меояд.

Амрико инчунин аз Эъломияи СММ оид ба тағйироти иқлим берун меояд. Вашингтон танҳо кишваре дар ҷаҳон аст, ки расман аз ин санади калидӣ канора гирифт. Ҳамчунин ИМА аз Агентии байналмилалии энержӣ ва Иттиҳоди байналмилалӣ барои ҳифзи табиат хориҷ мешавад.

Дар умум, Амрико аз даҳҳо созмону конвенсияву эътилофҳо дар самти иқтисод, савдо ва рушд, ҳуқуқ, демократия ва идоракунӣ, энергетика ва технология, тандурустӣ, иҷтимоӣ ва баробарии ҷинсӣ, амният ва сулҳ берун мешавад. Рӯйхати ҳамаи онҳоро дар ҷадвали зерини “Азия-Плюс” бубинед.

Аз “таассуф” то “пушаймонӣ”

Антониу Гутерриш, дабири кулли СММ рӯзи панҷшанбе аз ин қарори Трамп “изҳори таассуф” карда, ҳамзамон таъкид доштааст, ки ин ниҳод ба иҷрои ҳамаи вазифаҳои худ идома медиҳад.

ИЗОБРАЖЕНИЕ Антониу Гутерриш

Стефан Дужаррик, сухангӯи СММ, ба “Reuters” гуфтааст, ки ин созмон “аз маъмурияти Трамп ягон огоҳиномаи расмӣ нагирифтааст”. Вай таъкид кардааст, ИМА баъзе созмонҳои шартномавӣ мехоҳад хориҷ шавад, ки барои ин кор огоҳии расмӣ лозиманд.

Раҳбарони Иттиҳоди Аврупо, аз ҷумла муовини раиси Комиссияи Аврупо Тереза Рибера ва комиссари иқлим Вопке Хукстра, ин тасмими ИМА-ро маҳкум карда, “изҳори нодида гирифтани муҳит, саломатӣ ва дардҳои мардум” номида, ҳамзамон гуфтаанд, ки “Амрико аз ин тасмимаш пушаймон мешавад”.

Конгресси Амрико расман дар бораи ин фармони Трамп вокуниш накардааст, вале вакилони Маҷлисаи намояндагон ҷудогона ин тасмими раисҷумҳурро танқид мекунанд. Аз ҷумла, Ҷегри Микс, раиси Кумитаи корҳои хориҷии Маҷлиси намояндагон, онро “ҳадя ба душманон” номидааст.

“Фармони раисҷумҳур идомаи ҳуҷуми ӯ ба низоми бисёрҷониба ва ба қоидаҳо асосёфта мебошад, ки ИМА дар сохтори он кӯмак карда буд ва худаш ҳам аз он суд мегирифт. Ин хуруҷи якҷониба ба рақибони мо қудрат мебахшад ва Иёлоти Муттаҳидаро аз ҳаққи овоз дар дохили ин ниҳодҳо маҳрум сохта, тавоноии моро маҳдуд месозад”, – гуфтааст Микс.

Ёдовар мешавем, ки Доналд Трамп пештар низ маблағгузорӣ ба бахшҳои гуногуни СММ-ро қатъ карда, худи созмонро шадидан интиқод карда буд.

Дар Telegram, Facebook ва Instagram бо мо бимонед.

Дар соли 2024-ум 154 хоҷагӣ ва 2025-ум 174 хоҷагӣ аз минтақаҳои хавфнок ба ҷойҳои амн кӯчонида шудаанд. Дар ин бора Ҷамшед Камолзода, намояндаи Кумитаи ҳолатҳои фавқулода (КҲФ) дар суҳбат бо хабаргузории “Ховар” иттилоъ додаааст.

Ӯ ҳамчунин, гуфтааст, ки соли 2025 дар Тоҷикистон 287 ҳодисаи фавқулода ба қайд гирифта шуда, аз ин шумора 12-тои он офати табиӣ мебошад. Ҳаҷми умумии зарари расонидаи ин ҳодисаҳо беш аз 20 миллион сомониро ташкил додааст.

“Дар Тоҷикистон бештар офатҳои табиии сел, заминларза ва тармафароӣ ба қайд гирифта мешаванд. Хисороти асосии молию ҷонӣ низ маҳз аз ҳамин навъи офатҳо ба иқтисоди миллӣ ва амнияти аҳолӣ мерасад. Дар байни онҳо заминларза аз ҷиҳати ҳаҷми зарар хатарноктарин арзёбӣ мегардад”, – гуфтааст Ҷамшед Камолзода.

Ба гуфтаи номбурда, чунин офатҳо бештар дар минтақаҳои кӯҳӣ — ВМКБ, ноҳияҳои минтақаи Рашт, водии Зарафшон ва шаҳру ноҳияҳои кӯҳии вилояти Суғд мушоҳида мешаванд.

Ба қавли ӯ, соли 2025 барои корҳои соҳилмустаҳкамкунӣ ва дигар тадбирҳои пешгирикунанда беш аз 28 миллион сомонӣ ҷудо гардидааст. Бо ин пул маводи сӯзишворӣ, масолеҳи сохтмонӣ ва дигар лавозимоти зарурӣ харида шуда, ба беш аз 20 шаҳру ноҳияи осебпазир бурда шудаанд.

Соли 2024 КҲФ хабар дода буд, ки дар қаламрави кишвар 1209 минтақаи хавфнок ба қайд гирифта шуда, аҳолӣ аз ин ҷойҳо тадриҷан кӯчонида мешавад.

Дар Telegram, Facebook, Instagram бо мо бимонед.