ЯК РӮЗИ ТАЪРИХ

Соли 1926 – Дар шаҳри Душанбе аввалин мағозаи китобфурӯшӣ бо номи “Китоб” кушода шуд.

Соли 1930 – Шӯрои Комиссарони халқии Тоҷикистони Шӯравӣ дар бораи бақайдгирӣ ва ҳифзи ёдгориҳои таърихиву фарҳангӣ қарор қабул кард.

Соли 1944 – Дар бахше аз вилояти Қурғонтеппа  (ҳозира минтақаи Бохтари вилояти Хатлон) ноҳияи Вахш таъсис ёфт.

Соли 1952 – Корхонаи механикии Ленинобод (ҳозира Суғд) мавриди истифода қарор гирифт. Корхона ба истеҳсоли техника ва таҷҳизоти кишоварзӣ, механизмҳои саноатӣ ва таҷҳизоти гуногуни механикӣ машғул буд.

Соли 1993 – Байни ҷумҳуриҳои Тоҷикистон ва Қазоқистон муносибатҳои дипломатӣ барқарор шуданд.

Соли 2001 – Бо қарори ҳукумати Тоҷикистон Кумитаи миллии ҳамоҳангсозӣ оид ба пешгирӣ ва мубориза бо вирӯси норасоии масунияти одавм (ВНМО/БПНМ (ВИЧ/СПИД) таъсис дода шуд.

Соли 2016 – Баъди таъмир ва навсозӣ маҷмааи истироҳативу сайёҳӣ ва лижаронии “Сафед-Дара” расман ифтитоҳ гардид.

ИЗОБРАЖЕНИЕ Сафеддара

Соли 2020 – Маҳмадтоҳир Зокирзода, муовини вақти сарвазири Тоҷикистон дар шаҳри Тошканд санади байнидавлатӣ оид ба делимитатсия ва демаркатсияи сарҳади Тоҷикистону Ӯзбекистонро имзо кард. Аз ҷониби Ӯзбекистон санадро муовини сарвазир Элёр Ғаниев имзо намуд.

Соли 2022 – Парлумони Тоҷикистон фиристодани 200 хизматчии ҳарбиро ба Қазоқистон дар доираи рисолати сулҳпарварии СААД тасдиқ кард.

Соли 2022 – Эмомалӣ Раҳмон дар бораи таҷлили 35-солагии Истиқлоли давлатии Тоҷикистон фармон имзо кард.

ШАХСИЯТҲО

Соли 1924 – Зодрӯзи Абдуҷаббор Қаҳҳорӣ, шоир ва нависандаи тоҷик.

ИЗОБРАЖЕНИЕ Абдуҷаббор Қодирӣ

Абдуҷаббор Қаҳҳорӣ соли 1940 ба ҷодаи адабиёт ворид гардид ва дар жанрҳои шеър, достон ва драма асарҳо офаридааст.

Абдуҷаббор Қаҳҳорӣ бо оғози ҷанги Иттиҳоди Шӯравӣ бар зидди Олмон ба майдони ҷанг рафт ва соли 1944 бо ҷароҳати вазнин ба зодгоҳаш Конибодом баргашт ва минбаъд ба кори адабиву илмӣ рӯ овард. Ӯ Шоири халқии Тоҷикистон буда, дар ин баробар драма ва асарҳои насрӣ низ эҷод кардааст.

Қаҳҳорӣ шоири ҷанговар буда, дар навиштаҳояш тараннуми ғояҳои ватандӯстӣ, озодихоҳӣ ва ишқу муҳаббат эҳсос мешаванд.

Ӯ муаллифи маҷмӯаҳои шеърии “Гули баҳор”, “Шукуфаҳои аз хун дамида”, достонҳои “Гуфтугӯ бо меҳмон”, “Шаби пеш аз марг”, драмаҳои “Қаҳрамони ҷавон”, “Таркиш” ва асарҳои мансури “Гардиши айём” ва “Конибодом” аст.

Асарҳои мансураш дар китобҳои “Гардиши айём”, “Умри ғанимат” ба табъ расидаанд. Ҳамчунин, як қатор драмаҳояш дар театрҳои ҷумҳурӣ саҳнагузорӣ шудаанд.

Абдуҷаббор Қаҳҳорӣ 18 январи соли 2007 дар синни 83-солагӣ аз олам даргузашт.

Соли 1943 – Мавлуди Ҳақназар Ғоиб, Шоири халқии Тоҷикистон, дорандаи Ҷоизаи давлатии Тоҷикистон ба номи Рӯдакӣ (2000).

ИЗОБРАЖЕНИЕ Ҳақназар Ғоиб

Ҳақназар Ғоиб, шоир ва тарҷумони тоҷик буда, беш аз 50 сол инҷониб дар саҳнаи адабиёти тоҷик аст ва наздик ба 30 маҷмуа нашр кардааст. Ӯ дар баробари кори эҷод, рӯзноманигор ҳам ҳаст ва муддатҳо дар расонаҳои вилояти Хатлон ҳамчун сармуҳаррири рӯзномаҳои вилоятиву шаҳрӣ фаъолият мекунад.

Ӯ хатмкардаи Омӯзишгоҳи педагогӣ ва Донишкадаи давлатии омӯзгории Кӯлоб буда, як сол омӯзгорӣ ҳам кардааст.

Ҳақназар Ғоиб солҳои 1974-1981 раиси Кумитаи телевизион ва радиои вилояти Кӯлоб, то соли 1989 котиби масъули бахши Кӯлоби Иттифоқи нависандагони Тоҷикистон ва солҳои 1990-1993 аввал сармуҳаррири рӯзномаи вилоятии “Хатлон” ва сипас “Навиди Кӯлоб” будааст. Аз соли 2002 бахши вилояти Хатлони Иттифоқи нависандагони ҷумҳуриро роҳбарӣ мекунад.

Ӯ хеле барвақт ба шеъргӯӣ оғоз кард ва чакидаҳои аввалини эҷодаш дар маҷаллаву рӯзномаҳо рӯйи чоп меомаданд. Номбурда муаллифи достонҳои “Эҳёнома”, “Ҳасрати Фирдавсӣ”, “Ҳасрати Эйнштейн”, “Ашки Офтоб”, “Сурӯши Хатлон” аст, ки дар эҷодиёти ӯ мақоми хоса доранд.

Баъдан маҷмӯаҳои ашъораш “Тӯшаи роҳ”, “Рамзи ҳаёт”, “Нафас то бар нафас овози вақт аст”, “Қиссаи аспи хатлӣ”, “Навҳаи Фирдавсӣ бар марги Рустам” ва дигар маҷмӯаҳо нашр шуданд.

Соли 1950 – Зодрӯзи Муқаддас Набиева, сарояндаи маъруфи тоҷик, яке аз ситораҳои ансамбли “Гулшан”

ИЗОБРАЖЕНИЕ Муқаддас Набиева

Муқаддас Набиева зодаи ноҳияи Фархор буда, нахуст ба варзиш машғул ва дар ин ришта таҳсил кардааст. Аммо баъдтар ба дастаи ҳаваскорони санъати хонаи маданияти Фархор ҳамроҳ шуда, вориди ҷодаи санъат гардид. Соли 1973 дар озмуни “Бӯстон” суруди “Республикаи ман”-ро иҷро кард.

Муқаддас Набиева дар як муддати кӯтоҳ дар ин ансамбл навгонӣ ворид кард ва дар ҳунари сарояндагӣ, махсусан дар санъати эстрада роҳи наву сабки хоси сурудхонӣ кушод.

“Кӯи ту”, “Хуршеди ҳаёт”, “Нури ман”, “Шарораи хотираҳо”, “Боди сабо”, “Садои дил”, “Ба ишқат интизорам”, “Дили зорам” “Муҳаббат нест бе оташ” аз таронаҳои маҳбуби ӯ буда, дар ин қатор наздик ба 50 таронаи ӯ дар хазинаи санъати тоҷик ҳифз мешаванд.

Муқаддас Набиева 30-юми сентябри соли 1979 дар синни 29-солагӣ дар натиҷаи садамаи нақлиётӣ ҳангоми сафар дар мавзеи Такфони ноҳияи Айнӣ аз олам даргузашт. Дар бораи роҳи тайкардаи Муқаддас Набиева ӯ дар санъат дар ин маводи мо шинос шавед. 

Соли 1960 – Зодрӯзи Маъруф Қобилов, доктори илмҳои физика ва математика.

Соли 1961 – Мавлуди Амирбеки Мӯсо, оҳангсоз, навозанда ва раиси пешини Иттифоқи композиторони Тоҷикистон.

Соли 1965 – Зодрӯзи Шариф Муллоев, доктори илмҳои филологӣ, устоди Донишгоҳи славянии Тоҷикистону Русия.

Соли 1966 – Мавлуди Шарифмурод Исрофилниё, олим, адабиётшиноси тоҷик.

ИЗОБРАЖЕНИЕ Шарифмурод Исрофилниё

Шарифмурод Исрофилниё яке аз муҳаққиқони варзидаи адабиёт аст, ки бисёр таҳқиқоти илмиву адабӣ анҷом додааст. Ӯ муаллифи дастикам 7 китоб ва 500 мақолаҳои илмӣ-адабӣ аст.

Солҳо дар Донишгоҳи милли Тоҷикистон, Донишгоҳи давлатии забонҳои Тоҷикистон ба номи Сотим Улуғзода ва Пажӯҳишгоҳи рушди маорифи Академияи таҳсилот фаъолият бурдааст.

Соли 1993 – Зодрӯзи Комроншоҳ Устопирён, варзишгари шинохта, ҷудокори номии тоҷик.

ИЗОБРАЖЕНИЕ Комроншоҳ Устопириён

Ӯ яке аз варзишгарони номии кишвар буда, ба кишвар чандин ҷоизаҳои баланди ҷаҳонӣ дар соҳаи варзиш овардааст. Ӯ куштигир, ҷудокор ва варзишгари самбо аст.

Комроншоҳи Устопириён, ки то соли 2012 дар варзиши самбо куштӣ мегирифт, пас аз он ба варзиши ҷудо рӯй овард. Ӯ аз даҳҳо мусобиқаҳои ҷаҳонӣ барои Тоҷикистон медал овардааст. Аз ҷумла ин варзишгар аввалин ва то имрӯз ягона қаҳрамони ҷудои мардони Осиё аз Тоҷикистон аст.

Вай ҳамчунин барандаи медалҳои чандинн мусобиқаҳои “Гран-при” ва “Гранд слам” аст.

Ӯ се маротиба дар бозиҳои олимпӣ аз намуди ҷудо иштирок кард, аммо натавонист медал ба даст орад. Пас аз шикаст дар бозиҳои олимпии Порис дар соли 2024 Комроншоҳ эълон кард, ки корномаи варзишиашро хотима медиҳад.

Соли 2016 – Гурез Зарипов,роҳбари пешини Хадамоти гумруки Тоҷикистон дар 68-солагӣ даргузашт.

ИЗОБРАЖЕНИЕ Гурез Зарипов

Гурез Зарипов аз моҳи январи соли 1992, замони таъсисёбии хадамоти гумрук дар ин низом фаъолият дошт. Дар мансабҳои сардори Раёсати хадамоти гумруки вилояти Хатлон, мақомҳои роҳбарикунанда дар Кумитаи андоз ва Агенти назорати маводи нашъаовар ифои вазифа кардааст.

Моҳи декабри соли 2006 роҳбари Хадамоти гумруки назди ҳукумати Тоҷикистон таъин шуда, охири соли 2013 ӯро дар ин вазифа Рустами Эмомалӣ, шаҳрдори ҳозираи душанбе ва раиси Маҷлиси миллии Тоҷикистон иваз кард.

Соли 2021 – Маҳмадалӣ Муҳаммадиев, ҳунарпешаи театру синамои тоҷик дар синни 74 аз олам чашм баст.

ИЗОБРАЖЕНИЕ Маҳмадалӣ Муҳаммадиев

Маҳмадалӣ Муҳаммадиев аз ҳунарпешагони маъруфи тоҷик буда, бо иҷрои нақшҳои муассир дар синамо ва театр номи худро мондагор кардааст. 

Ӯ хатмкардаи Институти театру кинои Маскав буда, дар Театри давлатии академӣ-драмавии ба номи Лоҳутӣ ва Театри давлатии ҷавонони ба номи М. Воҳидов ҳунарнамоӣ ва як силсила нақшҳо офаридааст. Нақшҳои ӯ дар филмҳои бадеии “Одам пӯсташро иваз мекунад”, “Шикори охирин”, “Хайр кабудии тобистон”, “Тали мамнӯъ”, “Ситораҳо дар шаб”, “Соя” ва чандин филмҳо дар Маскаву Кишинев ҷолибанд.

Ӯ дар филмҳо ва намоишномаҳои телевизонии ватанӣ аз қабили “Парвози хушдоманам”, “Сабзабаноз”, “Қисмат”, “Фиреби хаёл”, “Шифо”, “Чакидаҳо” низ нақшҳои хотирмон бозидааст.

 САНАҲОИ МУҲИМИ ҶАҲОНӢ

Имрӯз яке аз ҷашнҳо масеҳӣ ва ҳамзамон иди давлатӣ дар зиёда аз 100 кишвари ҷаҳон – Мавлуди Исои Масеҳ таҷлил мегардад. Мавлуди Масеҳ поёни рӯзаи чилрӯзаи Мавлуди Исо маҳсуб меёбад. 

ИЗОБРАЖЕНИЕ

Шаби 6 ба 7-уми январ дар калисоҳои православӣ маросимҳои идонаи мавлуд баргузор мешаванд. Пас аз он 12 рӯзи муқаддас оғоз меёбад, ки дар тӯли онҳо ҷашн идома мекунад.

7-уми январи соли 1610 донишманди маъруф Галилео Галилей моҳвораҳои сайёраи Юпитерро кашф кард. Ӯ барои ин мақсад телескопи сохтаи худро бо қувваи 32-карата ба осмон равона намуд.

ИЗОБРАЖЕНИЕ

Галилей на танҳо манзараи рӯи Моҳ, қаторкӯҳҳо ва қуллаҳоро мушоҳида кард, балки чор моҳвораи бузургтарини Юпитерро низ кашф кард, ки имрӯз бо номи “ҳамроҳони галилеӣ” маъруфанд.

7-уми январи соли 1989 Акихито, валиаҳди Ҷопон 125-умин императори ин кишвар эълон гардид. Давраи ҳукмронии ӯ бо номи Ҳэйсэй (Heisei – расидан ба сулҳ дар дохили кишвар ва берун аз он) маъруф аст.

ИЗОБРАЖЕНИЕ

30-юми апрели соли 2019 император Акихито ихтиёран аз тахт даст кашид ва ба истеъфо рафта, тахтро ба писари калониаш – валиаҳд Нарухито супорид. Ӯ нахустин императори Ҷопон дар давоми ду асри охир гардид, ки ба таври ихтиёрӣ аз тахт канор рафтааст.

7-уми январи соли 2015 дар идораи ҳафтаномаи ҳаҷвии "Charlie Hebdo" дар шаҳри Париж амали террористӣ ба вуқуъ пайваст. Дар натиҷаи ҳамлаи афроди мусаллаҳ 12 нафар кушта ва 11 кас захмӣ шуданд. Гумонбарони асосии ин ҳамла бародарон Саид ва Шериф Куаши рӯзи 9-уми январ зимни амалиёти махсус аз ҷониби нерӯҳои амниятии Фаронса нобуд карда шуданд.

Масъулияти ин амали террористиро созмони террористии “Ал-Қоида дар нимҷазираи Араб” ба уҳда гирифт. Ҳамзамон, намояндагони созмони террористии “Давлати исломӣ” (дар Тоҷикистон ташкилоти террористӣ эълон шудааст) низ аз даст доштани худ дар ин ҳодиса изҳорот доданд.

ИЗОБРАЖЕНИЕ

Ин амали террористӣ вокуниш ба нашри карикатура дар бораи Паёмбари Муҳаммад (с) аз ҷониби ҳафтаномаи "Charlie Hebdo" арзёбӣ мешавад. 

Ҳамла ба идораи "Charlie Hebdo" оғози силсилаи ҳамлаҳои террористӣ дар Фаронса дар рӯзҳои 7-9 январи соли 2015 гардид.

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: рӯзона 3+8º гарм, шабона 0-5º сард, дар ноҳияҳои кӯҳӣ шабона 6-11º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона 6+11º гарм, дар  доманакӯҳҳо  рӯзона 1+6º гарм, дар водиҳо шабона -2+3º, дар ноҳияҳои доманакӯҳӣ шабона 0-5º сард.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона 5+10º гарм, дар баъзе ноҳияҳои куҳӣ то -1+4º, шабона дар водиҳо -4+1º, дар ноҳияҳои кӯҳӣ шабона 5-10º сард, дар баъзе ноҳияҳо то 14-16º сард,

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона -2+3º, дар баъзе ноҳияҳо то 5+7º гарм,  дар шарқи вилоят рӯзона 7-12º сард, дар баъзе минтақаҳо то 16-18º сард, шабона дар ғарби вилоят 8-13º сард, дар баъзе ноҳияҳо то 1-3º сард, дар шарқи вилоят шабона 24-29º сард, дар баъзе минтақаҳо то 48-50º сард.

Дар шаҳри Душанбе – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 8+10º гарм, шабона -1+1º.

Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 4+6º гарм, шабона 0-2º сард.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 8+10º гарм, шабона 0-2º сард.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона 0+2º гарм, шабона 9-11º сард.

*Ҳарорати шабонаи ҳаво шаби 7 ба 8-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.

Соли 2025 муҳтавои таҳиякардаи “Азия-Плюс”-ро 24 миллиону 200 ҳазор маротиба хондаанд. Танҳо муҳтавои дар бахши тоҷикӣ нашршударо ҳудуди 6 миллион бор хондаанд.

Дар умум, соли гузашта аз сомонаи “Азия-Плюс” қариб 16 миллион бор дидан кардаанд. Аз ин беш аз 6 миллиону 200 ҳазор корбарони истисноӣ ҳастанд. Яъне корбароне, ки чанд маротиба ба сомона ворид шудаанд, аммо ҳамчун як корбар ҳисоб шудаанд.

Давоми соли гузашта дар бахши тоҷикии сомонаи “Азия-Плюс” қариб 3 ҳазору 500 мавод нашр шудааст. 3 ҳазору 355 маводи нашршуда беш аз ҳазор хонанда доштаанд. 543 маводи нашршуда беш аз 5 ҳазор бор хонда шудаанд. 61 маводи нашркарда беш аз 10 ҳазор бор хонда шудаанд.

Бо такя ба маълумоти ироакардаи “Yandex.Metrica”, мо 15 маводи пурхонандаи бахши тоҷикии сомонаи “Азия-Плюс”-ро дар соли 2025, ки аз 12 то беш аз 53 ҳазор хонанда доштанд, интихоб кардем.

Дар умум, агар ба таври хеле мухтасар зикр кунем, мубориза бо ифротгароӣ, масоили иҷтимоӣ, муҳоҷират, ҳаводиси сиёсии ҷаҳон, тағйироти кадрӣ, хабарҳои марбут ба фаъолияти раисҷумҳур ва ҳалли масоили марзӣ серхонандатарин мавзӯъ дар соли 2025 будааст.

1. Пешгирии экстремизм дар Тоҷикистон. Чаро корҳои иттилоотиву огоҳибахшӣ имрӯз муҳимтаранд?

Дар садри феҳристи пурхонандатарин матолиб маводи дар мавзӯи мубориза бо ифротгароӣ навишта қарор дорад. Ин мақоларо беш 53 ҳазор маротиба хондаанд. Дар ин матлаб, муаллиф талош кардааст василаҳои муассири мубориза бо ифротгароӣ тавассути пешниҳоди иттилоъро мавриди таҳлил қарор диҳад.

ИЗОБРАЖЕНИЕ Акси марбут

2. Таниш миёни Боку ва Маскав. Оё Русия муносибати худ бо кишварҳои Осиёи Марказиро дигар мекунад?

Дар ин матлаб тағйири равобит миёни Маскаву Боку дар пайи суқут додани тайёраи мусофирбари Озарбойҷон дар фазои Русия ва баъди он, боздошти хушунатомези озариҳо дар Русияву русҳо дар Озарбойҷон бозгӯ шудаааст. Ҳамчунин, ба ин суол посух ҷуста шудааст, ки оё таниш миёни Боку ва Маскав муносибати Русияро бо кишварҳои Осиёи Марказӣ тағйир медиҳад ё не? Ин матлабро беш аз 15 ҳазору 400 бор хондаанд.

3. Мулоқоти Эмомалӣ Раҳмон бо роҳбарони Иттиҳоди Аврупо ва Шавкат Мирзиёев дар Самарқанд

Сафари Эмомалӣ Раҳмон, раисҷумҳури Тоҷикистон ба Самарқанд барои иштирок дар Ҳамоиши “Осиёи Марказӣ – Иттиҳоди Аврупо” ва мулоқоти ӯ бо роҳбарони минтақа низ аз серхонандатарин гузоришҳо дар соли гузашта буд. Онро беш аз 15 ҳазор бор хондаанд.

ИЗОБРАЖЕНИЕ Эмомалӣ Раҳмон, раисҷумҳури Тоҷикистон бо Урсула фон дер Ляйен

4. Ҷашни Меҳргон дар Душанбе чӣ гуна таҷлил гардид?

Таҷлил аз ҷашни Меҳргон, ки солҳои охир бо ташаббуси мақомоти давлатӣ дар кишвар маъмул шуд, барои хонандагон низ ҷолиб будааст. Гузориши аз ин ҷашн таҳикардаи моро беш аз 15 ҳазор бор хондаанд.

5. Аз роҳбари БДА то сардори милитсияи Конибодому Шоҳ Искандар. Сардорони чанд раёсати калидӣ ва шуъбаҳои ВКД дар минтақаҳо нав шуданд

Хабарҳои марбут ба тағйироти кадрӣ дар Тоҷикистон маъмулан серхонандаанд. Агар он дар пайи интиқоди раисҷумҳур ё ҳаводиси дигаре иттифоқ афтад, таваҷҷуҳба он боз ҳам бештар мешавад. Тағйироти кадрӣ дар ҳайати роҳбарикунандаи ВКД, ки баъди ҳаводиси силсилакушторҳо дар шимоли кишвар иттифоқ афтод, яке аз серхонандатарин матолиби соли гузашта буд, ки қариб 14 ҳазор  маротиба хондаанд.

ИЗОБРАЖЕНИЕ Тағйироти кадрӣ

6. Директори Фурудгоҳи байналмилалӣ бо муовинонаш аз мансаб барканор шуданд. Боз кӣ аз вазифа озод ва мансаби нав гирифт?

Аз вазифа сабукдӯш ва боздошт кардани директори Фурудгоҳи байналмилалии Душанбе, ки баъдар барои тасарруфи ҳудуди 1 млрд сомонӣ муттаҳам шуд, таваҷҷуҳи ҷомеаро ба худ кашид. Хабари аз вазифа озод шудани ӯ дар сомонаи раисҷумҳури кишвар нашр шуд ва сабаби он "ошкор шудани камбудиҳои ҷиддӣ дар фаъолияташон" зикр мешуд.

Баъдтар расонаҳо навиштанд, ки ӯ боздошт шудааст. Дертар директори Оҷонсии зиддифасод тасдиқ кард, ки роҳбари пешини Фурудгоҳи байналмилалии Душанбе барои тасарруфи беш аз 1 млрд сомонӣ пули давлат боздошт шудааст. Баъдтар ин ниҳод аз тағйири чораи ҳабси пешакӣ хабар дод. Хабари аз вазифа сабукдӯш шудани ӯро беш аз 13 ҳазору 700 бор хондаанд.

ИЗОБРАЖЕНИЕ Исматулло Абдуллозода

7. “Пештар обрӯяш бештар буд". Имрӯз омӯзгори тоҷик чӣ мақом дорад ва чӣ тавр онро баланд бардорем?

Баъди таҳияи лоиҳаи Қонуни Ҷуҳурии Тоҷикистон “Дар бораи мақоми омӯзгор” ва пешниҳоди он ба парлумони кишвар, “Азия-Плюс” аз сокинони пойтахт пурсид, ки “Имрӯз омӯзгор дар ҷомеа чӣ мақом дорад ва чӣ тавр онро метавон баланд бардошт?”. Посухи сокинонро беш аз 13 ҳазору 600 маротиба тамошо кардаанд.

8. Маошу нафақа ва идрорпулӣ дар соли 2025 аз кадом ҳисоб зиёд мешаванд?

Поёни соли 2024 Эмомалӣ Раҳмон дар паёми худ ба парлумон дастур дод, ки маошу нафақа ва идрорпулӣ аз моҳи сентябри соли 2025 зиёд карда шавад. Дар ин матлаб мо таҳлил кардем, ки он чанд пул зиёд мешавад, сарчашмаи зиёдшавӣ чӣ аст ва то куҷо метавонад зиндагии аҳолиро тағйир диҳад. Ин матлаби моро қариб 13 ҳазору 500 бор хондаанд.

9.  “Нерӯи нарм”. Русия барои ҳифзи нуфузи худ дар Тоҷикистон аз кадом василаҳо истифода мекунад?

Пас аз оғози ҷанг дар Украина ва таҳримҳои Ғарб, Русия ба Осиёи Марказӣ, аз ҷумла Тоҷикистон таваҷҷуҳи бештар зоҳир кард ва кӯшиш дорад, нуфузашро дар минтақа ҳифз кунад. Аммо ин бор на бо зӯр, балки тавассути таълим, фарҳанг ва тарғиби арзишҳо, ки дар маҷмӯъ “нерӯи нарм” дониста мешавад. Дар ин матлаб мо таҳқиқ кардем, ки Русия аз ин василаҳо чӣ гуна истифода мекунад ва то куҷо муваффақ шудааст. Онро беш аз 13 ҳазору 300 маротиба тамошо кардаанд.

ИЗОБРАЖЕНИЕ

10. “Саркӯбшудаҳо сафед шаванд”. Дар Қирғизистон қонуни офиятбахшии таъқибу саркӯбшудагони замони шӯравӣ қабул шуд

Ин матлаб дар бораи талошҳои ҳамсоякишвари Қирғизистон барои бозбинии таърихи гузашта, махсусан дар замони Шӯравӣ аст. Ин кишвар бо қабули қонун, роҳро барои бозбинии ҳазорҳо парванда, ки дар замони таъқиботи Шӯравӣ бидуни далел ва бар пояи туҳмат боз шуда, ҳазорон танро ба зиндон бурд ё нобуд сохт, боз кард ва имкон дод, ки бегуноҳии садҳо нафар собит шавад. Ин матлабро беш аз 12 ҳазору 500 маротиба хондаанд, ки гувоҳи таваҷҷуҳи сокинони Тоҷикистон ба ин мавзуъ аст.

11. Нархи барқ барои аҳолӣ дар кишварҳои Осиёи Марказӣ чӣ қадар аст?

Дар ин матлаб арзиши барқ дар кишварҳои Осиёи Миёна дар баробари музди меҳнати миёна муқоиса шудааст. Маълум шуд, ки нархи барқ дар Тоҷикистон танҳо аз Ӯзбекистону Қазоқистон арзонтар, аммо аз Қирғизистон гаронтар будааст. Аммо музди меҳнати миёна дар Тоҷикистон камтар аз ҳар кишвари минтақа будааст. ИН матлаби моро беш аз 12 ҳазору 300 бор хондаанд.

ИЗОБРАЖЕНИЕ

12. Ашки шодӣ, рақсу бозӣ, оғӯшгириву дастфишорӣ. Гузориш аз бозшавии сарҳади Тоҷикистону Қирғизистон

Ҳалли баҳси марзи миёни кишварҳои минтақаи Осиёи Марказӣ, аз ҷумла миёни Тоҷикистон ва Қирғизистон, ки дар солҳои гуногун боиси низоъ ва кушта шудани садҳо нафар шуда буд, яке аз ҳаводиси муҳими соли гузашта буд. Дар пайи ҳалли баҳси марзӣ, гузаргоҳҳои сарҳади миёни Тоҷикистон ва Қирғизистон, ки чанд муддат ин ҷониб баста буд, боз шуд ва мо аз ин рухдод гузориш омода кардем, ки онро қариб 12 ҳазору 300 бор хонданд.

13.Волидайни Рухшона Ҳакимова барои додхоҳӣ ба Эмомалӣ Раҳмон муроҷиат кардаанд

Волидайни Рухшона Ҳакимова, рӯзноманигори тоҷик, ки моҳи феврали соли гузашта бо иттиҳоми “хиёнат ба давлат” 8 сол равонаи зиндон шуд, бо ирсоли як мактуб аз Эмомалӣ Раҳмон, раисҷумҳури Тоҷикистон хостаанд, ки баҳри озодии ӯ иқдом кунад. Ин мактуб дар шабакаҳои иҷтимоӣ нашр шуд ва мо онро дар сомонаи хуб бознашр кардем, ки қариб 12 ҳазору 300 маротиба хонда шуд.

ИЗОБРАЖЕНИЕ Рухшона Ҳакимова

14. Чаро Осиёи Марказӣ барои Эрон муҳим аст?

Дар пайи тақвияти равобити Эрон бо кишварҳои Осиёи Марказӣ, афзоиши гардиши мол миёни ҷонибҳо мо талош кардем ба ин суол, ки “Чаро Осиёи Марказӣ барои Эрон муҳим аст?” посух ёбем. Ҳамчунин, дақиқ кунем, ки аз рушди равобит бо Эрон кишварҳои минтақа чӣ манфиат мебардоранд. Ин матлабро беш аз 12 ҳазор бор хондаанд.

ИЗОБРАЖЕНИЕ Акси марбут

15.Барномаи пешгирӣ ва назорати бемориҳои саратон дар Тоҷикистон тасдиқ шуд

Соли гузашта дар Тоҷикистон Барномаи пешгирӣ ва назорати бемориҳои  саратон  дар кишвар барои солҳои 2025-2029 қабул шуд. Хабари қабули ин барномаро қариб 12 ҳазор бор хондаанд.

PS: Хонандагони гиромӣ, умедворем, соли шумо низ бобарор гузашт, онро хуб ҷамъбаст карда, хулоса ва нақшаҳои соли ояндаатонро  маълум кардед. Бо мо бимонед, ваъда медиҳем, ки шуморо аз охирин ва муҳимтарин хабарҳои Тоҷикистон ва ҷаҳон огоҳ хоҳем кард ва онҳоро барои шумо шарҳ хоҳем дод. Рисолати мо расонидани хабари сареъ ва боэътимод ба хонандаи худ аст, ки ҳамоно ба он пойбандем.

Маҳмурод Ашӯров, кӯҳнаварде, ки соли 1969 дар минтақаи Сағирдашт Назурбибӣ, духтараки 7-солаи бо тайёра ба садама дуҷоршударо наҷот дод ва то чанд рӯзи пеш ӯро меҷуст, бо гузашти 57 сол ӯро пайдо кард.

Қиссаи наҷоти Назурбибии 7-соларо Маҳмурод Ашӯров ду ҳафта пеш ба “Азия-Плюс” нақл кард ва гуфт, он “духтаракро меҷӯям, аммо то ҳол наёфтаам”.

“Азия-Плюс” ин қиссаро таҳти унвони “Аввалин тоҷики фотеҳи қуллаи “Исмоили Сомонӣ”. Маҳмурод Ашӯров чаро Назурбибиро меҷӯяд?” нашр кард. Баъди нашри мавод, Назурбибӣ аз худ дарак дод ва ба дидори наҷотбахши худ – Маҳмурод Ашӯров рафт.

Мо аз ин мулоқот гузориш омода кардем:

Дар Telegram, Facebook, Instagram бо мо бимонед.

Шаби 31-уми декабри соли 2025 ба 1-уми январи соли 2026, яъне шаби Соли нав дар Тоҷикистон 698 кӯдак таваллуд шудааст. Бештари ин тифлон дар вилояти Хатлон ва теъдоди ками онҳо дар Вилояти Мухтори Кӯҳистони Бадахшон (ВМКБ) ба дунё омадаанд.

Дар ин бора аз Раёсати ташкили хидматрасонии тиббӣ ба модарону кӯдакон ва танзими оилаи Вазорати тандурустӣ ва ҳифзи иҷтимоии аҳолӣ ба “Азия-Плюс” хабар доданд.

Ба гуфтаи манбаъ, дар шаби Соли нав

– дар вилояти Хатлон – 248 кӯдак,

– дар вилояти Суғд – 162 кӯдак,

– дар ВМКБ – 8 кӯдак,

– дар шаҳри Душанбе – 120 кӯдак,

– дар шаҳру ноҳияҳои тобеи ҷумҳурӣ – 160 кӯдак зода шудааст.

Аз ин ниҳод гуфтанд, ки дар шаби Соли нави 2025-ум 610 кӯдак таваллуд шуда буд.  

Бояд гуфт, ки дар шаш моҳи аввали соли гузашта дар Тоҷикистон 117 ҳазору 932 кӯдак таваллуд шудааст, ки назар ба ҳамин давраи соли 2024-ум (114 ҳазору 627) 3 ҳазору 305 тифл зиёд мебошад.

Ҳамчунин, дар ин давра 17 ҳазору 387 нафар дар Тоҷикистон фавтидааст, ки дар муқоиса ба нимаи якуми соли гузашта (16 ҳазору 778 фвт) 609 фавт бештар аст.

То 1-уми июли соли 2025 теъдоди аҳолии Тоҷикистон бо дарназардошти сабти таваллуд, фавтида ва муҳоҷират ба 10 млн 603,8 ҳазор нафар расидааст. Тибқи иттилои Оҷонсии омори кишвар ин теъдод нисбат ба ҳамин давраи соли 2024-ум (10 млн 505,9 ҳазор) 98,9 ҳазор нафар ё 2,1% зиёд будааст.

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани маҷмуъи ҳикояҳои Юнус Юсуфӣ, Нависандаи халқии Тоҷикистон оғоз кард. Дар нашри навбатӣ, қисми якуми ҳикояи “Хоб” манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин ва ҳикояҳои Антон Чеховро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани роман ва ҳикояҳои китоби "Киштии Нӯҳ"-и Юнус Юсуфӣ оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ ва “Телеграм”-и радиои “Азия-Плюс” метавонед, гӯш кунед.

Дар Telegram, Facebook ва Instagram бо мо бимонед.