Ҷопон барои татбиқи ду лоиҳа дар бахшҳои гумрук ва энергертика ба Тоҷикистон тақрибан 8.8 миллион доллари амрикоӣ маблағ ҷудо кардааст. Созишномаи грантӣ дар остонаи Муколамаи “Осиёи Марказӣ + Ҷопон”, ки Эмомалӣ Раҳмон, раисҷумҳури кишвар низ иштирок дошт, ба имзо расидааст.

Ба иттилои Оҷонсии Ҷопон оид ба ҳамкориҳои байналмилалӣ (JICA), маросими имзои созишномаҳо рӯзи 10-уми декабр дар Вазорати молияи Тоҷикистон дар Душанбе бо иштироки Файзиддин Қаҳҳорзода, вазири молияи Ҷумҳурии Тоҷикистон ва роҳбари намояндагии JICA дар Тоҷикистон Имаи Сейдзю сурат гирифтааст.

Тибқисозишномаҳо, Ҷопон барои татбиқи “Лоиҳаи такмил додани таҷҳизот барои нусхабардории мол дар гумруки ноҳияи Спитамен дар масири байналмилалии нақлиётии Транскаспий” 8,6 миллион доллар ва “Лоиҳаи сохтмони зеристгоҳ барои системаи асосии шабакаи барқ дар Душанбе” (Тарҳи муфассалӣ лоиҳа) 260 ҳазор доллар маблағгузорӣ мекунад.

ИЗОБРАЖЕНИЕ Акиҳико Танака ва Эмомалӣ Раҳмон

Ба иттилои манбаъ, лоиҳаи таҷҳизот барои нусхабардории мол барои беҳтарсозии пайвастагии нақлиётӣ, тақвияти амнияти иқтисодӣ ва баланд бардоштани самаранокӣ ва шаффофияти идоракунии давлатӣ равона шудааст.

Дар доираи “Лоиҳаи зеристгоҳ барои беҳтар кардани эътимоднокии таъминоти барқ ​​дар Душанбе” сохтани зеристгоҳи нави 220 кВ ва таъмини устувори барқ ​​дар пойтахти кишвар дар назар аст.

Ба иттилои оҷонсӣ, интизор меравад, ки сохтмон пас аз анҷоми тарҳи муфассали лоиҳа оғоз шавад.

“Ин ду лоиҳа тавассути афзоиши иқтидори нақлиётӣ ва транзитӣ, инчунин эътимоднокии таъминоти барқ ба рушди иқтисодӣ ва иҷтимоии кишвар мусоидат мекунанд”, – навиштааст манбаъ.

Бояд гуфт, 19-уми декабри имсол Эмомалӣ Раҳмон, раисҷумҳури кишвар дар ҳошияи Муколамаи "Осиёи Марказӣ + Ҷопон" дар Токио бо Акиҳико Танака, президенти Оҷонсии Ҷопон оид ба ҳамкориҳои байналмилаӣ (JICA) мулоқот кард.

Дар доираи ин сафари расмӣ ба Ҷопон, дар маҷмуъ наздики 20 санади нав ба имзо расид.

Дар Telegram, Facebook ва Instagram бо мо бимонед.

Фаромадани тормеғ ё тумани ғафс, ки аз шоми 22-юми декабр то субҳи имрӯз, 23-юми декабр давом кард, боиси ба таъхир афтодани чанд парвоз дар фурудгоҳи байналмилалии Душанебе шудааст.

Бар асоси лавҳаи онлайнии фурудгоҳи Душанбе аз ҷумла парвозҳо ба самти Маскав, Дубай, Екатеринбург, Олмотӣ ва баръакс аз соати 12-и шаби 22 ба 23-юми декабр ба таъхир афтодааст. Ҳамчунин, дар бало зикр шудааст, ки паврозҳо ба Истанбул ва Самар ҳам ки имрӯз баъди зуҳр бояд парвоз кунад, ба таъхир афтодааст.

Ҳамчунин, Радиои Озодӣ менависад, ки парвоз ба шаҳри Хоруғ, ки тибқи ҷадвали фурудгоҳ имрӯз, соати 12:20 ба нақша гирифта шуда буд, низ лағв шудааст.

Ҳоло маълум нест, ки парвозҳои ба таъхир афтода барқарор шудаанд ё не. Аз фурудгоҳ то ҳол шаҳр надоданд.

Қаблан, Оҷонсии ҳавошиносии Тоҷикистон гуфта буд, ки то 24-уми декабр дар минтақаҳои гуногуни Тоҷикистон, аз ҷумла, шаҳри Душанбе, шаҳру ноҳияҳои тобеи ҷумҳурӣ, вилоятҳои Суғду Хатлон фаромадани тормеғ (туман)-у тарма, яхбандии роҳҳо ва яхшабнам пешгӯӣ мешавад.

Ба гуфтаи манбаъ, шабона ва саҳаргоҳон бадшавии дурии биниш то 100-300 метр дар назар буда, ин ҳодисаҳои табиӣ метавонанд ба мушкил шудани ҳаракати мошинҳо дар роҳҳо ва афзоиши хатари садамаҳои нақлиётӣ оварда расонанд.

Ҳавошиносон, ҳамчунин, гуфтаанд, ки рӯзҳои 23 ва 24-уми декабр дар шоҳроҳи Душанбе – Чаноқ, мавзеи Майхураи ноҳияи Варзоб ва баъзе минтақаҳои алоҳидаи ноҳияҳои тобеи ҷумҳурӣ хатари фаромадани тарма боқӣ мемонад.

Оҷонсии ҳавошиносии кишвар, ба ронандагон тавсия додааст, ки меъёри суръати ҳаракатро риоя карда, масофаи байни мошинҳоро зиёд ва аз чароғҳои наздик истифода кунанд. Ин ниҳод ба пиёдагардон маслиҳат додааст, ки ҳангоми ҳаракат дар қитъаҳои яхбандии роҳ эҳтиёткор бошанд. 

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани маҷмуъи ҳикояҳои Юнус Юсуфӣ, Нависандаи халқии Тоҷикистон оғоз кард. Дар нашри навбатӣ, қисми дуввуми ҳикояи “Медал” манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин ва ҳикояҳои Антон Чеховро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани роман ва ҳикояҳои китоби "Киштии Нӯҳ"-и Юнус Юсуфӣ оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ ва “Телеграм”-и радиои “Азия-Плюс” метавонед, гӯш кунед.

Дар Telegram, Facebook ва Instagram бо мо бимонед.

ЯК РӮЗИ ТАЪРИХ – 23 ДЕКАБР

Соли 1959 – Дар фурудгоҳи Сталинобод нахустин ҳавопаймои "ИЛ-18" фуруд омад.

Соли 2011 – Ширкати “Тоҷик Эйр” бори нахуст дар ИДМ ба истифодаи ҳавопаймоҳои тамғаи "МА-60" оғоз кард.

Соли 2012 – Раҳбари ҷунбиши мухолифини “Гурӯҳи 24” Умаралӣ Қувватов дар фурудгоҳи Дубай боздошт шуд ва чанде пас озод карда шуд. Ӯ соли 2015 дар Туркия кушта шуд.

Соли 2012 – Саидҷаъфар Усмонзода раиси Ҳизби демократи Тоҷикистон (ҲХД) интихоб шуд. Ӯ, ки вакили парлумон аз ҲДТ буд, рӯзи 12-уми июни соли 2024 аз ҷониби Додситонии кули кишвар боздошт ва соли равон  бо ҳукми Додгоҳи олӣ аз ҷумла, бо иттиҳоми ғасби ҳокимият бо роҳи зӯравоварӣ 27 сол равонаи зиндон гардид.

Рӯзи 14-уми июн дар бораи аз ҳуқуқи дахлнопазирӣ маҳрум ва ба ҳабс гирифта шудани ӯ ба вакилони парлумон Юсуф Раҳмон, додситони кулли кишвар иттилоъ дод. Додситонӣ дар назди вакилон гуфт, ки нисбати Саидҷаъфар Усмонзода “барои бо зӯроварӣ ғасб намудани ҳокимият” ё моддаи 306 қисми 2 банди в парвандаи ҷиноятӣ боз шуда, тафтишот идома дорад.

ИЗОБРАЖЕНИЕ Саидҷаъфар Усмонзода беш аз 6 боз дар ҳабси пешакӣ аст.

Дар робита ба фаъолияти сиёсӣ ва боздошту ҳабси Саидҷаъфар Усмонзода дар мақолаи “Аз соҳибкорӣ ва ноустуворӣ дар сиёсат то вакиливу боздошт. Усмонзода кист ва чаро боздошт шуд?” хонед.

Соли 2018 – Фаррух Амонатов, шоҳмотбози тоҷик дар мусобиқаи байнулмилалии шоҳмот дар Чили зинаи сеюмро ишғол кард.

Соли 2020 – Дар вилояти Суғд хатти интиқоли газ ба истифода дода шуд, ки тавассути он гази Ӯзбекистон, ки дар тӯли 10 соли охир ба Тоҷикистон ворид намешуд, дубора интиқол ёфт.

ШАХСИЯТҲО

Соли 1910 – Мавлуди Николай Лесной, шоири русзабони Тоҷикистон.

Соли 1953 – Зодрӯзи Ҷумъахон Сироҷов, ҳунарпешаи шинохтаи тоҷик.

Фориғуттаҳсили Омӯзишгоҳи педагогии шаҳри Кӯлоб (1972) ва Донишкадаи давлатии санъати ба номи М. Турсунзода (1976) мебошад. Муддате ба сифати коргардони Театри халқии ноҳияи Мӯъминобод кор карда, солҳои 1979—1999 актёри Театри мусиқӣ-мазҳакаи шаҳри Кӯлоб буд. Аз соли 2000 омӯзгори Коллеҷи мусиқии ба номи А. Бобоқулов шаҳри Душанбе аст.

Ҷумъахон Сироҷов қариб 20 сол дар намоиши ҳаҷвии “Очаи Бика ва Зика” ҳамроҳи Толибҷон Бобоев дар саҳнаи ҳунари тоҷик нақш офаридаааст. Маҳз ин нақш ӯро дар таърихи санъати тоҷик нотакрор гардонид.

Ҳамчунин, ӯ яке аз ҳунарпеша ва коргардонҳои маъруфи тоҷик буда, дар филмҳои зиёде бо иҷрои нақшҳои асосӣ ва ба рӯйи саҳна овардани намоишномаҳои зиёд мавқеъ касб кардааст.

ИЗОБРАЖЕНИЕ Ҷумъахон Сироҷов дар намоиши "Очаи Бика ва Зика"

Ӯ дар беш аз панҷоҳ намоишнома, амсоли “Мӯъҷизаи муқаррарӣ”, “Писари калонӣ”, “Мукофот”, “Фишор”, “Зани оҳанин”, “Найрангҳои Скапен”, “Дар чорсӯ” нақшҳои марказӣ бозида, намоишномаҳои “Чароғи маърифат”, “Бе пир марав”, “Аз хок баромадему бар хок шудем”, “Ҳафтзарб”-ро рӯи саҳна овардааст.

Соли 1970 – Зодрӯзи Муҳиддин Нуриддин, ректори Донишгоҳи давлатии тиббии Тоҷикистон ба номи Абуалӣ ибни Сино.

ИЗОБРАЖЕНИЕ Муҳиддин Нуриддин

Муҳиддин Нуриддин, ки дар баробари ректори Донишгоҳи давлатии тиббии Тоҷикистон будан, вакили Маҷлиси миллии Тоҷикистон низ ҳаст. Ӯ таҳсилкардаи Донишгоҳи давлатии тиббии Тоҷикисон ба номи Абуалӣ ибни Сино буда, солҳо дар ин донишгоҳ дар вазифаҳои гуногун кор кардааст.

Аз соли 2009 дар Беморхонаи шаҳрии клиникии ба номи академик Тоҷиев, аввал ҳамчун ҷарроҳ ва сипас дар вазифаи мудири шуъбаи ҷарроҳӣ фаъолият кардааст.

Аз соли 2015 то соли 2024 ректори Донишкадаи таҳсилоти баъдидипломии кормандони соҳаи тандурустии Тоҷикистон, ҳамзамон, профессори кафедраи бемориҳои ҷарроҳӣ ва эндоҷарроҳии донишкадаи мазкур буд.

Муҳиддин Нуриддин солҳои 2024-2025 муовини ректори Донишгоҳи давлатии тиббии Тоҷикисон ба номи Абуалӣ ибни Сино буда, соли 2025 ректори ин боргоҳи улуми тиб таъин гардид.

Соли  1981 – Мавлуди Мансур Каримзода, раиси ноҳияи Файзобод.

ИЗОБРАЖЕНИЕ Мансур Каримзода

Мансур Каримзода хатмкардаи Донишгоҳи технологии Тоҷикистон дар бахши кишоварзӣ буда, солҳо дар Донишгоҳи аграрии Тоҷикистон дар кишварҳои гуногун фаъолият кардааст.

Солҳои 2017-2021 муовини якуми раиси ноҳияи Файзобод ва солҳои 2022-2024 муовини раиси шаҳри Ваҳдат буд. Каримзода моҳи январи соли 2024 раиси ноҳияи Файзобод таъин шуд.

Соли 1988 –  Шавкат Ҳарисов, нависанда ва узви ИН Тоҷикистон аз олам даргузашт.

Соли 2003 –  Муҳаммад Бобохоҷаев, доктори илмҳои тиб аз олам даргузашт.

САНАҲОИ МУҲИМИ ҶАҲОНӢ

Дар Ҷанги Бузурги Ватанӣ (ҶБВ) муҳорибаи Днепр ба охир расид. Ин муҳориба маҷмуи амалиёти кушунҳои шӯравӣ барои аз истилогарони немис озод кардани Украинаи соҳили чап буд, ки аз 26 август то 23 декабри соли 1943 идома кард. Муҳорибаи Днепр яке аз муҳорибаҳои калонтариниҶБВ буд.

ИЗОБРАЖЕНИЕ

Дар ҳамин рӯз физикхои америкоӣ аввалин транзисторро дар ҷаҳон муаррифӣ карданд. Онҳо Уилям Шокли, Ҷон Бардин ва Уолтер Браттейн буданд. Соли 1956 ин олимон барои таҳқиқоти нимноқилҳо ва кашфи эффекти транзисторӣ соҳиби ҷоизаи Нобел гардиданд.

ИЗОБРАЖЕНИЕ Олимоне, ки аввалин транзисторро муаррифӣ карданд

ВАЗЪИ ҲАВО

Дар вилояти Суғд – Ҳавои тағйирёбанда пешгӯӣ шуда, дар баъзе ноҳияҳо барф борида, дар ноҳияҳои алоҳида тормеғ (туман) мефарояд. Ҳарорат: дар водиҳо шабона 0-5º сард, рӯзона -2+3º, дар ноҳияҳои кӯҳӣ шабона 7-12º сард, рӯзона 1-6º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо шабон 1-6º сард, рӯзона 4+9º гарм, дар доманакӯҳҳо шабона 2-7º сард, рӯзона -1+4º.

Дар шаҳру ноҳияҳои тобеи ҷумҳурӣ – Ҳавои тағйирёбанда, дар водиҳо бебориш, дар ноҳияҳои алоҳидаи кӯҳӣ барф борида, дар баъзе ноҳияҳо тормеғ мефарояд. Ҳарорат:о дар водиҳо шабона 0-5º сард, рӯзона 2+7º гарм, дар ноҳияҳои кӯҳӣ шабона 3-8º сард, рӯзона -2+3º.

Дар Вилояти Мухтори Кӯҳистони Бадахшон – Ҳавои тағйирёбанда, шабона дар баъзе ноҳияҳо борида, рӯзона ҳавои бебориш дар назар аст. Ҳарорат: дар ғарби вилоят шабона 5-10º сард, дар баъзе ноҳияҳо то -1+1º, рӯзона -2+3º, дар шарқи вилоят шабона 13-18ºсард, рӯзона 5-10º сард.

Дар шаҳри Душанбе – Ҳавои тағйирёбандаи бебориш пешгӯӣ мешавад. Ҳарорат: шабона 3-5º сард, рӯзона 5+7º гарм.

Дар шаҳри Хуҷанд – Ҳавои тағйирёбанда, шабона барф борида, рӯзона ҳавои бебориш ва тормеғ дар назар аст. Ҳарорат: шабона 2-4º сард, рӯзона 1+3º гарм.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: шабона 1-3º сард, рӯзона 7+9º гарм.

Дар шаҳри Хоруғ – Ҳавои тағйирёбанда, шабона асосан бебориш (0,0-0,5мм) ва рӯзона бебориш пешгӯӣ мешавад. Ҳарорат: шабона 5-7º сард, рӯзона 1+3º гарм.

Дар Telegram, Facebook, Instagram, OK ва ВК бо мо бимонед.

Ба Нилуфар Сафоева (қаблан насаби ӯ Алиева зикр шуда буд), модари Қобилҷон Алиев, навраси даҳсолаи тоҷик, ки дар мактабе дар канораи Маскав аз сӯйи як навраси 15-сола ва шаҳрванди Русия кушта шуд, аз сӯйи ҳукумати Тоҷикистон хона тақдим шудааст.

Дар ин бора яке аз пайвандони Қобилҷон Алиев ба хабарнигорони “Азия-Плюс”, ки имрӯз ба хонаи навраси кушташуда рафта буданд, хабар дод. Аммо ӯ аз ироаи ҷузъиёти тақдими хона худдорӣ кард. Ба “Азия-Плюс” ин хабарро манобеи дигар тасдиқ ё рад накарданд.

Шерзод Ализода, яке аз пайвандони Қобилҷон Алиев гуфт, ки “хонаро аз номи ҳукумати кишвар тақдим карданд”, аммо бештар аз он иттилоъ надод ва нагуфт, ки он аз номи кӣ дода шудааст.

Дар ҳамин ҳол, як манбаи огоҳ ба “Азия-Плюс” гуфт, ки субҳи имрӯз чанде аз мақомдорони сатҳи болои кишвар ба назди хонаводаи Қобилҷон Алиев рафта, ҳамдардӣ баён кардаанд. Аммо ӯ ҳам дақиқ нагуфт, ки мушаххас кадоме аз мақомдорон рафтааст.

ИЗОБРАЖЕНИЕ Маросими бахоксупории Қобилҷон Алиев

Талоши мо барои дақиқ кардани он ки хонаро ҳукумати кишвар ё шаҳрдории пойтахт додааст, бенатиҷа анҷомид.

Ҳамчунин, Шерзод Ализода гуфт, ки “ба ҷамъоварии маблағ ниёз надоранд ва ҳоло ҳеҷ суратҳисобе барои ҷамъоварии маблағ аз номи онҳо боз нашудааст”.

“Аз ҳамаи онҳое, ки кумак карданд ва мехоҳанд кумак кунанд, сипосгузорем. Дар баробари ин, мехоҳем ҷомеа огоҳ бошад, ки ҳоло ба кумак ниёз надорем ва суратҳисоби бонкие, ки ба номи модари Қобилҷон боз шуда буд, баста аст. Аз ин лиҳоз, хоҳиш мекунем ба ҳеҷ суратҳисоби бонкӣ пул нафиристанд”, – гуфтанд пайвандони Қобилҷон Алиев.

Бояд гуфт, ки пайвандони Қобилҷон Алиев сахт мотамзада буданд ва аз суҳбати бештар бо хабарнигорон худдорӣ карданд.

Хонае, ки пайкари Қобилҷонро аз он берун оварда, ба хок супориданд, кушода ва то ҳол серодам аст. На танҳо аз ноҳияи Шаҳринав, балки аз манотиқи дигари кишвар ҳам сокинон барои ибрози ҳамдардӣ меомаданд.

Ёдовар мешавем, ки Қобилҷон Алиев 16-уми декабр дар мактабе дар вилояти Маскав бар пояи “нафрати миллӣ” кушта шуд. Ҷасади ӯ рӯзи 18-уми декабр ба Тоҷикистон оварда шуда, ҳамон рӯз дар зодгоҳаш деҳаи Аҷами ноҳияи Шаҳринав ба хок супорида шуд.

Кумитаи тафтишоти Русия дар робита ба ин куштор як шаҳрванди 15-сола ва шаҳрванди Русияро боздошт карда, нисбат ба ӯ бо иттиҳоми куштор ва сӯиқасд ба куштор (моддаҳои 105 қисми 3, моддаи 30 қисми 2 Кодекси ҷиноии Русия) парванда боз карда, бо қарори додгоҳ, барои 2 моҳ ба ҳабси пешакӣ гирифт.

Мақомоти Тоҷикистон ин кушторро маҳкум карда, ба мақомоти Русия “нота” ва барои таҳқиқи беғаразонаву саривақтии ҷиноят дархосту мактуб ирсол карданд.

Ин бори аввал нест, ки як кӯдаки тоҷик дар Русия бар пояи бадбинии нажодӣ ва аз сӯйи миллатгароён кушта мешавад. Дар 22 соли ахир ҳадди ақал 6 куштори бераҳмонаи кӯдакони тоҷик дар Русия расонаӣ шуданд.

Коршиноси бахши муҳоҷират мегӯяд, ки ин кушторҳои бераҳмона аз сӯйи миллатгароёну тундгароён натиҷаи ташаккули фазои муҳоҷирситезӣ ва беҷазоӣ барои нажодпарастӣ дар Русия аст.

Дар Telegram, Facebook ва Instagram бо мо бимонед.

Бори аввал ва ба муносибати Соли нав филми ҳунарии “Дов” манзури сокинони Тоҷикистон мегардад. Сокинони кишвар метавонед ин филмро аз 1-уми январ дар пойгоҳи “Оила ТВ” тамошо кунанд.

Дар ин бора Муҳиддини Музаффар, коргардони филм ба “Азия-Плюс” иттилоъ дода, гуфт, ки он соати 18:00-и рӯзи 1-уми январ дар пойгоҳи “Оила ТВ” дастраси ҳама бинандагон хоҳад шуд.

“Филми “Дов” пас аз сайри ҷаҳон акнун бори аввал дастраси ҳамаи ҳаводорони синамо мешавад. Қаблан, бинандагон онро танҳо дар толорҳои синамоӣ медиданд. Акнун метавонанд онро дар хонаву коргоҳ ё ҷои дигар нишаста дар экрани телевизор, компютер ё телефониҳои худ бинанд”, – гуфт коргардон.

Филми ҳунарии “Дов” бо коргардонии Муҳиддини Музаффар моҳҳои апрел-майи соли 2021 дар шаҳрҳои Конибодом ва Исфара наворбардорӣ шудааст.

Филм дар бораи ду рафиқ – Қаҳҳор (Абдумуъмин Шарифӣ) ва Маннон (Салоҳиддин Шукурзода) қисса мекунад, ки пас аз пошхӯрии Иттиҳоди Шӯравӣ, дар солҳои 90-ум барои таъмини зиндагӣ ба ғайр аз касби худ, роҳҳи дигари даромадро ҷӯё мешаванд.

Дар ин миён, яке аз рафиқон соҳиби лоторея мешавад ва ба ивази маблағ ба дӯсташ медиҳад. Филм атрофи ҳамин дов ё омад дар лоторея давр мезанад, ки он оқибат дӯстии ин ду нафарро барҳам мезанад. Бо гузашти вақт ҳарду хатогии якдигарро дарк мекунанд, вале барои пушаймонӣ дер шуда буд…

Нахустнамоиши филми ҳунарии “Дов” дар Тоҷикистон, шоми 28-уми октябри соли 2023 дар кинотеатри “Ватан” баргузор гардида буд. Баъд аз ин, “Дов” тӯли 2 сол дар чандин кишварҳои ҷаҳон намоиш дода шуд.

Давоми 2 сол ин филми тоҷикӣ дар 33 ҷашнвораи байналмилалӣ роҳ ёфт ва аз он 27 ҷоизаи байналмилалӣ ба даст овард. Аз ҷумла, 4 ҷоизаи байналмилалии “Беҳтарин филм”-ро ба даст овард, ки ҷоизаи асосии ҷашнвораҳои байналмилалӣ маҳсуб мешавад.

Ёдовар мешавем, ки пас аз муваффақияти  филми “Дов”, коргардони он моҳи ноябри соли 2023 коргоҳи филмбардории “Довфилм”-ро таъсис дод.

Дар Telegram, Facebook ва Instagram бо мо бимонед.