ЧОРАБИНИҲОИ МУҲИМ

– Имрӯз соати 15:00 дар Театри академии русии ба номи Маяковский намоишномаи “Найрангҳои Скапен” (“Плутни Скапена”) ба саҳна гузошта мешавад. Арзиши чипта 25 сомонӣ аст.

– Имрӯз соати 17:00 дар Театри опера ва балети ба номи Садриддин Айнӣ шоми мусиқии Содиқ Нуруллоев, Ҳунарпешаи шоистаи Тоҷикистон баргузор мешавад. Консерт бо унвони “Нозам аз бахти баланд…” ба муносибати 35-солагии Истиқлолияти давлатӣ доир мешавад.

Гуфта мешавад, ки Содиқ Нуруллоев ва аҳли эҷоди театр ҳам арияҳо аз операҳои машҳур ва ҳам сурудҳои ватании маҳбубро иҷро мекунанд. Арзиши билет аз 30 то 50 сомонӣ буда, аз хазинаи театр (2216291) ва ё сомонаи Echipta.tj метавон дастрас кард.

ЯК РӮЗИ ТАЪРИХ

Соли 2002 – Дар Душанбе бори аввал вохӯрии донорҳо ва муассисаҳои молиявии байналмилалӣ бо намояндагони сохторҳои давлатӣ ва тиҷоратии Тоҷикистон баргузор гардид.

Соли 2008 – Фармони президент дар бораи “Вокуниши шахсони мансабдор ба маводи танқидӣ ва таҳлилии воситаҳои ахбори омма” ба имзо расид. Дар асоси он мансабдорон уҳдадоранд, ки ба ҳар як мақолаи танқидӣ ва таҳлилии рӯзноманигорон вокуниш кунанд. Чизе ки дар амал қариб, ки иҷро намешавад.

Соли 2018 – Маҷлиси намояндагони Тоҷикистон маҳдудияти синнусолиро барои номзадҳо ба мақоми президентӣ тасдиқ кард. Акнун номзад бояд на камтар аз 30-сола бошад.

Соли 2019 – Маҷлиси намояндагони Тоҷикистон тағйирот ба қонун “Дар бораи хизмати давлатӣ”-ро қабул кард. Мувофиқи он минбаъд шахсоне, ки қаблан барои содир кардани ҷинояти қасдан содиршуда маҳкум шудаанд, ҳаққи кор дар мақомоти давлатиро надоранд.

Соли 2020 – Роҳбарияти “Тоҷик Эйр” эълон кард, ки тақрибан нисфи кормандонаш бинобар ихтисор ва ба нафақа рафтан аз даст додааст.

Соли 2022 – Роҳбари Кумитаи меъморӣ ва сохтмони Тоҷикистон изҳор дошт, ки “нақшаи генералии Душанбе ҳуҷҷати махфӣ мебошад”.

Соли 2022 – Сафири нави Белгия дар Тоҷикистон ба Душанбе омад.

ШАХСИЯТҲО

Соли 1910 – Мавлуди Миркарим Саидов, коргардони тоҷик, Ҳунарпешаи шоистаи Тоҷикистон.

Соли 1947 – Зодрӯзи Неъмат Халилов, коргардони телевизион.

Соли 1949 – Мавлуди Маҳбуба Неъматзода, шоири тоҷик.

ИЗОБРАЖЕНИЕ Маҳбуба Неъматзода

Маҳбуба Неъматзода, ки асосан барои кӯдакону наврасон эҷод мекунад, Донишгоҳи давлатии Тоҷикистонро бо ихтисоси рӯзноманигорӣ хатм ва минбаъд дар ин ришта фаъолият кардааст.

Ӯ муаллифи чандин китобҳои шеъру ҳикоя ва афсонаҳо буда, маҷмуаҳои “Духтари заргар”, “Меҳрубон”, “Гиря кунам ё ки на?”, “Модари ҷон, модарам” аз ҷониби кӯдакону наврасон хуш пазируфта шудаанд.

Соли 1961 – Мавлуди Ҷовид Муқим рӯзноманигор ва нависандаи тоҷик.

ИЗОБРАЖЕНИЕ Ҷовид Муқим

Имрӯз мавлуди журналисти шинохтаи тоҷик Ҷовид Муқим (Муҳаммадӣ Муқимов) аст. Корномаи рӯзноманигории ӯ басо чашмрас аст ва солҳо дар рӯзномаҳои “Паёми Душанбе”, “Тоҷикистон”, “Нерӯи сухан” ва Радиои Озодӣ фаъолият кардааст.

Ӯ яке аз аввалин хабарнигорони Радиои Озодӣ дар Тоҷикистон буд ва дар солҳои 1990-ум бо риояи тавозун дар матолибаш аз рухдодҳои ҷанги шаҳрвандӣ шинохтатар ҳам шуд.

Аз кори амалии рӯзноманигорӣ ба тадрис рӯ овард ва ҳоло доктори улуми филология, профессори факултаи журналистикаи ДМТ мебошад. Дар омода кардани рӯзноманигорони ҷавон ва кадрҳои илмӣ саҳми бориз гузоштааст.

Муаллифи беш аз 1000 маводи журналистӣ, 75 мақолаи илмӣ, 5 монография ва даҳҳои дастурҳои таълимӣ аст.

Ҷовид Муқим ба эҷоди бадеӣ низ машғул буда, 5 китобаш бо номҳои “Вақте мард мегиряд” (2007), “Ишқи деромада” (2008), “Ишқи мӯйсафед” (2012), “Қасос” (2013), “Хиёнат” (2015) ба чоп расидаанд.

Узви Иттифоқи журналистони Тоҷикистон ва Иттифоқи нависандагони Тоҷикистон ва барандаи Ҷоизаи Лоҳутӣ мебошад.

Соли 1980 – Зодрӯзи Муҳаммадрабии Исмоил, коргардони тоҷик.

Муҳаммадраббии Исмоил яке аз коргардонҳои пурмаҳсули тоҷик буда, фитлмҳои офаридааш дар чандин ҷашнвораҳои байналмилалӣ иштирок ва соҳиби ҷоиза гардидаанд.

ИЗОБРАЖЕНИЕ Муҳаммадрабии Исмоил

Ӯ баъди хатми Донишкадаи давлатии фарҳанг ва санъати Тоҷикистон ба номи Мирзо Турсунзодаро бо ихтисоси коргардони телевизион ва радио солҳо дар Телевизиони Тоҷикистон, Симои мустақили Тоҷикистон, ТВ "Сафина" ҳамчун коргардон ва саркоргардон кор кардааст. Аз соли 2016 инҷониб саркоргардони телевизиони “Синамо” буд ва ҳоло дар “Тоҷикфилм” ба фаъолияти ҳунарӣ машғул аст.

“Иштибоҳ”, “Сенздаҳ солу се моҳ”, “Сарнавишт”, “Фасли рӯъё”, “Муфаттиш”, “Бозии тақдир”, “Охирин сайди сайёд” аз маъруфтарин филмҳое мебошанд, ки бо коргардонии ӯ рӯйи пардаи синамо омадаанд.

Соли 1988 – Мавлуди Нозияи Кароматуллоҳ, овозхони шинохтаи тоҷик.

ИЗОБРАЖЕНИЕ Нозияи Кароматулло

Ӯ фарзанди Кароматуллоҳ Қурбонов, сарояндаи маъруфи тоҷик буда, дар мактаби мусиқии ба номи Малика Собирова ва Консерваторияи Ҳиндустон таҳсил кардааст.

Ӯ соли 2006 ба саҳнаи санъати тоҷик қадам ниҳода, то имрӯз чандин сурудҳои марғуб офаридааст. Таронаҳои “Нагӯ, нагӯ”, “Бе ту мемирам”, “Майда, майда”, “Биёӣ”, “Дареғ” намунаи таронаҳои маъруфи ӯянд.

Ҳоло Нозияи Кароматулло узви ансамбли эстрадии “Ориё”-и Кумитаи телевизион ва радио аст, ки бародараш Муҳаммадрофии Кароматулло роҳбари бадеии ҳамин ансамбл мебошад.

Соли 1998 – Зодрӯзи Чоршанбе Аловатов, овозхони тоҷик.

ИЗОБРАЖЕНИЕ Чоршанбе Аловатов

Чоршанбе Аловатов овозхонест, ки аз синаи кӯҳсор ба саҳнаҳои бузурги Осиёи Марказӣ роҳ ёфт. Ӯ дар хонадони мусиқидон ва овозхони маъруф Ақназар Аловатов ба дунё омада, аз овони кӯдакӣ бо олами мусиқӣ қадам ниҳод.

Чоршанбе ҳанӯз дар солҳои мактабхонӣ ба мусиқӣ машғул шуда, бо хатми синфи 9 роҳи ҳунарро ба таври ҷиддӣ интихоб намуда, ба Коллеҷи санъати шаҳри Душанбе дохил шуд ва баъдан дар Донишкадаи давлатии фарҳанг ва санъати Тоҷикистон таҳсил кардааст.

Аз соли 2018 Чоршанбе Аловатов ба ҳайси овозхон дар Оркестри давлатии симфонии Тоҷикистон фаъолият кардааст. Дар таронаҳояш суннати мусиқии мардумӣ бо сабки муосир пайваст шудааанд ва аз бозхонии сурудҳои мардумӣ то эҷоди таронаҳои муаллифӣ Чоршанберо ҳамчун ҳунарманди ҷӯянда ва эҷодкор муаррифӣ кардааст.

Соли 2019 ӯ барандаи ҷоизаи асосии озмуни “Central Asia’s Got Talent” гардид. Ин пирӯзӣ на танҳо муваффақияти шахсӣ, балки дастоварди фарҳангии Тоҷикистон дар сатҳи минтақавӣ буд.

Соли 2010 – Фаррух Қосим, ҳунарпеша ва коргардони маъруфи театри тоҷик ва асосгузори театри “Аҳорун” дар синни 62-солагӣ даргузашт.

ИЗОБРАЖЕНИЕ Фаррух Қосимов

Фаррух Қосим дар хонаводаи ҳунармандони саршиноси театр ва синамои тоҷик Муҳаммадҷон ва Мушаррафа Қосимовҳо чашм ба олами ҳастӣ кушод. Ҳарчанд волидайн бо таваҷҷӯҳ ба мушкилоти мавҷуд дар зиндагии ҳунармандон фарзанди худро барои омӯзиш ба Донишгоҳи миллии Тоҷикистон, ба бахши физика равона карданд, аммо баъд аз як соли таҳсил дар донишгоҳ Фаррух онро тарк кард ва дар Донишгоҳи санъати Точикистон барои таҳсил дар бахши ҳунарманди синамо ва театр пазируфта шуд.

Баъд аз поёни давраи донишгоҳ Фаррухи ҷавон дар Театри Лоҳутӣ ба унвони ҳунарпеша ва коргардон тайи 20 сол фаъолият намуд ва сипас бо дархости гурӯҳе аз ҳунармандони Театри ҷавонон ба номи Маҳмудҷон Воҳидов, коргардонии ин гурӯҳро бар ӯҳда гирифт.

Ҳамзамон пас аз фурӯпошии Шӯравӣ Фаррух Қосим театри худро бо номи “Аҳорун” таъсис дод (ҳоло театри таҷрибавии ба номи Муҳаммадҷон Қосимов) ва марҳилаи дурахши ҳунарии Фаррух Қосим оғоз ёфт. 

Намоишномаҳои ӯ – “Юсуфи гумгашта боз ояд ба Канъон…”, “Даҷҷол”, “Исфандиёр”, “Шоҳ Фаридун”, “Хонасӯзон”, "Раъно" ва "Тортюфт" ҳунар, маҳорат ва тавоноии театри тоҷикро на танҳо дар дохил, балки дар хориҷ аз кишвар муарифӣ намуд.

САНАҲОИ МУҲИМИ ҶАҲОНӢ

Соли 1895 бандари Хоҷибей ба Одесса тағйири ном кард. Дар ибтидои солҳои 1760-ум туркҳо дар маҳаллаи Хоҷибей як қалъаи хурд бунёд карданд. Дар ҷанги Русияву Туркия дар моҳи сентябри соли 1789, ин қалъа аз ҷониби отряди рус таҳти фармондеҳии генерал Осип Дерибас ишғол гардид.

ИЗОБРАЖЕНИЕ

Моҳи майи соли 1794 тарҳи бандар ва шаҳр тасдиқ шуд ва соли 1795 бандари нав киштиҳоро қабул мекард. Шаҳр ба яке аз марказҳои бузурги тиҷорати хориҷии Русия табдил ёфт. Бо амри Екатеринаи II, шаҳр ба Одесса номгузорӣ шуд.

7 феврали соли 1568 аврупоиҳо ҷазираҳои Соломонро кашф карданд. Дар ин рӯз маллоҳи испанӣ Алваро Мендания де Нейра, ки бо ду киштӣ аз бандари Каляои Перу ба сафар баромада буд, пас аз се моҳи шино дар самти ғарб, ба шарқи Гвинеяи Нав ба гурӯҳи ҷазираҳо расид.

ИЗОБРАЖЕНИЕ

Мендания онҳоро Ҷазираҳои Соломон номид, зеро бовар дошт, ки ин ҳамон сарзамини Офир аст, ки мувофиқи ривояти библиявӣ, аз он ҷо ба шоҳ Сулаймон тилло ва ҷавоҳирот барои ороиши маъбади Эрусалим оварда мешуд.

Имрӯз ҷазираҳои Соломон як давлатест дар қисми ҷанубу ғарбии уқёнуси Ором, дар минтақаи Меланезия ҷойгор аст. Он аз 992 ҷазира иборат буда, пойтахташ шаҳри Хониара мебошад.

7 феврали соли 1863 муҳандис Алан Крей дар ИМА аввалин оташхомӯшкуни патентшуда (огнетушител)-ро ихтироъ кард.

ИЗОБРАЖЕНИЕ

Ихтироъкор Шефтал бошад дар охири асри XIX оташхомӯшкунаки тарканда бо номи “Пожарогаз”-ро сохт, ки бомуваффақият таблиғ ва фурӯхта шуд. Бо мурури замон, оташхомӯшкунакҳои бо маводи хокаӣ пайдо шуданд, ки то имрӯз истифода мешаванд.

ВАЗЪИ ҲАВО

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: дар водиҳо рӯзона 4+9º гарм, дар ноҳияҳои кӯҳӣ рӯзона -3+2º, дар водиҳо шабона 0+5º гарм, дар ноҳияҳои кӯҳӣ шабона 1-6º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд.  Ҳарорат: дар водиҳо рӯзона 10+15º гарм, дар  доманакӯҳҳо рӯзона 2+7º гарм, дар водиҳо шабона 2+7º гарм, дар ноҳияҳои доманакӯҳӣ шабона 0+5º гарм.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд.  Ҳарорат: дар водиҳо рӯзона 7+12º гарм, дар ноҳияҳои кӯҳӣ рӯзона -1+4º, дар баъзе ноҳияҳо то 3-5º сард, дар водиҳо шабона 2+7º гарм, дар ноҳияҳои кӯҳӣ шабона -3+2º, дар баъзе ноҳияҳо то 8-10º сард.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона 0+5º гарм, дар баъзе ноҳияҳо то 6+8º гарм, дар шарқи вилоят рӯзона 4-9º сард,  дар баъзе минтақаҳо то 13-15º сард, дар ғарби вилоят шабона 2-7º сард, дар баъзе ноҳияҳо то 2+4º гарм, дар шарқи вилоят шабона 16-21º сард, дар баъзе минтақаҳо то 28-30º сард.

Дар шаҳри Душанбе – Ҳавои  тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 9+11º гарм, шабона 1+3º гарм.

Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 6+8º гарм, шабона 0+2º гарм.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 13+15º гарм, шабона 1+3º гарм.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона 1+3º гарм, шабона 5-7º сард.

*Ҳарорати шабонаи ҳаво шаби 7 ба 8-уми феврал ба ҳисоб гирифта шудааст.

Дар Telegram, Facebook ва Instagram бо мо бимонед.

Сироҷиддин Муҳриддин, вазири корҳои хориҷии Тоҷикистон гуфт, Тоҷикистон аз музокироти Эрон ва Амрико, ки чанде пеш дар шаҳри Масқат, пойтахти Уммон оғоз шуд, “истиқбол мекунад”.

Музокироти ҳастаӣ миёни Теҳрон ва Вашингтон бо иштироки Аббос Ароқчӣ, вазири корҳои хориҷии Эрон ва Стив Уиткофф, фиристодаи вижаи Амрико дар Ховари Миёна чанд лаҳза пеш дар шаҳри Масқат оғоз шуд.

Вазири корҳои хориҷии кишвари мо имрӯз, 6-уми феврал, дар нишасти матбуотӣ дар Душанбе гуфт, Тоҷикистон ҷонибдори ҳифзи сулҳу субот, амният ва оромӣ буда, бар ин назар аст, ки тамоми ихтилофот танҳо тавассути муколамаҳои созанда ҳаллу фасл шавад.

“Мавқеи Тоҷикистон дар пояи ҳуқуқи байналмилалии эътирофшуда, аз ҷумла, эҳтиром ба соҳибихтиёрӣ, тамомияти арзӣ, истиқлолияти давлатӣ ва дахолат накардан ба умури дохилии давлатҳо шакл мегирад”, – гуфт вазир.

Ӯ аз изҳороте, ки ин ниҳод дар робита ба шиддат гирифтани вазъ дар минтақаи Ховари Миёна, бахусус, Эрон чанд рӯз пеш нашр карда буд, ёд оварда, дубора таъкид кард, ки “ҷонибдори ҳалли мусолиҳатомези низоъ ҳаст”.

ИЗОБРАЖЕНИЕ Аббос Ароқчӣ ва Стив Уиткофф

Ҳамчунин, ӯ дар робита ба муносибатҳои Тоҷикистону Эрон илова кард, ки равобити байни кишварҳо бар пояи дӯстӣ, эҳтироми мутақобил ва манфиатҳои муштарак устувор шуда, “дар доираи заминаи мустаҳками таърихиву фарҳангӣ тақким мешавад ва ҳамкориҳои устувори сиёсӣ, иқтисодӣ, тиҷорӣ, энергетикӣ, фарҳангӣ пайваста инкишоф меёбанд”.

Бояд гуфт, Аббос Ароқчӣ дирӯз, 5-уми феврал, эълон кард, ки музокироти ҳастаӣ миёни Теҳрон ва Вашингтон 6-уми феврал, яъне имрӯз дар шаҳри Масқат, пойтахти Уммон баргузор мешавад.

Қаблан расонаҳо хабар дода буданд, ки мақомҳои эронӣ ва амрикоӣ бо раҳбарии Аббос Ароқчӣ ва Стив Уиткофф рӯзи 6-уми феврал дар Истанбул дидор хоҳанд кард.

Бояд гуфт, соли 2025 Амрико ва Эрон байни худ панҷ музокирот доштанд, вале бенатиҷа анҷомиданд. Баъдан бо далели ҳуҷуми Исроил ба Эрон ва баъдан, ҳамроҳ шудани Амрико ба ин ҳуҷум, музокирот қатъ шуд.

Вазъ дар Ховари Миёна дар пайи таниш миёни Амрико ва Эрон ва ҳушдорҳои ҳарду тараф, ҳамчунин, фиристода шудани нерӯҳои ҳарбӣ-ҳавоӣ ва баҳрӣ аз сӯйи Вашингтон ба ин минтақа ва дар ҳолати омодабош қарор доштани артиши Эрон, муташанниҷ боқӣ мемонад. Коршиносон аз эҳтимоли оғози як низои дигар ё ҳамлаи Амрико ба Эрон ҳушдор медиҳанд.

“Дар пайи эътирозҳои Эрон ягон тоҷикистонӣ осеб надидааст”

Сироҷиддин Муҳриддин, имрӯз ҳамчунин гуфт, дар пайи эътирозҳои охири Эрон аз шаҳрвандони Тоҷикистон касе осеб надидааст.

“Сафорати Тоҷикистон дар Эрон бо вуҷуди набудани иртиботот дар он рӯзҳо, дар доираи имконоти мавҷудаи худ то ҳадди имкон бо баъзе тоҷикистониёни муқими Эрон дар тамос буданд ва онҳоро раҳнамоӣ карданд”, – шарҳ дод ӯ.

Бояд гуфт, мақомоти Эрон ахиран гуфта буд, ки дар пайи эътирозҳои охир дар ин кишвар 3 ҳазору 117 тан ҷон бохтаанд, ки аз ин 2 ҳазору 427 шаҳрванди оддиву кормандони нерӯҳои амниятӣ ва 690 “террорист ва шӯришгар” будаанд.

Ҳамчунин, гуфта мешуд, ки  "миёни ҷонбохтагон теъдоди зиёде роҳгузарон, занону кӯдакон ва пиронсолон буданд".

Ёдрас мешавем, ки эътирозҳо дар Эрон поёни моҳи декабри соли гузашта дар пайи уфти арзиши пули риёл (пули миллии Эрон) ва афзоиши таваррум оғоз шуд ва чанд рӯз давом кард. Дар пайи даргириҳо интернет дар Эрон қатъ шуда, маълум нест, ки вазъ ҳоло дар дохил чӣ гуна аст.

Дар Telegram, Facebook ва Instagram бо мо бимонед.

“Ба ман аз номи модарам паём омад, ки “фавран” ба пул ниёз дораду то фардо бармегардонад. Вақте навиштам, ки маблағи гуфтаашро надорам, гуфт “Чи қадаре дошта бошед, фиристед, ҳатто як қисмаш ҳам мешавад”. Ин нақли як сокини шаҳри Душанбе аст, ки чанд рӯз пеш қаллобон саҳифаи модари ӯро дар “Телеграм” рахна карданд ва ба маълумоти шахсиаш дастрасӣ пайдо карданд.

Холида Муродова (ном иваз шудааст), қаҳрамони мо мегӯяд, танҳо баъд аз тамос бо модараш маълум кард, ки ин паём аз ҷониби қаллобон фиристода шудааст. Ӯ ба “Азия-Плюс” афзуд, дар он лаҳза танҳо дар фикри кумак ба азизтарин шахсаш буд ва қариб, ки ба доми қаллобон афтад.

Ин ягона ҳолате нест, ки қаллобон мехоҳанд, бо истифода аз Телеграм ба маълумоти шахсии корбарон дастрасӣ пайдо кунанд. Дар чанд рӯзи охир даҳҳо корбари ин шабака нигаронӣ карданд, ки қаллобон ба саҳифаи шахсии онҳо дастрасӣ пайдо карда, аз номи онҳо аз дӯстону наздиконашон пул талаб кардаанд.

ИЗОБРАЖЕНИЕ Намгирифти яке аз паёмҳо

Аз ҷумла, Зуля Раҳматова, яке аз корбарони Фейсбук ва фаъоли ҷомеаи шаҳрвандӣ дар саҳифааш ҳушдор дод, ки қаллобон аксҳои ӯро истифода бурда, аз номаш ба шахсони хайрхоҳ паём мефиристанд ва аз онҳо маълумоти корти бонкиашонро мепурсанд”

“Мутаассифона, бисёре аз қурбониён пай намебаранд, ки инҳо қаллобонанд ва боварӣ доранд, ки ин корро ман анҷом медиҳам. Ман аллакай чанд маротиба ба мақомоти дахлдор  муроҷиат кардам ва ба ҳамаи зарардидагон тавсия медиҳам, ки ҳатман ариза нависанд. Танҳо бо ҳамин роҳ метавон пеши роҳи чунин ҳолатҳоро гирифт”, – мегӯяд Зуля Раҳматова.

Ҳамчунин, Лола Мерганова, рӯзноманигори тоҷик ҳам дар саҳифааш дар “Фейсбук” навишт, ки саҳифааш дар “Телеграм” аз тарафи қаллобон шикаста шудааст ва ба ҳама рақами дар телефонбудааш бо чунин мазмун паём фиристодаанд: "Салом норохат карданам нокулай аст, мешавад 7 500 карз гирам? Имруз соати 22:00 бармегардонам".

ИЗОБРАЖЕНИЕ

Ӯ мегӯяд, муайян кардааст, ки рақаме, ки қаллабон гузоштаанд, Корти миллии Душанбе сити аст, вале вақте ӯ ба ин бонк муроҷиат карда, хостааст “фаҳмед, ки ин рақами корти кӣ аст ва онро блок кунед. Шояд соҳиби ин корт ҳам дарак надошта бошад, ки суратҳисобашро қаллобон истифода кардаанд”, посух гирифтааст, ки бояд аввал ба Раёсати мубориза бо ҷиноятҳои муташаккил (УБОП) ариза нависед ва “агар онҳо ба мо супориши блок кардани ин кортро диҳанд, мо мекунем”.

Ин бори аввал нест, ки сокинон аз рахна шудани саҳифаҳояшон шикоят мекунанд. Дар гузашта  ҳам қаллобон бо истифода аз номи ширкатҳо ва шахсиятҳои машҳур, аз ҷумла аз номи ширкатҳои “Тселл”, “Тойота”, “Беко”, бонкҳои “Эсхата”, “Алиф” “Амонатбонк”, "Душанбе Сити Бонк" ва шахсиятҳое, чун раисҷумҳуру шаҳрдори Душанбе талош кардаанд сокинонро фиреб диҳанд. 

Дар робита ба чунин  фейкҳо мақомоти Тоҷикистон аҳолиро ҳушдор дода буданд, вале то кунун сокинону ширкатҳои алоҳида аз ин навъи қаллобӣ хабарҳо нашр мекунанд. Ҳар дафъа фиребгарон роҳҳои наву мураккабтари қаллобиро пайдо мекунанд, то маълумоти шахсии корбаронро ба даст оварда, соҳиби маблағ шаванд.

Чӣ гуна худро муҳофизат кунем?

Коршиносон тавсия медиҳанд, ки дар чунин вазъият набояд ба эҳсосот дода шуда, тафаккури интиқодиро бояд ба кор бурд.

ИЗОБРАЖЕНИЕ Рустам Гулов

Рустам Гулов, коршиноси фановариҳои навин гуфт, дар чунин ҳолатҳо ба ҳаргуна зангу паёмакҳо якбора бовар накарда, маълумотро ҳамеша санҷидан зарур аст.

“Қаллобон кӯшиш мекунанд, шахсро дар ҳолати изтироб қарор диҳанд, то ӯ имкони фикр кардан ва интихоби дурустро надошта бошад. Агар ба шумо аз месенҷери дигарон нависта пул ё дигар маълумоти шахсӣ пурсанд, кӯшиш кунед бо он шахс, яъне соҳиби саҳифаи рахнашуда, аз дигар роҳҳо дар тамос шавед”, – тавсия дод ӯ.

Гулов барои таъмини амнияти саҳифаҳои худ дар шабакаҳои иҷтимоӣ чунин тавсияҳо медиҳад:

– Ба пайвандҳои шубҳанок клик накунед, ҳатто агар паём аз номи шинос фиристода шуда бошад;

– Файлҳо ва барномаҳои ношиносро кушода ё насб накунед;

– Барои ҳар як аккаунт рамзҳои мураккаб ва гуногун истифода баред;

– Барномаҳои телефони худро мунтазам навсозӣ кунед;

– Огоҳиномаҳо дар бораи воридшавӣ аз дастгоҳҳои навро фаъол созед.

Қаблан, дар пайи чунин ҳодисаҳо, мақомоти ҳифзи ҳуқуқ ҳам ба  шаҳрвандон маслиҳат дода буданд, ки вориди пайванди сомонаҳои шубҳанок нашаванд, зеро бо ин роҳ қаллобон метавонанд махзани телефони мобилиро рахна сохта, ба маълумоти шахсӣ ва рамзҳои ҳамёни электронии онҳо дастрасӣ пайдо кунанд.

Ҳамин тафаккури интиқодӣ ва саводи расонаӣ ба Холида Муродова кумак кардааст, то дар доми фиреби қаллобон наафтад. Ӯ баъди паёми шубҳанок аз модараш, ба мутахассиси фановариҳои навин муроҷиат кард ва ба саҳифаҳои худ ва модарашро дар шабкаҳои иҷтимоӣ рамзи дуқабата гузошт. Ӯ ба чунин хулоса расид, ки дар оянда низ ба ҳар паёми омада, ҳатто аз ҷониби наздиктарин нафар ҳам, бо шубҳа нигоҳ мекунад ва танҳо баъди санҷиши паём қадами баъдии худро мегузорад.

Дар Telegram, Facebook ва Instagram бо мо бимонед.