Дар рӯзи якуми мусобиқаи “Тоскулоҳи бузурги Душанбе” ё “Dushanbe Grand Slam 2025” ҷудокорони тоҷик 5 медал, 1 тилло, 2 нуқра ва 2 биринҷӣ ба даст оварданд. Ин мусобиқа дирӯз, 2-юми май оғоз шуд ва дар рӯзи аввал 14 паҳлавони тоҷик, 8 мард ва 6 зан куштӣ гирифтанд.
Аввалин медали тиллоро Эмомалӣ Нуралӣ, ҷудокори номдори тоҷик дар вазни то 66 кг ба даст овард. Ӯ дар финал бо Обид Ҷебов, ҷудокори дигари тоҷик рақобат кард ва бо имтиёзи иппон Ҷебовро шикаст дода, соҳиби нишони тилло шуд. Ҳамин тариққ, Обид Ҷебов дар вазни то 66 кг соҳиби медали нуқра гардид.
Инчунин, Меҳрзод Суфиев, паҳлавони Тоҷикистон дар финал бо Балабай Ағаев аз Озарбойҷон нерӯсанҷӣ карда, ноком шуд ва соҳиби нишони нуқра гардид. Дар ҳамин вазн барои нишони биринҷӣ Муҳаммадсолеҳ Қувватов бо Максим Мерлини фаронсавӣ шикаст хӯрда, бемедал монд. Соли гузашта дар мусобқаи Гранд Слами Душанбе Қувватов соҳиби медали тилло шуда буд.
Дар идома, Ёсин Бобокалонов, варзишгари дигари тоҷик бо Тойлӣ Мурадов аз Туркманистон сабқат карда, соҳиби нишони биринҷӣ шуд.
Мадина Қурбонзода, ҷудокорзани тоҷик бо Хиужи Ҷианг аз Чин барои нишони биринҷии вазни 52 кг сабқат намуд. Дар ин нерӯсанҷи Мадина дастболо шуда, соҳиби нишони биринҷӣ шуд.
Варзишгарони дигари тоҷик – Ҳақдод Гулов, Лоиқ Қутбиддинов дар вазни то 60 кг, Шаҳбоз Саидабуроров дар вазни то 66 кг, Аҳлия Муминова, Райҳона Розиқзода дар вазни то 48 кг, Зуҳал Ҷумаева, Насиба Карликова дар вазни то 52 кг, Александра Кан, ва Раҳмия Ҳанҷарбекова дар вазни то 57 кг дар марҳилаҳои гуногун ба бохт рӯ ба рӯ шуда, аз гирифтани медалҳо маҳрум шуданд.
Ғолибони рӯзи аввали Dushanbe Grand Slam 2025
Занон
Вазни -48 кг
1. Анудари Джамсран (Муғулистон)
2. Вэнне Чжуан (Чин)
3. Вакана Инагак (Ҷопон)
3. Абиба Абужакинова (Қазоқистон)
Вазни -52 кг
1. Амандин Бюшар (Фаронса)
2. Муҳайё Ахматова (Ӯзбекистон)
3. Бландин Понт (Фаронса)
3. Мадина Қурбонзода (Тоҷикистон)
Вазни -57 кг
1. Сара-Леони Сизик (Фаронса)
2. Наталя Ёлкин (IJF)
3. Ана Пулджиз (Хорватия)
3. Тао Юинг (Чин)
Мардон
Вазни -60 кг
1. Балабай Ағаев (Озарбойҷон)
2. Меҳрзод Суфиев (Тоҷикистон)
3. Туменҷаргал Тувшинтур (Муғулистон)
3. Максим Мерлин (Фаронса)
Вазни -66 кг
1. Эмомалии Нуралӣ (Тоҷикистон)
2. Обид Ҷебов (Тоҷикистон)
3. Ёсин Бобокалонов (Тоҷикистон)
3. Артем Штурбабин (Ӯзбекистон)
Бояд гуфт, ки имрӯз дар рӯзи дуюми мусобиқа варзишгарон аз рӯи 4 вазн: — 63 кг, -70 кг байни занон ва -73 кг ва -81 кг байни мардон қувва меозмоянд. Аз Тоҷикистон дар ин рӯз 8 ҷудочӣ иштирок менамояд. Дар вазни 73 кг Абубакр Шеров, Муҳиддин Асадуллоев, Беҳрӯз Хоҷазода, Ворис Назаров ва дар вазни 81 кг Сомон Маҳмадбеков, Муҳаммад Юсуфзода, Ғанӣ Ғанизода, Сайфиддин Сайфидинзода ҳунарнамоӣ мекунанд.
Ёдовар мешавем, ки мусобиқаи “Dushanbe Grand Slam-2025” аз 2 то 4-уми май дар Қасри теннис ва маҷмааи варзишҳои обии шаҳри Душанбе баргузор мешавад. Дар ин мусобиқа Тоҷикистонро 36 ҷудокор, 28 мард ва 8 зан намояндагӣ доранд.
