Дастаи мунтахаби футболи хурд ё футзали Тоҷикистон дар нахустин бозии дӯстона, ки дирӯз, 7-уми ноябр, дар шаҳри Душанбе баргузор шуд, тими мунтахаби Русия, ноиби қаҳрамони Аврупоро бо ҳисоби бузурги 10:7 шикаст дод.
Федератсияи футболи Тоҷикистон навиштааст, ки вохӯрӣ дар Маҷмааи варзишии бисёрсоҳаи шаҳри Душанбе бо ҳузури беш аз 2,5 ҳазор тамошобин баргузор шуда, дастаи мунтахаби Русия бо ҳисоби 10:7 аз футзалбозони Тоҷикистон шикаст хӯрд.
Чаҳор голи дастаи Тоҷикистонро Файзалӣ Сардоров ба ҳадаф расонид. Идрис Ёров, Дилшод Саломов ва Бахтиёр Солиев дуголӣ заданд.
Ҳамин тариқ, панҷ голи дастаи Русияро Янар Асадов ва ду голи дигарро Сергей Денисов ва Артём Ниёзов ба ҳадаф расониданд.
Интизор меравад, имрӯз, 8-уми ноябр, тимҳои футзали Тоҷикистону Русия дар Душанбе бозии дувуми дӯстона баргузор мекунанд. Оғози бозӣ соати 20:00 ба вақти Душанбе аст.
Бозии дӯстона миёни тимҳои миллии футзали Тоҷикистон ва Русияро довари ФИФА Анатолий Рубаков ва Никита Афиногенов, ҳарду аз Ӯзбекистон, ҳакамӣ карданд. Доварони эҳтиётӣ довари ФИФА аз Тоҷикистон Беҳрӯз Муртазоев ва ҳамватанаш Суҳроб Сатторов буданд.
