Дар яке аз бемористонҳои Душанбе кӯдакони дорои бемориҳои дилро ройгон ташхис ва ҷарроҳӣ мекунанд. Қабули беморон дирӯз, 2-юми март оғоз шуда, то 9-уми март идома меёбад.
Дар ин бора Усмонҷон Исмонов, ҷарроҳи дил аз Маркази ҷумҳуриявии илмии дилу рагҳо (Беморхонаи маъруф ба “Медгородок”) ба “Азия-Плюс” хабар дод ва гуфт, ки ин иқдом ба муносибати моҳи шарифи Рамазон амалӣ карда шуда, "аз ҳисоби фондҳои хайрхоҳӣ пӯшонида мешавад ва оилаҳо ҳеҷ маблағе намепардозанд".
“Мо мехоҳем, ки дар ин моҳи муборак ба кӯдаконе, ки аз нуқсони дил азоб мекашанд, ёрӣ расонем. Ҳар кӯдак, сарфи назар аз вазъи молиявии оилааш, ҳақ дорад, ки бо дили солим зиндагӣ кунад”, – гуфт ҷарроҳ Исмонов.
Ҷарроҳии кӯдаконро мутахассисони марказ – Меҳрубон Муродов ва Усмонҷон Исмонов, ду ҷарроҳи Шуъбаи нуқсонҳои модарзодӣ ва иктисоби дил дар шаҳри Душанбе мегузаронанд.
Ба гуфтаи Исмонов, ин шуъба дар тӯли фаъолияти худ зиёда аз 1000 ҷарроҳии дилро гузаронидааст ва яке аз бонуфузтарин марказҳои кардиохирургия дар Тоҷикистон ба шумор меравад.
Ӯ гуфт, волидайне, ки фарзандашон аз нуқсони дил ранҷ мебарад, сарфи назар аз ҷойи зист ва вазъи оилавӣ, метавонанд тавассути рақамҳои зерин барои қабул мурооҷат намоянд:
📞 +992 888 221 132;
📞 +992 001 333 003;
📞 +992 930 888 241.
Усмонҷон Исмонов зикр кард, ки падару модарон ҳангоми муроҷиат ба Маркази ҷумҳуриявии илмии дилу рагҳо шаҳодатномаи кӯдаки бемор ва шиносномаи худро ҳамроҳ дошта бошанд. Дигар ҳуҷҷате лозим нест, ҳамаи ташхис дар худи марказ гузаронида мешавад.
Бемориҳои дил чист?
Яке аз маъмултарин бемориҳодар кӯдакон ба шумор меравад. Мутахассисони соҳаи тиб таъкид мекунанд, ки ин беморӣ метавонад дар ҳафтаҳои аввалини ҳомиладорӣ пайдо шавад ва сабаби он омилҳои гуногуни генетикӣ ва муҳити зист бошад. Бо истифода аз усулҳои муосир, аз қабили эхокардиография, табобат дар марҳилаи аввал ба натиҷаҳои мусбат ноил мегардад.
Ҳама инҳо нишонаҳои эҳтимолии нуқсони дил мебошанд:
– кабудшавии лабҳо ва ангуштон;
– хастагӣ ва душвории нафаскашӣ;
– фаъолияти номуътадили дил;
– мушкилӣ ҳангоми ширмакӣ;
– гиряи зиёд;
– камшавии вазн ва нашъунамои ноқис.
Ҷарроҳи тоҷик мегӯяд, ки агар яке аз ин нишонаҳоро дар фарзандатон мебинед, бидуни таъхир ба Маркази ҷумҳуриявии илмии дилу рагҳо (кӯчаи Саноӣ 33, ноҳияи Исмоили Сомонӣ, шаҳри Душанбе) муроҷиат кунанд:
Ин бори аввал нест, ки кӯдакони дорои бемориҳои дил бо ташхиси нуқсонҳои модарзодиро дар Тоҷикистон ройгон ташхису ҷарроҳӣ мекунанд. Қаблан, табибони Имороти Муттаҳидаи Араб дар беморхонаи “Истиқлол”-и Душанбе кӯдакони дорои нуқсони дилро ройгон ҷарроҳӣ карда буданд.
