Ба муносибати 20-умин солгарди роҳандозии муносибатҳои дипломатӣ миёни Тоҷикистону Қирғизистон имрӯз сарони ин кишварҳо Эмомалӣ Раҳмон ва Алмазбек Атамбаев ба ҳамдигар барқияҳои табрикотӣ ирсол намуданд.
Бино ба маълумоти хадамоти матбуоти сарвари давлати Тоҷикистон, дар барқияи табрикотии Эмомалӣ Раҳмон зикр мегардад, ки «Тоҷикистон сатҳи имрӯзаи ҳамкориҳо бо Қирғизистонро шоиста арзёбӣ намуда, минбаъд низ ният дорад, ки ба муносибатҳои ҳамкории дуҷониба дар сиёсату иқтисод, амнияту фарҳанг ва дигар самтҳо тақвият бахшад».
«Ман мутмаинам, ки ин ният дуҷониба буда, талоши муштараки мо дар роҳандозии ҳамкориҳои барои тарафайн судманд минбаъд низ баҳри нафъи мардуми ҳарду кишвар бемайлон густариш хоҳад ёфт», – гуфта мешавад дар барқияи табрикотии Эмомалӣ Раҳмон.
Дар барқияи табрикотии президенти Қирғизистон қайд мешавад, ки «тӯли 20 соли гузашта миёни кишварҳои мо муносиботи қавии ҳамҷаворӣ ба роҳ монда шуда, он сол то сол муҳтавои пурмазмун ва рушди босуръатро касб мекунад».
«Мутмаинам, муносиботи Қирғизистону Тоҷикистон, ки дар ҳалли масъалаҳои калидии минтақа мавқеъҳои муштарак доранд, минбаъд низ густариш ёфта, ба манфиати мардум ва давлатҳоямон устувортар хоҳанд гашт», – омадааст дар барқияи Алмазбек Атамбаев.
Қобили зикр аст, ки тӯли 20 соли муносибот миёни Тоҷикистону Қирғизистон беш аз 70 асноди ҳамкории дуҷониба ба имзо расида, ба татбиқу танзими пурсамари онҳо дар тамоми бахшҳо шароити мусоид фароҳам овардаанд. Соли 2012 ҳаҷми муомилоти молӣ миёни Тоҷикистону Қирғизистон зиёда аз 70 млн. доллари ИМА-ро ташкил дод, ки нисбат ба нишондиҳандаи соли пешин ду баробар зиёдтар аст.
