Ахири ҳафтаи гузашта зимни мулоқот бо ҷавонон дар дафтари кории ҲНИТ дар пойтахт раиси ҳизб Муҳиддини Кабирӣ иброз дошт, ки дар сурати шаффоф сурат гирифтани интихоботи президентӣ дар Тоҷикистон тирамоҳи соли равон, дар даври аввал касе намегузарад.
Бино ба маълумот аз қароргоҳи марказии ҲНИТ, М.Кабирӣ зикр кардааст, ки ХНИТ дар маъракаи интихоботи президент ширкат хоҳад варзид, вале номзадро танҳо анҷумани ҳизб, ки моҳҳои август ё сентябр баргузор мешавад, муайян мекунад. «Номзад метавонад аз ҲНИТ ё ҳизби дигар ва ҳатто шахси беҳизбӣ бошад», – гуфтааст ӯ.
Ба қавли раиси ҲНИТ, дар шабакаҳо ва гоҳе дар матбуот ҳам баъзан дар бораи ӯ муболиғаҳо чоп мешаванд, ҳол он ки нафарони хеле зиёд ҳастанд, ки аз ӯ дар чанд ҷиҳат афзалтаранд. «Шодӣ Шабдолов, раиси ҲКТ, дар фаҳмиши масоили энергетикӣ ва саноатӣ аз ман хеле хубтар аст, Президент Эмомалӣ Раҳмон дар бахши мудирияти кишвар таҷрибаҳои зиёд дорад ва ё ман эътироф дорам, ки Раҳматилло Зойиров аз ҷиҳати дониши ҳуқуқӣ аз ман хеле зиёдтар медонад», – изҳор доштааст М.Кабирӣ.
