Дар Вазорати энергетика ва саноати Тоҷикистон вохӯрии Вазири энергетика ва саноат Гул Шералӣ бо ноиби президенти ширкати чинии ТВЕА-ҷаноби Шу баргузор гардид.
Тавре аз хадамоти матбуоти вазорати мазкур хабар доданд, зимни мулоқот масъалаҳои вобаста ба вусъат бахшидани корҳо дар сохтмони Маркази барқу гармидиҳии – 2-и шаҳри Душанбе ва масъалаҳои марбут ба он баррасӣ гардид.
Ба иттилои манбаъ, мавриди истифода қарор гирифтани як агрегати МБГ – 2 бо иқтидори 50 мВт тирамоҳи соли ҷорӣ дар назар аст. Иқтидори умумии Маркази барқу гармидиҳии «душанбе-2» 200 Мвт-ро ташкил хоҳад дод.
Қобили зикр аст, ки татбиқи амалии лоиҳаи мазкур пас аз гуфтушуниди тӯлонӣ бо сармоягузорони Чин моҳи сентябри соли гузашта оғоз гардида, ҷиҳати дар ҳаҷми баробар сармоягузорӣ намудани лоиҳаи мазкур аз ҷониби ду бонки чинӣ «Эксимбонк» ва Бонки рушди Чин мувофиқа ҳосил шуд. Ин марказ пурра бо истифода аз ангишти маҳаллӣ фаъолият хоҳад кард.
ТBEA яке аз ширкатҳои бузурги истеҳсолкунандаи таҷҳизоти электротехникӣ дар ҷаҳон ва трансформаторҳо дар Чин мебошад. Маҳсулоти ширкат ба беш аз 70 кишвари ҷаҳон, аз ҷумла ИМА, Канада ва Ҷопон содирот мешавад.
