Соли гузашта захираҳои тилову асъори Тоҷикистон 972 млн. доллари ИМА-ро ташкил доданд, ки нисбат ба соли пешин 170,4 млн. доллари ИМА бештар аст.
Раиси Бонки миллии ҷумҳурӣ Абдуҷаббор Ширинов зимни нишасти хабарӣ иттилоъ дод, ки захираи тилои Тоҷикистон ба зиёда аз 11 тонна тило баробар мебошад.
Ба қавли Ширинов, захираҳои мазкур ҳам дар Бонки миллӣ ва ҳам дар бонкҳои Швейтсарияу Олмон ва ҳамчунин ИМА нигоҳдорӣ мешаванд. «Ин амал барои таъмини бехатарии ин захираҳо сурат мегирад», – гуфт раиси БМТ.
Қобили зикр аст, ки захираҳои тилову асъори Тоҷикистон таҳти назорати мақомоти давлатии танзимгари сиёсати пуливу қарзӣ қарор дошта, дар ҳама гуна вақт метавонад барои маблағгузорӣ ба касри тавозуни пардохтӣ, маблағгузорӣ ба бозорҳои асъор, ки ба қурби асъори миллӣ таъсиргузоранд, истифода гардад.
Ёдрас мекунем, ки аз рӯи натиҷаҳои соли 2011 ҳаҷми захираҳои тилову асъори Тоҷикистон 801,6 млн. доллари ИМА-ро ташкил дода буданд, ки дар муқоиса бо соли 2010 ба андозаи 20,7% зиёдтар буданд.
