Суди иқтисодии шаҳри Душанбе мурофиаи пешакӣ оид ба баррасии даъвои ширкати «Тоҷирон» нисбат ба рӯзномаи «ИмрӯзNews» ва адвокат Файзинисо Воҳидоваро аз 11-уми март – ҷашни Рӯзи матбуоти тоҷик ба рӯзи 14-уми март гузаронид.
Тавре ба ОИ «Азия-Плюс» сардабири рӯзномаи «ИмрӯзNews» Назири Нусрат хабар дод, ба онҳо ин хабар рӯзи 5 март расида, дар огоҳинома зикр шудааст, ки мурофиа бинобар сабаби имкони ҳузур надоштани судяи раисикунанда ба рӯзи дигар гузаронида мешавад ва санаи 11-уми март судяи мазкур дар семинар иштирок мекардааст.
Аммо адвокат Ф.Воҳидова бар ин назар аст, ки ин ҳама баҳонае беш набуда, «виҷдони онҳо бедор шудааст». «Ман чунин мешуморам, ки баъди нашри якчанд навиштаҳои интиқодӣ дар бораи маҳз дар ҷашни Рӯзи матбуот баргузор шудани мурофиаи судии рӯзнома, онҳо қарори худро бознигарӣ намуданд, зеро то ҷое ман огоҳам, чунин семинарҳои такмили ихтисос мувофиқи барномаи нави ислоҳоти низоми судӣ рӯзи ҷумъаи ахири ҳар моҳ баргузор мешаванд», – иброз дошт вай.
Ёдрас мекунем, ки даҳаи сеюми моҳи феврали соли равон ширкати «Тоҷирон» барои туҳмат ва зарар расонидан ба нуфузи кории ширкат нисбат ба адвокат Файзинисо Воҳидова ва рӯзномаи «ИмрӯзNews» ба Суди олии иқтисодӣ
даъво пеш овард.
Санаи 1-уми март Суди иқтисодии шаҳри Душанбе баргузории мурофиаи аввали пешакӣ оид ба баррасии даъвои ширкати «Тоҷирон» нисбати рӯзномаи «ИмрӯзNews» ва адвокат Файзинисо Воҳидоваро ба рӯзи 11-уми март таъин кард.
Чанде қабл як зумра журналистони ватанӣ тасмим гирифта буданд, ки
ба нишони эътироз
аз чорабинии давлатӣ бахшида ба ҷашни Рӯзи матбуот даст кашида, рӯзи 11-уми март дар мурофиаи пешакии судӣ оид ба баррасии даъвои ширкати «Тоҷирон» нисбати рӯзномаи «ИмрӯзNews» ва ҳимоятгар Файзинисо Воҳидова ширкат варзанд.
