Бар асари як ҳодисаи нохуш дар нақби ҶДММ «Ширкати кӯҳкории саноатии Тоҷикистону Чин» як шаҳрванди Чин ба ҳалокат расид.
Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, рӯзи душанбеи ҳафтаи равон Чен Жон Жой, шаҳрванди 61-солаи Чин, корманди ҷамъияти «Ширкати кӯҳкории саноатии Тоҷикистону Чин» воқеъ дар шаҳраки Зарнисори Қайроққум ҳангоми кор дар нақб зери девори афтидаи он мондааст.
Ба иттилои манбаъ, дар натиҷа ӯ ҷароҳатҳои вазнин бардошта, ҳангми интиқол ба беморхонаи шаҳри Хуҷанд ба ҳалокат расидааст.
Гуфта мешавад, зимни азназаргузаронии ҷасади фавтида аломатҳои марги маҷбурӣ дарёфт нашудаанд.
