Дар ҷаласаи имрӯзаи палатаи поёнии парлумон вакилон бидуни баррасӣ якдилона тағйироти аз ҷониби ҳукумат пешниҳодшуда ба Қонуни ҶТ «Дар бораи санҷиши фаъолияти субъектҳои хоҷагидорӣ»-ро дастгирӣ намуданд.
Зимни суханронӣ оид ба ин масъала раиси Палатаи ҳисоби Тоҷикистон Дилмурод Давлатов изҳор намуд, ки тағйироти пешниҳодшуда ба аудиторон ҷиҳати баргузор намудани аудити берунӣ дар мавриди санҷиши истифодаи воситаҳои буҷетӣ ҳуқуқ медиҳанд.
«Ғайр аз ин, аудиторон ба доир намудани санҷиш дар муассисаҳои ғайридавлатӣ, ки аз ҳисоби буҷети давлатӣ дастгирӣ мешаванд, низ ҳуқуқ прайдо мекунанд», – таъкид кард Давлатов.
Қобили зикр аст, ки мақоми олии давлатӣ дар соҳаи назорати молия – Палатаи ҳисоби ҶТ тобистони соли 2011 таъсис дода шуд. Палатаи ҳисоб ба сарвари давлат ва парлумони кишвар ҳисоботдеҳ аст.
Мувофиқи қонунгузории ҷумҳурӣ, сараудиторони Палатаи ҳисоб бо пешниҳоди президент аз ҷониби палатаи поёнии парлумон ба муҳлати ҳафт сол таъин шуда, як нафар ҳуқуқ надорад, ки бештар аз ду мӯҳлат ба ин мансаб таъин гардад.
