Давоми рӯзҳои 24-25-уми июн ба 13 нафар шаҳрвандони Тоҷикистон, ки тавассути ҳавопаймо озими шаҳрҳои Маскаву Екатеринбург, Санкт-Петербургу Оренбург шуда буданд, вуруд ба қаламрави Русия манъ карда шуд.
Бино ба иттилои шуъбаи робита бо ҷомеаи Хадамоти муҳоҷираи назди ҳукумати ҶТ, тибқи қонунҳои Федеролии Русия ба шаҳрвандон – Муҳриддин Мӯсоев, Маҳмадалӣ Мамадалиев, Маҳмадӣ Мамадалиев, Нуралӣ Мамадалиев, Сафаралӣ Баротов, Манучеҳр Нарзиев, Баҳодур Назаров, Саидаҳмад Асоев, Садриддин Саидов, Юнусалӣ Исоқов, Дилшод Ойев, Ғуломҷон Тошбоев ва Қиматулло Сулаймонов ба муҳлати се сол ворид шудан ба қаламрави ин кишвар манъ карда шуда, онҳо аз фурудгоҳҳҳои шаҳрҳои зикршудаи Русия ба ватан баргардонида шуданд.
Ба иттилои манбаъ, шаҳрвандони ба ватан фиристодаи Тоҷикистон ҳангоми қаблан дар қаламрави Русия қарор доштан, ба қонуншиканиҳо дар бахши қонунгузории муҳоҷирати ин кишвар даст зада, ба «рӯйхати сиёҳ» шомил будаанд.
«Хадамоти муҳоҷират ба шаҳрвандон борҳо иброз дошта ва таъкидан боз ҳам баён медорад, ки пеш аз сафар ба Русия ҳатман ба Бахши қабул ва маслиҳатдиҳии Хадамоти муҳоҷират ва Раёсати Хадамоти муҳоҷират дар шаҳри Душанбе ва ноҳияҳои тобеи ҷумҳурӣ муроҷиат намоед ва мушкилот ва проблемаҳои худро доир ба депортатсия ва дигар масъалаҳои мавҷуда ҳаллу фасл намоед», – зикр мегардад дар иттилои хадамот.
Россия
Сабабаш чи бошад