Раисиҷумҳури Тоҷикистон Эмомалӣ Раҳмон ба Шоҳи Арабистони Саудӣ ҷиҳати коҳиш надодани теъдоди квотаҳо барои зойирини тоҷик нома ирсол кардааст. Дар ин бора худи Эмомалӣ Раҳмон дар мулоқот бо рӯҳониён иброз дошт.
Ёдрас мешавем, ки Арабистони Саудӣ барои зойирини тамоми кишварҳо шумори квотаҳоро ба андозаи 20% кам мекунад. Ин тасмим баҳри он гирифта мешавад, ки зойирини макони муқаддас зимни адои маросими ҳаҷ нороҳатӣ ҳис накунанд, зеро дар шаҳрҳои Ҷиддаву Мадина корҳои васеъсозии фурудгоҳ, ду масҷид, бахусус мавзеи атрофи Каъба ва ҳамчунин роҳҳои самти водии Арафот ва Мино идома доранд.
Ҳамин тариқ, акнун, тавре интизор меравад, ҳамагӣ 4,8 ҳазор нафар тоҷикистониён метавонанд адои маросими ҳаҷ кунанд. Мактуби расмӣ ба унвони Дастгоҳи иҷроияи сарвари давлат ирсол шуд.
«Мо бо дархости коҳиш надодани теъдоди квотаҳо барои зойиринамон мактуби расмӣ фиристодем. Ҳамзамон бо ин, бояд гуфт, ки баъзе шахсон маросими ҳаҷро ба василаи худнамоиву зоҳирпарастӣ табдил дода, безарурат панҷ-шаш маротиба ва ҳатто зиёда аз ин ба ҳаҷ рафтаанд. Агар шахсони сарватманд ба ҷойи худнамоиву зоҳирпарастӣ ба ятимону маъюбон, оилаҳои камбизоат ва шахсони муҳтоҷу дармонда дасти ёрӣ дароз кунанд, савобу аҷри бештаре хоҳанд гирифт. Тавре бузургони мо фармудаанд:
Дил ба даст овар, ки ҳаҷҷи акбар аст,
Аз ҳазорон Каъба як дил беҳтар аст.
Аз ин хотир мададгори мӯҳтоҷон бошед»,- гуфт президент.
Ёдрас мекунем, ки соли равон зиёда аз 6 ҳазор нафар тоҷикистониён бояд ба адои маросими ҳаҷ раҳсипор мешуданд. Ҳоло масъалаи коҳиш додани теъдоди квотаҳо мавриди ҳалу фасл қарор дорад. Ҳавопаймои нахустин бо зойирини тоҷик рӯзи 20-уми сентябри соли равон аз Душанбе ба Ҷидда раҳсипор мегардад. Парвозҳо аз ҷониби ширкатҳои ҳавопаймоии ватании «Тоҷик Эйр» ва «Сомон Эйр» анҷом дода мешаванд. Нархи ҳаҷҷи соли гузашта 17 ҳазору 127 сомонӣ (3 ҳазору 546 $) ва имсол бошад, дар муқоиса ба соли гузашта 497 сомонӣ (103 $) фарқ дошта, 17 ҳазору 625 сомониро ташкил медиҳад.
