Суди ноҳияи Синои пойтахт дар бораи аз манзили давлатии иҷора рондани нафақахӯр Любов Маркова, ҳамсари бевамондаи собиқадори Ҷанги Бузурги Ватанӣ қарор содир намуд.
Чӣ тавре ки ба ОИ «Азия-Плюс» Ҷамила Назарова, ҳимоятгари Л.Маркова хабар дод, бо қарори суд нафақахӯр аз пардохти маблағи қарзи иҷора дар ҳаҷми 7 ҳазор сомонӣ озод шуда, вале банди марбут ба холӣ кардани манзил бетағйир боқӣ гузошта шудааст.
«Алҳол қарори суд ҳукми қонунӣ нагирифта, мо ният дорем, ки аз болои қарори суди ноҳиявӣ шикояти кассатсионӣ пешниҳод кунем», – зикр кард ҳимоятгар.
Ёдрас мекунем, ки Раёсати сармоягузорӣ ва идораи амволи давлатии мақомоти шаҳрдории Душанбе бо аризаи даъвогӣ
аз суди ноҳияи Сино дархост намуда буд,
ки нафақахӯр Любов Маркова аз манзили давлатӣ маҳрум ва аз ӯ маблағи қарзи иҷора дар ҳаҷми 7 ҳазор сомонӣ рӯёнида шавад.
Чӣ тавре ки қаблан ба ОИ «Азия-Плюс» Любов Маркова хабар дода буд, ин манзилро ҳамчун собиқадори ҷанг ҳукумат ба ҳамсараш пешниҳод намуда, тибқи шартнома барои он онҳо ҳар моҳ бояд дар ҳаҷми 520 сомонӣ маблағи иҷорапулӣ месупориданд.
«Чун шартнома бо забони давлатӣ таҳия гардида буд, мо моҳияти онро дуруст нафаҳмида, зери он имзо ва гумон доштем, ки пас аз як соли имзои шартнома манзил моликияти мо мешавад, аммо пас аз ду сол шавҳари ман фавтида, ман дигар ба пардохти маблағи иҷорапулии манзил имкон надорам», – мегӯяд нафақахӯр.
