– Дар робита ба масъалаи ворид намудани тағйирот ба Қонуни ҶТ «Дар бораи адвокатура», ки мавриди таҳия қарор дорад, аслан адвокатҳое «сарусадо» баланд мекунанд, ки сатҳи касбиашон шубҳаовар аст, – изҳор дошт зимни нишасти хабарии рӯзи 23-юми июл вазири адлияи Тоҷикистон Рустам Менглиев.
Ба гуфтаи ӯ, моҳияти тағйирот дар он ифода меёбад, ки давлат аз сатҳи тахассусии ҳуқуқшиносоне, ки аз манфиатҳои шаҳрвандонаш ҳимоят мекунанд, огоҳ шуданӣ аст.
Муовини аввали вазири адлияи ҷумҳурӣ Абдуманнон Холиқов дар ин маврид илова намуд, ки махсус барои ин кор дар назди Вазорати адлия таъсиси Комиссия оид ба санҷиши сатҳи дониш ва тахассуси адвокатҳо дар назар аст.
«Ба ҳайати комиссияи мазкур шомил гардидани панҷ намояндаи ҷомеаи адвокатҳо, ду намояндаи Вазорати адлия, як вакили палатаи поёнии парлумон ва ҳамчунин як олими ҳуқуқшинос дар назар буда, комиссия масъалаи ба адвокатҳо додани иҷозатномаро ҳаллу фасл мекунад», – таъкид дошт Холиқов.
Ӯ мутмаин аст, ки оғози кори комиссия ба фаъолияти ба истилоҳ адвокатҳо, ки «ахиран мисли занбурӯғ баъди борон пайдо шудаанд», садд хоҳад гузошт.
«Имрӯз миёни ҷомеаи адвокатҳо ба ҳар нафаре, аз ҷумла маҳкумшудаи қаблӣ, ҳуқуқшиноси бардурӯғ ва шахси дар бораи ҳуқуқшиносӣ тасавуротнадошта метавон дучор шуд. Ин иқдомро ба ҳеҷ гунае наметавон ҳамчун кӯшиши роҳандозии назорати давлатӣ аз болои адвокатҳо унвон кард, зеро иҷозатнома барои фаъолияти адвокатиро комиссияе медиҳад, ки дар он овозҳои намояндагони Вазорати адлия ба ҳадди ақали ниҳоӣ баробаранд», – афзуд Холиқов.
