Сардори Хадамоти муҳоҷирати назди ҳукумати ҶТ дар вилояти Суғд Зайнура Шарифова изҳор намуд, ки 569 нафар сокинони шаҳру навоҳии вилояти Суғд бедаракшуда маҳсуб меёбанд.
«Дар оилаҳои ин муҳоҷирони корӣ 714 нафар кӯдакон бесаробон мондаанд», – иброз дошт ӯ ва илова кард, ки бо ташаббуси кормандони хадамот ҷиҳати бо оилаҳояшон робита доштани ин муҳоҷирон маълумот дастрас гардида, ошкор шудааст, ки айни замон 569 нафар сокинони вилоят муҳоҷирати корӣ ба хориҷи кишвар, асосан ба Русияро ихтиёр намуда, бе ному нишон шудаанд», – иброз дошт Шарифова.
Ба қавли ӯ, ҷиҳати муайян кардани макони будубоши ин муҳоҷирон аз ҷониби хадамот чораҷӯӣ шуда, ба Хадамоти федералии муҳоҷирати Русия ва барномаи «Жди меня» дар Хуҷанд рӯйхати ин шахсон ирсол гардидааст.
Бино ба маълумоти Хадамоти муҳоҷирати назди ҳукумати ҶТ дар вилояти Суғд, аз оғози соли равон 140 ҳазору 693 нафар (ҳамин давраи соли гузашта – 137 ҳазору 223 нафар) сокинони минтақаи шимоли кишвар, ҷумла 131 ҳазору 189 нафар (117 ҳазору 884 нафар мардон ва 13 ҳазору 285 нафар занон) бо мақсади муҳоҷирати корӣ ба хориҷи кишвар рафтаанд.
Дар ҳамин ҳол, дар ин давра 36 ҳазору 495 нафар сокинони вилоят, аз ҷумла 30 ҳазору 990 нафар (24 ҳазору 883 нафар мардон ва 6 ҳазору 107 нафар занон) аз муҳоҷирати корӣ ба ватан баргаштаанд.
