Кормандони шӯъбаи Оҷонсии зиддимухаддарот дар ВМКБ ва Хатлон амалиёти махсусеро дар мавриди қатъ кардани гардиши ғайриқонунии мухаддарот анҷом доданд, ки дар натиҷа як шаҳрванди Ҷумҳурии Афгонистон бо 15 килограмм канабис боздошт мешавад.
Тавре ба Хабаргузории «Азия-Плюс» дар Оҷонсӣ иттилоъ доданд, амалиёти вижа дар маҳали Назарайвони ноҳияи Шӯроободи вилояти Хатлон гузаронида шуда, дар натиҷаи чорабиниҳои фаврӣ-ҷустуҷӯӣ бо гумони даст доштан дар гардиши ғайриқонунии маводи нашъаовар сокини 32-солаи Афгонистон дастгир мегардад.
«Ҳангоми азназаргузаронии шахсӣ аз боздоштшуда салафани полиэтилении дорои моддаи баромадаш гиёҳӣ ва дорои бӯйи махсус мусодира гардид. Моддаи мусодирагардида канабис буда, вазнаш 15 килову 10 грамм аст»,-зикр карданд дар ин ниҳод.
Аз рӯйи ин далел парвандаи ҷиноятӣ оғоз шуда, чорабиниҳои фаврию ҷустуҷӯӣ дар мавриди ошкор кардани мансубияти дигар ашхос ба ин ҷиноят идома доранд.
