Ҳуқуқшиноси гимназияи «Сафина» дар шаҳри Хуҷанд аснои гирифтани пора дастгир шуд ва рӯзҳои наздик ба додгоҳ ҳозир мешавад.
Дар ин бора ба АП дар Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд хабар додаанд.
Ба қавли манбаъ, ҳуқуқшиноси гимназияи «Сафина»-и шаҳри Хуҷанд Ф.Ш. аз ҷониби кормандони Агентии зидди фасод дар лаҳзаи гирифтани пора дар ҳаҷми 1,5 ҳазор доллар дастгир мешавад.
«Ин миқдор маблағро вай аз зани маҳаллӣ А.Т. барои дохил кардани хоҳарзодаи ӯ ба коллеҷи тиббии шаҳри Хуҷанд гирифтааст», – зикр кард манбаъ.
Аз рӯи моддаи 247 қ. 2 (Қаллобӣ)-и Кодекси ҷиноятии ҶТ дар нисбати дастгиршуда парвандаи ҷиноятӣ оғоз шуда, баъд аз тафтиш ба додгоҳ ирсол мегардад.
Тибқи маълумоти Раёсати зидди фасод дар вилояти Суғд, дар нимсолаи аввали соли 2013 дар шимоли Тоҷикистон 47 далели қаллобӣ (2011- 76) ба қайд гирифта шудааст.
