Дар Маркази исломии Тоҷикистон нахустин дастгоҳи болобардор барои шахсони имконияташон маҳдуд мавриди истифолда қарор гирифт.
Тавре ба ОИ «Азия-Плюс» раиси Ҷамъияти маъюбони «Имконият»-и шаҳри Душанбе Асадулло Зикрихудоев хабар дод, дар масҷиди марказӣ низ барои афроди имконияташон маҳдуд як ҳуҷраи алоҳида – ҳоҷатхона ва ҷои таҳорат барои маъюбон сохта шудааст. «Дар дармонгоҳи рақаи 12 низ роҳрави алоҳида (пандус) ва ҳоҷатхонаи дастрас барои маъюбон бунёд гардид», – иброз дошт ӯ.
Ба қавли номбурда, лоиҳа дар ҳамдастӣ бо Агентии сохтмону меъморӣ ва Ташкилот оид ба безараргардонии минаҳои Швейтсария (FSD) ва ҳамкорӣ бо ҷамъияти «Имконият» амалӣ гардид.
«Ҳадаф аз амалисозии ин лоиҳа зарурат доштани фароҳам овардани чунин шароитҳо барои афроди имконияташон маҳдуд дар ҳама ҷой аст», – гуфт Зикрихудоев.
Раиси ҷамъият ҳамчунин изҳор намуд, ки дар таҳияи қонунгузорӣ ҷомеа ба дастовардҳои назаррас ноил гардид, вале оид ба иҷрои меъёрҳои қонун мушкилот ҷой доранд. «Гӯё роҳрав барои маъюбон месозанд, вале он ба меъёрҳо ҷавобгӯ набуда, комиссияи қабул онро мепазирад. Фикр мекунам, ки то ба ҳайати комиссияи қабул шомил шудани мо, ин ҳолат ҳамин тарз идома меёбад», – афзуд ӯ.
