Рӯзи чоршанбеи ҳамин ҳафта миёни Тоҷикистон ва Бонки осиёгии рушд (БОР), ки ба сифати Агентии Фонди иқлимии сармоягузорӣ амал мекунад, оид ба лоиҳаи «Ташаккули устуворӣ ба тағйирёбии иқлим дар ҳавзаи дарёи Панҷ» созишномаи бурсӣ ба имзо расид.
Бино ба иттилои котиботи Вазорати молияи ҶТ, ҳадаф аз амалисозии лоиҳа коҳиши таъсири манфии тағйирёбии иқллим ба ҳавзаи дарёи Панҷ тавассути бунёди низоми бештар устувори муҳофизат аз обхезӣ, барқарорсозии зербинои таъминоти ҷамоатҳои осебпазир бо оби нӯшокӣ, пешниҳоди хизматгузориҳои молиявӣ ба гурӯҳҳои осебпазир, бахусус занон ва таҳкими имконоти кумитаҳои идоракунии офатҳои табиӣ ва иттиҳодияҳои истифодабарандагони об мебошад.
Гуфта мешавад, арзиши умумии лоиҳа 24,7 млн. доллари ИМА-ро ташкил медиҳад, ки 21.55 млн. $ бурс аз Фонди стратегии иқлимии БОР, 2,4 млн. $ ҳиссаи ҳукумат ва 0,7 млн. $ ҳиссаи ниҳодҳои молии шарикон дар доираи ҷабҳаи маблағгузории хурд мебошад.
Созишномаи бурсӣ аз ҷониби вазири молияи Тоҷикистон Сафаралӣ Наҷмуддинов ва намояндаи доимии БОР дар ҶТ Си.Си.Ю ба имзо расида, амалисозии он моҳи сентябри соли равон оғоз ва соли 2018 ба итмом мерасад.
Ёдрас мекунем, ки
ахири моҳи июл
Бонки осиёгии рушд ҷудо кардани бурс дар ҳаҷми 21,55 млн. доллари ИМА ба лоиҳаи коҳиши таъсири манфии тағйири иқлим дар 59 маҳаллаи аҳолинишини ҳавзаи дарёи Панҷ дар Тоҷикистонро тасдиқ карда буд.
