Дар Иттиҳоди нерӯҳои ислоҳотхоҳи Тоҷикистон (ИНИТ) изҳор намуданд, ки дар сурати ба қайд нагирифтани номзади ҲНИТ Ойниҳол Бобоназарова ба мансаби президентӣ ба интихоботи президентӣ таҳрим (бойкот) эълон мекунанд. Дар ин бора имрӯз зимни ҷаласаи ИНИТ дар Душанбе изҳори назар карда шуд.
Ба гуфтаи раиси ҲНИТ Муҳиддин Кабирӣ, номзади ҲНИТ, ҳуқуқшинос Бобоназарова нахуст бояд зинаҳои маъмулии қабули қарор оид ба мушкилоти бақайдгирии ӯро тай намояд. Кабирӣ мегӯяд, онҳо дар бораи то соати муқаррашудаи 18:00-и рӯзи 10-уми октябр ҷамъоварӣ намудани миқдори зарурии имзоҳои шаҳрвандон барои ҷонибдории ӯ далелҳо пешниҳод карданианд. Ӯ шарҳ дод, ки мувофиқи қонун, номзад ба ҷонибдории худ бояд на камтар аз 5% аз шумори умумии интихобкунандагон имзо ҷамъоварӣ кунад ва шумори умумии интихобкунандагон дар маҷмӯъ 4 млн. 120 нафарро ташкил медиҳад.
«Ҳамин тариқ, имзоҳои ҷамъовардаи мо ба миқдори 202 ҳазор 5%-и заруриро ташкил медиҳанд, зеро дар қонун шумори дақиқи имзоҳои зарурӣ зикр нагардида, танҳо ба 5%-и интихобкунандагон ишора шудааст», – гуфт Кабирӣ.
Ба қавли ӯ, дар ин робита номзади пешбаршуда аз ҲНИТ ният дорад, ки ба КМИР муроҷиат намуда, аз куҷо пайдо шудани рақами 210 ҳазор имзоро ошкор намояд. «Агар дар навбати худ КМИР бақайдгирии ӯро рад кунад, танҳо дар ин ҳолат мо ба чораи охирин – таҳрим эълон кардани интихобот даст мезанем», – зикр кард М.Кабирӣ.
Раиси Ҳизби сотсиал-демократии Тоҷикистон Раҳматилло Зойиров дар навбати худ шарҳ дод, ки пас аз эълони расмии қарори КМИР дар бораи бақайдгирии номзадҳо, дар муддати 10 рӯз Бобоназарова ҳуқуқ дорад, ки аз болои он шикоят барад.
«Аз ин рӯ, фурсатро аз даст надода, ҳарчӣ зудтар аз тамоми имконоти қонунӣ истифода бурдан зарур аст, зеро КМИР қарори худро рӯзи 11-уми октябр эълон дошта, имрӯз аллакай 14-ум аст», – гуфт Зойиров. Зойиров мегӯяд, «бо пешниҳоди тамоми далелҳо дар бораи имзоҳои ҷамъоваришуда дарҳол мебояд бо КМИР гуфтушунид кард».
Раҳматилло Зойиров зикр кард, ки агар бақайдгирии Бобоназарова рад шавад, «пас мебояд аризаи даъвогӣ навишта, онро мутобиқ қонуни конститутсинонӣ «Дар бораи интихоботи президенти ҶТ» ба Суди олӣ пешниҳод намуд».
Намояндагони ИНИТ тасмим гирифтанд, ки пас аз ду рӯз дар бораи амалҳои минбаъдаи ИНИТ ҷиҳати дастгирии номзад аз ҲНИТ қарори ниҳоии худро эълон мекунанд.
Тавре қаблан хабар дода будем, номзади пешбаришуда аз ҲНИТ Ойниҳол Бобоназарова то субҳи рӯзи ҷумъа ба ҷонибдории худ 210 ҳазор адад имзоҳои зарурии интихобкунандагонро ҷамъоварӣ карда натавонист. Роҳбари Дастгоҳи КМИР Абдуманнон Додоев изҳор дошта буд, ки номзад Ойниҳол Бобоназарова аз маъраккаи интихоботи президентӣ хориҷ мешавад.
Ҳамин тариқ, айни замон аз 7 номзади пешбаришудаи аҳзоб ба мақоми президенти Тоҷикистон 6 нафар ба қайд гирифта шуданд. Инҳо президенти амалкунандаи ҷумҳурӣ Эмомалӣ Раҳмон, намояндаи Ҳизби аграрӣ академик Толиббек Бухориев, раиси Ҳизби ислоҳоти иқтисодӣ Олимҷон Бобоев, муовини раиси Ҳизби коммунист Исмоил Талбаков, раиси Ҳизби сотсиалистӣ Абдуҳалим Ғаффоров ва раиси Ҳизби демократии Тоҷикистон Саидҷаъфар Исмонов мебошанд.
