Зимни суханронӣ дар Конференсияи сатҳи баланд таҳти унвони «Амнияти энергетикӣ ва рушди устувор – дидгоҳи САҲА» дар шаҳри Ашқободи Туркманистон вазири корҳои хориҷии Тоҷикистон Ҳамрохон Зарифӣ изҳор намуд, ки ояндаи Тоҷикистон ба истифодаи пурсамар ва оқилонаи захираҳои гидроэнергетикӣ вобаста аст. Дар ин бора департаменти иттилооти ВКХ ҶТ хабар медиҳад.
«Дар ҳоле ки чанде аз кишварҳои минтақа аз захираҳои бузурги нафту газ бархӯрдоранд, кишварҳои дигар кӯшиш ба харҷ медиҳанд, ки аз имконоти доштаи худ дар бахши энергияи барқароршаванда пурсамар истифода кунанд. Ба сафи ин кишварҳо Тоҷикистон низ шомил буда, аз имконоти бузурги истеҳсоли барқи арзон ва аз лиҳози экологӣ тоза бархӯрдор аст», – зикр кардааст Зарифӣ.
Ҳ.Зарифӣ таъкид доштааст, ки захираҳои гидроэнергетикии Тоҷикистон ба истеҳсоли 527 млрд. кВт/соат нерӯи барқ дар як сол баробар буда, аз талаботи имрӯзаи минтақаи Осиёи Марказӣ беш аз се маротиба зиёдтар аст.
Вазири корҳои хориҷии Тоҷикистон амалисозии лоиҳаи Рушди бозори минтақавии электроэнергия дар Осиёи Марказӣ ва Ҷанубӣ ё худ CASAREM (Central Asia – South Asia Regional Electricity Market)-ро муҳим арзёбӣ намуда, изҳор кард, ки дар баробари ин татбиқи муваффақонаи марҳилаи аввали лоиҳаи CASA-1000 низ дар ин самт нақши муҳим дорад, зеро дар ин лоиҳа бунёди зерсохтор ва низоми зарурӣ барои интиқоли барқ миёни Осиёи Марказӣ ва Ҷанубӣ пешбинӣ шудааст.
Ӯ ҳамчунин таъкид намудааст, ки яке аз роҳҳои таъмини сулҳу субот дар Афғонистон тақвияти ҳамкориҳо бо ин кишвар ва ҷалби фаъоли ӯ ба лоиҳаи минтақавӣ мебошад. «Дар ин робита лоиҳаи сохтмони қубури интиқолии Туркманистон-Афғонистон-Покистон-Ҳиндустон дар ташаккули заминаи глобалии амнияти энергетикӣ саҳми босазо гузошта метавонад», – иброз доштааст Ҳ.Зарифӣ.
