Дар робита ба баргузории чорабиниҳои идонаи солинавӣ дар майдони асосии пойтахт – «Дӯстӣ», ки шоми имрӯз доир мегардад, ҳаракати нақлиёт дар ин майдон ва кӯчаҳои гирду атрофи он аз соати 17:00-и имрӯз то анҷоми чорабинӣ манъ карда мешавад. Дар ин бора ба ОИ «Азия-Плюс» аз Шуъбаи БДА-и Раёсати ВКД ҶТ дар шаҳри Душанбе хабар доданд.
«Шуъбаи БДА-и Раёсати ВКД ҶТ дар шаҳри Душанбе аз ронандагони воситаҳои нақлиёт дархост мекунад, ки дар вақти зикршуда барои равуо аз кӯчаҳои дигар истифода намоянд», – зикр кард манбаъ.
Ёдрас мекунем, ки имрӯз аз соати 19 то 21 дар майдони «Дӯстӣ»-и пойтахт консерти ситораҳои эстрадаи тоҷик баргузор шуда, чорабинӣ бо фейерверки идона ба итмом мерасад.
