Мавриди истифода қарор додани навбати аввали Маркази барқу гармидиҳии Душанбе-2 бо иштироки президенти мамлакат ахири ҳамин ҳафта дар назар аст.
Аз Вазорати саноат ва технологияҳои нави ҶТ ба ОИ «Азия-Плюс» дар ин робита иттилоъ доданд, ки МБГ-2 барои ба истифода додан омода буда, иқтидори он истеҳсоли ҳудуди 50 мегаватт нерӯи барқ аст ва тавассути васл ба зеристгоҳи Душанбе-500 кВ ба шабакаи ягонаи энергетикии Тоҷикистон пайваст мешавад.
Қобили зикр аст, ки марказ аз ду навбат 50 МВт иборат аст. Барои кори 1 дег дар 1 соат 31 тонна, дар як шабонарӯз 744 тонна ва дар як моҳ 22 ҳазору 320 тонна ангишт лозим аст.
Пас аз мавриди истифода қарор гирифтани навбати аввали марказ 50 ҳазор нафар сокинони Душанбе бо нерӯи барқ таъмин гардида, дар мавсими ояндаи тирамоҳу зимистон бо гармӣ ва оби гарм низ таъмин карда мешаванд.
Дар бораи ба МБГ-2 пайваст шудани маҳз кадом минтақаи пойтахт алҳол маълумот дода нашуд. «Навбати дуюми МБГ Душанбе-2 давоми соли 2014 ба истифода дода хоҳад шуд», – гуфтанд дар вазорати мазкур.
Ёдрас мекунем, ки Маркази барқу гармидиҳии «Душанбе»-2» дар доираи созишномаи сеҷониба миёни Вазорати энергетика ва саноати ҶТ, ҶСК «ТВЕА» (Чин) ва ҶДММ «ТВЕА Душанбе саноати кӯҳкорӣ» бунёд мегардад. Арзиши лоиҳавии МБГ Душанбе-2 30 млн. доллари ИМА арзёбӣ мешавад.
