Ахири ҳафтаи равон дар Вазорати молияи ҷумҳурӣ ҷаласаи васеи ҳайати мушовара оид ба натиҷагирӣ аз фаъолият дар соли 2013 баргузор шуд.
Бино ба иттилои котиботи Вазорати молияи ҶТ, аз рӯи масъалаи «Дар бораи натиҷаҳои фаъолияти молиявӣ ва иҷрои Буҷети давлатии Тоҷикистон барои соли 2013 ва вазифаҳо оид ба рушди пурсамар ва идоракунии всиотаҳои молиявӣ дар соли 2014» муовини вазири молияи ҶТ Аламхон Наимӣ маърӯза кард.
Ба иттилои манбаъ, дар ҷаласа ҳисоботҳои роҳбарони Раёсатҳои молияи вилоятҳо, шаҳру навоҳӣ ва дигар ташкилотҳои зертобеъи Вазорати молия дар бораи фаолият дар соли ҳисоботии 2013 ва вазифаҳо барои соли 2014 шунида шуданд.
Гуфта мешавад, вазири молияи ҷумҳурӣ Абдусалом Қурбонов оид ба масоили марбут ба саривақт ва хушсифат иҷро намудани буҷети соли 2014 назди кормандони масъули низом вазифаҳои мушаххас гузошта таъкид намуд, ки тамоми кормандони мақомоти молия ва ташкилотҳои зертобеъи вазорат бояд баҳри иҷрои вазифаҳои аз ҷониби ҳукумат гузошта ҳамаҷониба кӯшиш ба харҷ диҳанд.
