Ҷопон маблағгузории лоиҳаи азнавсозии роҳҳои шаҳри Қӯрғонтеппаро бар уҳда гирифт.
Бино ба гуфти раиси вилояти Хатлон Давлатшо Гулмаҳмадов, Ҷопон лоиҳаи азнавсозии беш аз 6 км роҳҳои дохили шаҳри Қӯрғонтеппаро бар уҳда гирифтааст. «Аллакай мутахассисон омада, роҳҳои автомобилгарде, ки бояд мавриди азнавсозӣ қарор бигиранд, мавриди омӯзиш қарор доданд ва имсол оғози корҳои сохтмону таъмир дар назар аст», – зикр кард номбурда.
Ба гуфти раиси вилоят, яке аз мушкили асосии шаҳри Қӯрғонтеппа вазъи ногувори роҳҳои мошингарди шаҳр аст, ки дар сурати амалишавии ин лоиҳа як қисми он азнавсозӣ мешавад. «Ҳамчунин як соҳибкори маҳаллӣ таъмири роҳи мошингарди кӯчаи Айниро ба зимма гирифта, аллакай бештари онро асфалтпӯш намуд ва қисмати дигарашро низ имсол ба анҷом хоҳад расонид», – гуфт ӯ.
Гулмаҳмадов ҳамчунин гуфт, Ҷопон маблағгузории азнавсозии зиёда аз 4 км роҳҳои мошингарди шаҳри Кӯлобро низ бар уҳда гирифтааст.
