Дар назар аст, ки бо сохтмони хатти баландшиддати интиқоли барқ, нерӯи барқи зиёдатии низоми энергетикии ВМКБ дар фасли зимистон ба Низоми ягонаи энергетикии Тоҷикистон интиқол дода мешавад.
Бино ба гуфтаи вазири энергетика ва захираҳои оби ҷумҳурӣ Усмоналӣ Усмонов, солҳои минбаъда дар қаламрави МВКБ боз ду нерӯгоҳи барқӣ бо иқтидори умумии 135 МВт ва ҳамчунин як қатор нерӯгоҳҳои хурди барқии дигар сохта мешаванд.
«Айни замон миёни Бунёди Оғо Хон ва ҳукумати Тоҷикистон оид ба роҳандозии корҳои омодагӣ барои сохтмони нерӯгоҳи барқии «Себзор» (10 МВт) ва «Санобод» (125 МВТ) гуфтушунид ҷараён дошта, пас аз ба истифода додани онҳо, истеъмолгарони Бадахшон пурра бо нерӯи барқ таъмин мегарданд ва имкон пайдо мешавад, ки як қисмати нерӯи барқ ба Бадахшони Афғонистон ва қисмати дигараш ба низоми энергетикии Тоҷикистон интиқол дода шавад», – иброз дошт Усмонов.
Вазир таъкид дошт, ки дар баробари бунёди нерӯгоҳҳои зикршуда ҳамчунин сохтмони хатти баландшиддати барқи 110 кВ низ дар назар аст, ки тавассути он дар фасли зимистон нерӯи барқи зиёдатии ширкатҳои зертобеъи «Помир Энержи» ба низомии энергетикии ширкати «Барқи тоҷик» интиқол дода мешаванд.
«Пас аз амалисозии лоиҳаи CASA-1000 низоми энергеткии «Помир Энержи» ба ин хат пайваст шуда, тариқи он нерӯи барқи зиёдатӣ ба кишварҳои ҳамсояи ҷанубӣ интиқол мегарданд», – зикр кард ӯ.
