Корҳо дар қитъаи лоиҳаи CASA-1000 дар Афғонистон тибқи нақшаи навшуда то баҳори соли 2027 ба охир расида, аз тобистони соли 2027 истифодаи тиҷоратии лоиҳа оғоз мешавад. Дар ин бора намояндаи ширкати паймонкори қитъаи афғонистонии лоиҳа Kamani Engineering Corporation (KEC) зимни вохӯрӣ бо вазири энергетика ва захираҳои оби Тоҷикистон Далер Ҷумъа хабар додааст.
Тавре ки хадамоти матбуоти Вазорати энергетикаи ҷумҳурӣ хабар медиҳад, дар ҷараёни вохӯрӣ аввали ҳафтаи равон дар Душанбе ҳамчунин намояндагони Бонки ҷаҳонӣ ва раҳбарияти ширкати Da Afghanistan Breshna Sherkat (DABS) ширкат варзидаанд.
“Ҷонибҳо вазъи кунунии корҳо, инчунин масоили фаннӣ ва молиявии лоиҳаи CASA-1000-ро баррасӣ карданд”, – зикр мешавад дар хабар.
Вазири тоҷик аҳаммияти стратегии амалисозии лоиҳаи CASA-1000-ро зикр карда, таъкид доштааст, ки он ба таҳкими ҳамкории минтақавӣ, баланд гардидани эътимод байни кишварҳои иштирокчии он ва таъмини содироти нерӯи барқи аз лиҳози экологӣ тоза мусоидат мекунад.
Бино ба маълумоти Вазорати энергетика, айни замон корҳои сохтмон дар қаламрави се кишвари иштирокчии лоиҳа – Қирғизистону Тоҷикистон ва Покистон ба охир расида, корҳо дар Афғонистон идома доранд.
“Пурра ба охир расидани корҳои лоиҳа рушди бозори энергетика, таҳкими амнияти энергетикӣ ва густариши ҳамкориҳои иқтисодиро байни кишварҳои иштирокчии лоиҳа таъмин мекунад”, – хулоса шудааст дар хабари Вазорати энергетика.
Дар бораи лоиҳаи CASA-1000
Дар лоиҳаи Central Asia – South Asia – 1000 (CASA-1000) сохтмони хати фаромарзии интиқоли барқ пешбинӣ шудааст, ки тариқи он интиқоли нерӯи барқ аз Тоҷикистону Қирғизистон ба Афғонистону Покистон сурат мегирад.
Маросими расмии оғози татбиқи лоиҳаи CASA-1000 моҳи майи соли 2016 дар шаҳри Турсунзода (Тоҷикистон) бо иштироки сарони кишвар ва раисони ҳукуматҳои чор кишвари иштирокчии лоиҳа баргузор шуд.
Тибқи маълумоти Вазорати энергетикаи Тоҷикистон, ҳамаи корҳо дар доираи лоиҳаи мазкур дар қаламрави Тоҷикистону Қирғизистон ба охир расида, анҷоми корҳои татбиқи лоиҳа дар қаламрави Покистон то охири соли ҷорӣ ба нақша гирифта шудааст.
Дар чаҳорчӯби лоиҳаи мазкур 1387 километр хати ду истгоҳи табодули барқ барои интиқоли 1300 МВт нерӯи барқ сохта мешавад.
Маблағи умумии сохтмони ин хати интиқоли барқ бо масофаи умумии 1,4 ҳазор километр ҳудуди 1,2 млрд доллар, арзиши қисмати лоиҳа дар Тоҷикистон – 344 млн ва дар Қирғизистон – 200 млн долларро ташкил медиҳад.
Дар назар аст, ки даромади Тоҷикистон ва Қирғизистон аз содироти нерӯи барқ ҳадди ақалл зиёда аз 250 млн доллар дар як солро ташкил хоҳад дод.
