Яке аз фаъолони Ҳизби коммунисти Тоҷикистон, вакили Шӯрои Олии Тоҷикистон даъвати дуюм Исматшо Зинатшоев субҳи имрӯз дар синни 77-солагӣ аз олам даргузашт.
Тавре ба ОИ «Азия-Плюс» муовини раиси ҲКТ, вакили парлумон Исмоил Талбаков хабар дод, марҳум Зинатшоев солҳои тӯлонӣ дар мақомоти раҳбарии ҳизб кор карда, яке аз иштирокчиёни иҷлосияи таърихии 16-уми Шӯрои Олии ҶТ (моҳҳои ноябр-декабри соли 1992) дар Хуҷанд мебошад, ки дар он сохти конститутсионӣ дар ҷумҳурӣ барқарор карда шуд.
«Зинатшоев ҳамчун вакили мақоми олии қонунгузории Тоҷикистон 24-уми августи соли 1990 дар иҷлосияи дуюми Шӯрои Олии ҶТ, ки дар он Эъломия дар бораи соҳибистиқлолии ҷумҳурӣ қабул шуд, иштирок дошта, ҳамчунин 9-уми сентябри соли 1991 зимни қабули изҳороти ШО ҶТ «Дар бораи истиқлолияти давлатии ҶТ» низ ҳузур дошт», – зикр кард Талбаков.
Ба гуфтаи ӯ, И.Зинатшоев дар зодгоҳаш дар ноҳияи Қумсангир ба хок супурда мешавад. Дар маросими видоъ бо ӯ мақомоти раҳбарӣ, фаъолон ва собиқадорони Ҳизби коммунисти Тоҷикистон ҳузур хоҳанд дошт.
